ধুবুৰী, 28 জুন : ধুবুৰী জিলাৰ গৌৰীপুৰৰ দুমৰদহত সৰ্প দংশনত মৃত্যু 16 বছৰীয়া কিশোৰৰ ৷ চিকিৎসকৰ গাফিলতিৰ বাবেই সৰ্প দংশনত আক্ৰান্ত কিশোৰজনৰ মৃত্যু হয় বুলি এতিয়া অভিযোগ কৰিছে পৰিয়ালৰ লোকে ৷ ধুবুৰী চিকিৎসা মহাবিদ্যালয় আৰু হাস্পতালৰ চিকিৎসকৰ ভুল চিকিৎসাৰ ফলতেই কিশোৰজনৰ মৃত্যু হোৱা বুলি পৰিয়ালৰ লোকে অভিযোগ উত্থাপন কৰিছে ৷
পৰিয়ালৰ লোকে জনোৱা অনুসৰি সৰ্প দংশনৰ লগে লগে কিশোৰজনক ধুবুৰী চিকিৎসা মহাবিদ্যালয় আৰু হাস্পতালত ভৰ্তি কৰোৱা হৈছিল ৷ পৰিয়ালৰ অভিযোগ অনুসৰি চিকিৎসা মহাবিদ্যালয়ত ভৰ্তি কৰাৰ পিচতে চিকিৎসকে কিশোৰজনক বেজী দিয়ে আৰু ইয়াৰ কিছু সময়ৰ পিচতে ভুক্তভোগীৰ মৃত্যু হয় ৷ ফলত চিকিৎসকৰ ভুল চিকিৎসাৰ বাবেই কিশোৰজনৰ মৃত্যু হোৱাৰ অভিযোগ কৰিছে পৰিয়ালৰ লোকে ৷
জানিব পৰা মতে গৌৰীপুৰৰ মোফিজুল হক নামৰ কিশোৰগৰাকীক সাপে দংশন কৰাৰ পিচতে পৰিয়ালৰ লোকে ততাতৈয়াকৈ ধুবুৰী চিকিৎসা মহাবিদ্যালয় আৰু হাস্পতালত ভৰ্তি কৰে ৷ চিকিৎসকে সৰ্পই দংশন কৰা কিশোৰগৰাকীৰ শৰীৰৰ পৰা পৰীক্ষাৰ বাবে তেজ লয় আৰু এটা বেজী দিয়ে ৷ ইয়াৰ প্ৰায় 15 মিনিট পিচতেই কিশোৰগৰাকীৰ মৃত্যু হয় বুলি অভিযোগ কৰিছে পৰিয়ালৰ লোকে ৷ এই ঘটনাক লৈ চিকিৎসালয়ত এক হুলস্থুলীয়া পৰিৱেশৰ সৃষ্টি হয় ৷ চিকিৎসকৰ গাফিলতি তথা ভুলৰ বাবেই কিশোৰজনৰ মৃত্যু হয় বুলি অভিযোগ কৰিছে পৰিয়ালে ৷
লগতে পঢ়ক : উপযুক্ত চিকিৎসাৰ অভাৱ : কৰুণ মৃত্যু কণমানি প্ৰিন্সিৰ - Girl dies of snake bite
