গুৱাহাটী, 13 মে': মানৱ জাতিয়ে নিজৰ লাভ তথা আৰামদায়ক আৰু সুখকৰ জীৱন অতিবাহিত কৰাৰ বাবে গছ-গছনি , জীৱ-জন্তুকে আদি কৰি প্ৰকৃতিৰ ওপৰত অত্যাচাৰ চলায় আহিছে । ইয়াৰ ফল লাহে লাহে মানৱ জাতিয়ে ভুগিবলৈ ধৰিছে । জৈৱ বৈচিত্ৰ্যক অক্ষুণ্ণ ৰখা জীৱ-জন্তুবোৰ জীৱন লাহে লাহে সংকটাপন্ন হৈ পৰিছে ।
জৈৱ বৈচিত্ৰ্যৰ প্ৰতি এক গুৰুত্বপূৰ্ণ ভূমিকা গ্ৰহণ কৰি অহা কাছৰ অস্তিত্ব আজি বিপদাপন্ন । উল্লেখ্য যে বিশ্বজুৰি 365 টা প্ৰজাতিৰ কাছ আছে যাৰ ভিতৰত 34 টা প্ৰজাতি ভাৰতত আৰু 21 টা প্ৰজাতিয়ে অসমত উপলব্ধ । এই সন্দৰ্ভত বিশদ তথ্যৰ বাবে ই টিভি ভাৰত কাষ চাপিছিল পৰিৱেশ বিজ্ঞানী ডঃ জয়াদিত্য পুৰকায়স্থৰ ৷ কাছ সন্দৰ্ভত অধ্যয়ন, গৱেষণা আৰু সংৰক্ষণৰ পদক্ষেপ গ্ৰহণ কৰি অহা Help Earth ৰ সম্পাদক তথা পৰিৱেশ বিজ্ঞানী ডঃ জয়াদিত্য পুৰকায়স্থৰ সৈতে আছুতীয়া সাক্ষাৎকাৰ গ্ৰহণ কৰা হৈছে ।
কাছৰ বিলুপ্তিৰ কাৰণ: ড৹ জয়াদিত্য পুৰকায়স্থৰ মতে ভাৰতৰ ৰাজ্যসমূহৰ ভিতৰত অসমত কাছৰ সৰ্বাধিক বৈচিত্ৰ্য আছে । সকলো কাছ আৰু কাছৰ প্ৰজাতিৰ আধা বিলুপ্তিৰ ভাবুকিৰ সৈতে, কাছ হৈছে বিশ্বৰ আটাইতকৈ বিপদাপন্ন প্ৰাণীৰ গোটবোৰৰ ভিতৰত অন্যতম ।
তেওঁ কয় যে কাছৰ জনসংখ্যাৰ প্ৰধান ভাবুকিৰ ভিতৰত আছে বাসস্থান হেৰুওৱা, প্ৰাথমিকভাৱে জলাশয় ধ্বংস কৰা, কাছৰ কণীবোৰ আগতীয়াকৈ মানুহে খাদ্য হিচাপে গ্ৰহণ কৰা, উন্নয়নমূলক কাৰ্যকলাপৰ বাবে নদীৰ পাৰত বাসস্থান হেৰুওৱা আদি ।
কাছৰ প্ৰতি নতুন সংকট: ড৹ জয়াদিত্য পুৰকায়স্থই কয়, "অসমত থকা অৱশিষ্ট কাছ বিশেষকৈ মঠ-মন্দিৰৰ পুখুৰীত থকা কাছৰ প্ৰতি নতুন সংকট নামি আহিছে । ৰঙা কাণৰ স্লাইডাৰ (Red eared slider turtle) কাছ আক্ৰমণকাৰী প্ৰজাতিৰ প্ৰৱৰ্তনে অসমত থকা অৱশিষ্ট কাছৰ প্ৰতি সংকট নমাই আনিছে । এইবিধ প্ৰজাতিৰ কাছ বিদেশৰ পৰা অনা । এইবোৰ কাছ ধ্বংসকাৰী । একুৰিয়ামত ৰখা কাছ এইবোৰ । পুখুৰীত এইবোৰ এৰি দিয়া আৰম্ভ কৰিছে । যাৰ বাবে এই কাছই অসমৰ কাছ খায় ধ্বংস কৰা আৰম্ভ কৰিছে । এই কাছৰ সৰবৰাহ আৰু পুখুৰী এৰি দিয়া বন্ধ কৰিব লাগিব । এই কাছ জৈৱ বৈচিত্ৰ্যৰ বাবেও উপযোগী নহয় ।"
কাছৰ পৰিৱেশ তন্ত্ৰলৈ অৰিহণা: পুৰকায়স্থই কয় যে কাছবোৰে পৰিৱেশ তন্ত্ৰৰ ভাৰসাম্য বজাই ৰখাত গুৰুত্বপূৰ্ণ ভূমিকা পালন কৰে ৷ পুষ্টি চক্ৰত অৰিহণা যোগায় আৰু পৰিৱেশৰ স্বাস্থ্যৰ সূচক হিচাপে কাম কৰে । তেওঁলোকৰ জনসংখ্যা সংৰক্ষণ কেৱল জৈৱ বৈচিত্ৰ্য সংৰক্ষণৰ বাবেই নহয়, পৰিৱেশ তন্ত্ৰৰ বহনক্ষমতা নিশ্চিত কৰাৰ বাবেও প্ৰয়োজনীয় ।
মন্দিৰত কাছৰ সংৰক্ষণ: অসমত থকা বিৰল প্ৰজাতিৰ কাছ সংৰক্ষণৰ ক্ষেত্ৰত মঠ মন্দিৰসমূহে গুৰুত্বপূৰ্ণ ভূমিকা লোৱা দেখা যায় । এই ক্ষেত্ৰত পৰিৱেশ বিজ্ঞানী জয়াদিত্য পুৰকায়স্থই কয়, "আমি Help earth নামৰ বেচৰকাৰী সংস্থাৰ জৰিয়তে জৰীপ চলায় 29 টা মন্দিৰ আৰু সমূহীয়া পুখুৰী তালিকাভুক্ত কৰিছো য'ত কাছ আছে । কাছবোৰ ধৰ্মীয় ভিত্তিত সেই পুখুৰীবোৰত সুৰক্ষিত কৰা হৈছে । হিন্দুসকলে কাছবোৰক ভগৱান বিষ্ণুৰ অৱতাৰ-"কুৰ্মা অৱতাৰ" বুলি বিশ্বাস কৰে, সেয়েহে কাছক সন্মান কৰে । কাছবোৰে সাধাৰণতে ভক্তসকলৰ জৰিয়তে এই পুখুৰীবোৰলৈ যায় । এইটো দেখা যায় যে ভক্তসকলে তেওঁলোকৰ পৰিয়ালত এটা শিশুৰ জন্ম হোৱাৰ সময়ত পুখুৰীলৈ কাছ দান কৰে, এই বিশ্বাসৰ সৈতে যে নৱজাতকই কাছৰ দৰে দীৰ্ঘায়ু লাভ কৰে ।"
‘হেল্প আৰ্থ’ ৰ সাধাৰণ সম্পাদক, ড৹ জয়াদিত্য পুৰকায়স্থই কয়, “যিহেতু মন্দিৰলৈ কাছ দান কৰাটো এটা ধৰ্মীয় পৰম্পৰা আছিল, সেয়েহে বহুতো মন্দিৰত কাছবোৰ নিৰাপদে সংৰক্ষিত হৈ আহিছে । এইক্ষেত্ৰত হয়গ্ৰীৱ মাধৱ মন্দিৰ প্ৰথম, ইয়াৰ পিছতে বিশ্বনাথৰ নাগশংকৰ মন্দিৰ আৰু গুৱাহাটীৰ উগ্ৰতাৰা মন্দিৰৰ নাম লব পাৰি, য’ত টা 20 মান প্ৰজাতিৰ কাছ সংৰক্ষিত হৈছে । হয়গ্ৰীৱ মাধৱ মন্দিৰতেই 13-14 টা প্ৰজাতিৰ কাছ আছে । মন্দিৰৰ চৌহদত জীয়াই থকা এই কাছবোৰৰ সংৰক্ষণৰ ক্ষেত্ৰত বহু কাম কৰিবলগীয়া আছে বুলি পুৰকায়স্থই উল্লেখ কৰে ।
মন্দিৰৰ পুখুৰীত থকা কাছৰ প্ৰত্যাহ্বান: তেওঁ কয় যে এই মন্দিৰৰ পুখুৰীবোৰৰ কিছুমান গুৰুত্বপূৰ্ণ ত্ৰুটি আছে । সৌন্দৰ্যবৰ্ধনৰ নামত পুখুৰীটোৰ চাৰিওফাল পকী কৰাৰ ফলত কাছৰ স্বাস্থ্যৰ ওপৰত প্ৰভাৱ পেলাইছে । লগতে কণী দিয়াৰ স্থানৰ অভাৱৰ বাবে প্ৰজনন ব্যৰ্থতাৰ সৃষ্টি কৰিছে ৷ সূৰ্যৰ প্ৰয়োজনীয় পোহৰৰ অভাৱ । কাছবোৰক অ-প্ৰাকৃতিক খাদ্য যেনে ৰুটি, ঘেঁহুৰ লাৰু আদি খুওৱা হয় । যিয়ে কাছৰ স্বাস্থ্যৰ ক্ষতি কৰে ।
কাছ ৰক্ষা কৰা সময়ৰ আহ্বান: হেল্প আৰ্থ’ৰ সাধাৰণ সম্পাদক, ডঃ জয়াদিত্য পুৰকায়স্থই কয় যে কাছক বিলুপ্তিৰ পৰা মানুহে ৰক্ষা কৰিব পাৰিব । সেয়ে মানুহৰ মাজত সজাগতা সৃষ্টি কৰা আৰু স্কুলীয়া পাঠ্যপুথিত বিশদভাৱে কাছৰ বিষয়ে অন্তৰ্গত কৰা উচিত । আকৌ ৰঙা কাণৰ স্লাইডাৰ (Red eared slider turtle) কাছক নিষিদ্ধ কৰা ৷
লগতে পঢ়ক: ডিব্ৰু ছৈখোৱা ৰাষ্ট্ৰীয় উদ্যানৰ কাষৰ বালিচৰত প্ৰকাণ্ড ঘঁৰিয়াল; বলুকা শিল্পৰ নান্দনিক দৃশ্য
