মঙলদৈ, ২৫ আগষ্ট: ৰাজ্য়জুৰি অবৈধ নাগৰিকে খিলঞ্জীয়া লোকক আক্ৰমণ কৰা ঘটনাৰ বিৰুদ্ধে প্ৰতিবাদ চলি থকাৰ মাজতেই দেওবাৰে মঙলদৈ মাছ বজাৰত এক উত্তপ্ত পৰিস্থিতিৰ সৃষ্টি হয় । উত্থাপিত অভিযোগ অনুসৰি নৰেন্দ্ৰ হাজৰিকা নামৰ এজন যুৱকে মাছ ক্ৰয় কৰিবলৈ বজাৰখনলৈ যোৱাৰ সময়তেই এজন মাছ বেপাৰীৰ সৈতে তৰ্ক-বিতৰ্ক হোৱাত বেপাৰীজনে খিলঞ্জীয়া যুৱকজনক প্ৰহাৰ কৰে । এই ঘটনাটোৰ পিচতেই উত্তপ্ত হৈ পৰে মঙলদৈ বজাৰ । পিচত আৰক্ষীৰ লগতে নিৰাপত্তাৰক্ষী ঘটনাস্থলীত উপস্থিত হৈ পৰিস্থিতি নিয়ন্ত্ৰণ কৰে ।
কেনেকৈ সংঘটিত হয় এই ঘটনাটো ?
এই ঘটনাই সমগ্ৰ জিলাখনতে চাঞ্চল্যৰ সৃষ্টি কৰিছে । মঙলদৈৰ নিকটৱৰ্তী মেধিপাৰাৰ নৰেন্দ্ৰ হাজৰিকা নামৰ এজন যুৱকক প্ৰহাৰ কৰা ঘটনাৰ পিছতে উত্তপ্ত হৈ পৰে মঙলদৈ চহৰ । ঘটনাটোৰ পিছতে বন্ধ হৈ পৰে সমগ্র মঙলদৈ চহৰ । ঘটনাৰ বিৱৰণি অনুসৰি, মঙলদৈ মেধিপাৰাৰ যুৱক নৰেন্দ্ৰ হাজৰিকাই পুৱাৰ ভাগত মঙলদৈ মাছৰ বজাৰত সম্পৰ্কীয়ৰ লগত মাছ কিনিবলৈ আহিছিল । মাছ ব্যৱসায়ী এছাদ আলীৰ লগত দৰ-দামকলৈ তৰ্ক-বিতৰ্ক হয় । পিছত ব্যৱসায়ীজনে কেইবাজনো সহযোগীৰ সৈতে আক্ৰমণ কৰে নৰেন্দ্ৰ হাজৰিকাক । আনকি দলটোৱা যুৱকজনক মাছ কটা দাৰেও আক্ৰমণ কৰাৰ চেষ্টা চলায় । অৱশেষত নৰেন্দ্ৰ হাজৰিকাই বিষয়টো বিশ্ব হিন্দু পৰিষদক অৱগত কৰে । ঘটনাৰ বিষয়ে মঙলদৈৰ দল-সংগঠনে খবৰ পাই মাছৰ বজাৰত উতপ্ত পৰিস্থিতিৰ সৃষ্টি কৰাৰ লগতে সমগ্র বজাৰ বন্ধ কৰিবলৈ আহ্বান জনায় ।
মঙলদৈ চহৰৰ বজাৰ বন্ধ : অভিযুক্তজনক গ্ৰেপ্তাৰ
ৰাইজৰ এই আহ্বানৰ প্ৰতি সঁহাৰি জনাই মঙলদৈ চহৰৰ বজাৰ বন্ধ হৈ পৰে । লগতে মঙলদৈ বজাৰত মাৰপিট কৰা অভিযুক্তক কৰায়ত্ব নকৰা পৰ্যন্ত বন্ধ কৰিবলৈ দাবী জনাইছে স্থানীয় ৰাইজে । পিছত আৰক্ষীয়ে পৰিস্থিতি নিয়ন্ত্ৰণলৈ আনে যদিও বৰ্তমানেও মঙলদৈ চহৰত আৰক্ষী-অৰ্ধসামৰিক বাহিনী মোতায়েন কৰা হৈছে । ইপিনে, মঙলদৈ আৰক্ষীয়ে ঘটনাৰ সৈতে জড়িত বাঘপৰিৰ আছাদ আলী নামৰ অভিযুক্তজনক গ্ৰেপ্তাৰ কৰিছে ।
খিলঞ্জীয়াৰ ওপৰত আক্ৰমণ সহ্য় কৰা নহ'ব :
এই ঘটনা সন্দৰ্ভত প্ৰতিক্ৰিয়া প্ৰকাশ কৰি বিশ্ব হিন্দু পৰিষদৰ নেতা এজনে কয়, "মঙলদৈত সঘনাই খিলঞ্জীয়া লোকৰ ওপৰত আক্ৰমণৰ ঘটনা সংঘটিত হ'বলৈ ধৰিছে । খিলঞ্জীয়া লোকৰ ওপৰত কৰা আক্ৰমণ কোনো কাৰণতেই সহ্য় কৰা নহ'ব ।"
