মৰাণ, 8 ছেপ্টেম্বৰ: দেওবাৰে ঐতিহাসিক চৰাইদেউৰ মথুৰাপুৰত অনুষ্ঠিত হ'ল প্ৰদেশ কংগ্ৰেছৰ বৰ্ধিত কাৰ্যনিৰ্বাহ সভা । কংগ্ৰেছৰ দলৰ সাংগঠনিক ভেটি শক্তিশালী কৰাৰ লক্ষ্য আগত ৰাখি অনুষ্ঠিত কৰা হয় এই বৰ্ধিত কাৰ্যনিৰ্বাহক সভা ৷ 2026 ৰ বিধানসভা নিৰ্বাচনৰ লগতে আগন্তুক বিধানসভাৰ উপ-নিৰ্বাচনৰ ৰণনীতি প্ৰস্তুতিৰ বাবে কংগ্ৰেছ দলে আলোচনা কৰে ৷
নিখিল ভাৰত কংগ্ৰেছ কমিটীৰ সাধাৰণ সম্পাদক জীতেন্দ্ৰ সিঙৰ উপস্থিতিত অনুষ্ঠিত হোৱা এই সভাত তৃণমূল কংগ্ৰেছৰ ৰাজ্যিক সভাপতি পদৰ পৰা পদত্যাগ কৰা ৰিপুণ বৰাই আজি পুনৰ কংগ্ৰেছ দলত যোগদান কৰে ৷ লগতে পল্লৱী শইকীয়া নামৰ অসম চৰকাৰৰ এগৰাকী ৰাজপত্ৰিত বিষয়াই কংগ্ৰেছ দলত যোগদান কৰা বিষয়টোৱে ৰাজ্যত ব্যাপক চৰ্চা লাভ কৰিছে । বিকশিত অসমৰ কথা কৈ থকা বিজেপি চৰকাৰৰ দিনত এগৰাকী চৰকাৰী উচ্চ পদস্থ বিষয়া হৈও চাকৰি এৰি কংগ্ৰেছ দলত যোগদান কৰাটো ৰাজনৈতিক মহলত চৰ্চাৰ বিষয় হৈ পৰিছে ।
কৰ অধীক্ষকৰ দায়িত্বত থকা পল্লৱী শইকীয়াই কংগ্ৰেছ দলত যোগদান কৰাৰ উদ্দেশ্যেই শনিবাৰে চাকৰি ত্যাগ কৰিছিল । গুৱাহাটী বিশ্ববিদ্যালয়ৰ প্ৰাক্তন সাধাৰণ সম্পাদিকাগৰাকীয়ে চাকৰি জীৱন আৰম্ভ কৰা আগতে যুৱ কংগ্ৰেছৰ সৈতে জড়িত থাকি কংগ্ৰেছ দলৰ হৈ কাম কৰিছিল ।
ৰাজপত্ৰিত বিষয়াৰ দৰে এটা চাকৰি এৰি ৰাজনীতিলৈ অহা পল্লৱী শইকীয়াই কংগ্ৰেছ দলত যোগদান কৰিয়েই বিজেপিৰ বিৰুদ্ধে জেহাদ ঘোষণা কৰাৰ লগতে ৰাইজৰ উন্নয়নৰ বাবে কাম কৰাৰ সংকল্প লোৱাৰ কথা জানিবলৈ দিয়ে । কংগ্ৰেছত যোগদান কৰি পল্লৱী শইকীয়াই কয়, ‘‘মই কালি চাকৰি ত্যাগ কৰিলো । বৰ্তমান সময়ত ৰাজ্যৰ একাংশ লোকৰ বহুত উন্নতি হৈছে । বাকী সকলে ৫০০ টকা এটা নি বজাৰৰ পৰা একো কিনিব নোৱাৰা এক ভয়ংকৰ অৱস্থা হৈছে । এই পৰিস্থিতিৰ পৰা ৰাইজক ৰক্ষা কৰিবলৈ চাকৰি ত্যাগ কৰি কংগ্ৰেছ দলত যোগদান কৰিছো । মই ৰাইজৰ হকে কাম কৰি যাম, বিজেপিয়ে যি অস্থিৰ পৰিবেশৰ সৃষ্টি কৰিছে তাৰ বাবে ৰাইজ সজাগ হ'ব লাগিব । নহ'লে বহুত ধনী মানুহ বহুত ধনী হৈ যাব বেছি সংখ্যকেই খাবলৈ নাপাই মৰিব ।’’
