কলিয়াবৰ, 14 জুন : সুদীৰ্ঘ সময়ৰে পৰা ৰাজ্যৰ চাহ শ্ৰমিকসকলে নিজৰ প্ৰাপ্যৰ দাবীত চৰকাৰৰ বিৰুদ্ধে সাব্যস্ত কৰি আহিছে প্ৰতিবাদ ৷ চৰকাৰ আহে, চৰকাৰ যায় ৷ কিন্তু চাহ শ্ৰমিকসকলে দীৰ্ঘদিনৰে পৰা প্ৰাপ্য সা-সুবিধাৰ পৰা বঞ্চিত হোৱাৰ কথাটোতহে কোনোৱে গুৰুত্ব আৰোপ নকৰে ৷ যাৰ ফলত একপ্ৰকাৰ চৰম অৱহেলাৰ মাজেৰে দিন পাৰ কৰিবলগীয়া হৈছে চাহ শ্ৰমিকসকলে ৷
উল্লেখ্য যে, ৰাজ্যৰ চাহ উদ্যোগখণ্ডত প্ৰৱৰ্তন কৰা হৈছে কেতবোৰ নতুন নীতি ৷ এই নতুন নীতি অনুসৰি ৰাজ্যৰ বহু চাহ শ্ৰমিকৰ পূৰ্বৰ তুলনাত হ্ৰাস পাইছে মজুৰি ৷ অসম চাহ নিগমৰ অধীনষ্ঠ কেইবাখনো চাহ বাগিচাৰ শ্ৰমিকে নতুন নিৰিখ অনুসৰি কমকৈ মজুৰি লাভ কৰাত আৰম্ভ হ’বলৈ ধৰিছে প্ৰতিবাদ ৷
লগতে পঢ়ক: আৰু কিমান ভূগিব লাগিব ৰাজ্যৰ চাহ শ্ৰমিকে ? - Tea Estate Labour Protest
কলিয়াবৰৰো বহুকেইখন শ্ৰমিকে এই বঞ্চনাৰ বলি হোৱাৰ পৰিপ্ৰেক্ষিতত ৰাজপথলৈ ওলাই আহি প্ৰতিবাদ সাব্যস্ত কৰে ৷ দৰাচলতে চাহ শ্ৰমিকৰ মাজত তীব্ৰ অসন্তুষ্টি দেখা দিয়াটোও স্বাভাৱিক ৷ কিয়নো পূৰ্বৰ 250 টকাৰ তুলনাত এতিয়াৰে পৰা চাহ শ্ৰমিকসকলে মজুৰি হিচাপে লাভ কৰিব 205 টকা ৷ তাৰোপৰি এই ধন চাহ শ্ৰমিকসকলে পোটপটীয়াকৈ লাভ নকৰি লাভ কৰিব বেংক একাউণ্টৰ জৰিয়তেহে ৷
