বৰপেটাৰোড, 1 জুলাই: বৰপেটাৰোডৰ বালাভিঠাত চাঞ্চল্যকৰ ঘটনা ৷ হাছমত আলী নামৰ এজন লোকৰ মৃতদেহ উদ্ধাৰৰ পিচতেই সমগ্ৰ অঞ্চলটোত সৃষ্টি চাঞ্চল্যৰ ৷ ব্যৱসায়িক সতীৰ্থই হাছমতক হত্যা কৰাৰ অভিযোগ ৷ এই অভিযোগ তুলিছে মৃত হাছমতৰ পত্নী আৰু কন্যাই ৷ বৰপেটাৰোডৰ বালাভিঠাত হাছমত আলীক হত্যা কৰি আত্মহত্যাৰ ৰূপ দিয়াৰ বাবে চিপজৰী লগাই ওলোমাই থোৱাৰ অভিযোগ ৷
জানিব পৰা মতে 27 নং ৰাষ্ট্ৰীয় ঘাইপথৰ পৰা কিছু ভিতৰুৱা স্থানত থকা এটা ক্ৰেছাৰ মিলত আন বহুলোকৰ লগতে হাছমত আলী নামৰ লোকজনো আছিল এগৰাকী অংশীদাৰ ৷ কিন্তু ব্যৱসায়িক সংঘাতৰ বাবে হাছান আলীক ধনৰ বাবে মিলৰ কেইজনমান লোকে বিগত সময়ছোৱাত ব্যাপকভাৱে হেঁচা দিছিল ৷ ছমাহৰ সময় বিচাৰিছিল হাছমত আলীয়ে ৷
তাৰ মাজতে হাছমতৰ মাটি-সম্পত্তি ভয়-ভাবুকিৰে হস্তগত কৰিবলৈও চেষ্টা কৰিছিল দলটোৱে ৷ এইক্ষেত্ৰত নাম উল্লেখ হৈছে হাবেজ, বাৰেক, বাতেন, ৰফিক, কুৰবান, লুৎফৰ আৰু শিকদাৰ নামৰ ব্যক্তিকেইজনৰ ৷
হাছমতৰ পত্নী-কন্যাই সংবাদ মাধ্যমৰ আগত প্ৰকাশ কৰা মতে, বিগত কেবাদিনো ধৰি ব্যাপক মানসিক অশান্তিত ভুগিছিল লোকজনে ৷ তেওঁক বহুবাৰ মাৰি পেলোৱাৰ ভাবুকি দিছিল ব্যৱসায়িক সতীৰ্থ কেইজনে ৷ দেওবাৰে বিয়লি হাছমত আলীক মাতি নি তেওঁৰ পৰা জোৰ-জবৰদস্তি মাটি-সম্পত্তি লিখাই লোৱা বুলিও পত্নী-কন্যাই অভিযোগ কৰিছে ৷
হাছমতৰ কন্যাই কয় যে, দেউতাকক বাৰে বাৰে মাৰি পেলোৱাৰ ভাবুকি দিয়া হৈছিল ৷ দেওবাৰে নিশা দেউতাকে মেছেজযোগে তেওঁৰ জীৱনলৈ নামি অহা বিপদৰ সবিশেষ জনাইছিল কন্যাক ৷
লগতে পঢ়ক: ঘৰৰ ভিতৰতে উদ্ধাৰ পত্নীৰ মৃতদেহ, মুমূৰ্ষু অৱস্থাত উদ্ধাৰ স্বামীক - Mysterious murder case
পুৱা ওলমি থকা অৱস্থাত উদ্ধাৰ হৈছিল হাছমতৰ মৃতদেহ ৷ পত্নী-কন্যাই অভিযোগ কৰিছে যে, হাছমত আলীক হত্যা কৰি আত্মহত্যাৰ ৰূপ দিয়াৰ বাবে এইদৰে ওলোমাই থোৱা হৈছে ৷ তেওঁৰ মুখমণ্ডলত দেখা গৈছে আঘাতৰ চিন ৷ হাবেজ, বাৰেক, বাতেন, ৰফিক, কুৰবান, লুৎফৰ আৰু শিকদাৰৰ বিৰুদ্ধে হাছমতক হত্যা কৰাৰ অভিযোগ তুলিছে পৰিয়ালে ৷
বৰপেটাৰোড আৰক্ষী ঘটনাস্থলীত উপস্থিত হৈ মৃতদেহটো মৰণোত্তৰ পৰীক্ষাৰ বাবে বৰপেটালৈ প্ৰেৰণ কৰে ৷ আৰক্ষীয়ে এই ঘটনা সন্দৰ্ভত তদন্ত অব্যাহত ৰাখিছে ৷ জানিব পৰা মতে, মৃতদেহ উদ্ধাৰৰ সময়ত সেই স্থানত বহু সংখ্যক লোক উপস্থিত আছিল যদিও উপস্থিত নাছিল হাছমতৰ পত্নী-কন্যাই অভিযোগ তোলা এজনো ব্যক্তি ৷
