লখিমপুৰ, ১৬ আগষ্ট: ক'লৈ গ'ল লখিমপুৰত আলফা(স্বাধীন)ই সংস্থাপিত মাজৰ অংশৰ তৃতীয়টো বোমা ? দুদিন ধৰি চৌদিশ চলাথ কৰিও আৰক্ষীয়ে উলিয়াব পৰা নাই সন্ধান । উল্লেখ্য যে স্বাধীনতা দিৱসৰ দিনা আলফা(স্বাধীন)ই উল্লেখ কৰা মতে, পৰিবহণ নিগমৰ কাৰখানাৰ পৰা কিছু নিলগত এখন পৰিত্যক্ত ট্ৰাকত এটা বোমা উদ্ধাৰ হয় । উদ্ধাৰ হোৱা বোমাটোত লিখা আছিল তলৰ অংশ । লালুকত উদ্ধাৰ হোৱা আনটো বোমাৰ ওপৰত লিখা আছিল 'ওপৰ অংশ' । তেনেহ'লে নগৰৰ খেলপথাৰত সংস্থাপন কৰা তৃতীয়টো মাজৰ অংশ হ'ব পাৰে বুলি ধাৰণা কৰা হৈছে । কিন্তু মাজৰ অংশৰ তৃতীয়টো বোমাৰ সন্ধান উলিয়াব পৰা নাই আৰক্ষীয়ে ।
আলফা(স্বাধীন)ৰ তালিকা অনুসৰি এই বোমাটো স্বাধীনতা দিৱস উদযাপন কৰা খেলপথাৰৰ চৌহদৰ ভিতৰত থকা এন এইচ পি চিৰ পৰিত্যক্ত এখন ট্ৰাকত এই বোমাটো সংস্থাপন কৰা আছিল । কিন্তু আৰক্ষী,অৰ্ধসামৰিক বাহিনী,আৰক্ষীৰ বিশেষ শাখাই তন্ন তন্নকৈ বিচাৰিও এই বোমাটোৰ সন্ধান উলিয়াব পৰা নাই । মেটেল ডিটেক্টৰ, স্নিফাৰ ডগ আদিৰ সহায় লৈও আৰক্ষীয়ে বোমাটো বিচাৰি পোৱা নাই । কেৱল ট্ৰাকখনতে নহয়, সমগ্র খেলপথাৰখনৰ লগতে কাষতে থকা শিশু উদ্যান পৰ্যন্ত আৰক্ষীয়ে বোমা বিচাৰি চলাথ কৰিছে যদিও বোমাটো নোলাল ।
নাবালকক সোধপোচৰ বাবে আটক :
আনহাতে, লখিমপুৰত এনেদৰে বোমা সংস্থাপনৰ কামত জড়িত হোৱাৰ সন্দেহ কৰি আৰক্ষীয়ে এজন নাবালকক সোধপোচৰ বাবে আটক কৰিছে । নাবালক হোৱা বাবে আৰক্ষীয়ে তেওঁৰ বিষয়ে জনোৱাৰ পৰা বিৰত আছে । আনহাতে, উদ্ধাৰ হোৱা বোমা দুটা ইতিমধ্যে নিস্ক্রিয় কৰা হৈছে বুলি আৰক্ষীয়ে সদৰী কৰিছে ।
আৰক্ষীৰ বিশেষ শাখাই সন্ধান চলায়ো সুফল নাপালে :
বৃহস্পতিবাৰে দুপৰনিশা পৰ্যন্ত গধুৰ যন্ত্র লৈ আৰক্ষীয়ে ট্ৰাকখনত অনুসন্ধান কৰাৰ পাছত শুকুৰবাৰে নগৰৰ ডাম্পিং গ্ৰাউণ্ডৰ পৰা সন্দেহজনক সকলো স্থানতে আৰক্ষীয়ে তালাচী চলায় । কিন্তু সন্ধিয়া পর্যন্ত আৰক্ষীয়ে বোমাটো উদ্ধাৰত সফল নহ'ল । নগৰখনৰ প্ৰায়বোৰ স্থানতে মেটেল ডিটেক্টৰ, স্নিফাৰ ডগ আদিৰ জৰিয়তে আৰক্ষী আৰু আৰক্ষীৰ বিশেষ শাখাই বোমাটোৰ সন্ধান চলাই সুফল নাপালে ।
বোমাটো উদ্ধাৰ নোহোৱা বাবে ৰাইজ শংকিত :
বোমাটো উদ্ধাৰ নোহোৱা বাবে ৰাইজ শংকিত হৈ নগৰখনত চলাফুৰা কৰিব লগীয়া হৈছে । বোমা থকা বুলি উল্লেখ কৰাৰ পাছতো বোমাটো উদ্ধাৰ নোহোৱাত লখিমপুৰ নগৰ এলেকাত এক আশংকাজনক পৰিবেশে বিৰাজ কৰিছে । ৰাইজে মুকলি মনেৰে বজাৰ-সমাৰ কৰিবলৈ কিছু শংকাবোধ কৰিছে । এনে পৰিবেশ কেতিয়া দুৰ হ'ব সেয়া স্পষ্ট হোৱা নাই ।
