মৰিগাঁও, ১৩ জুন : মঙলবাৰে দিনযোৰা কাৰ্যসূচীৰে জাগীৰোডৰ বহুমুখী প্ৰেক্ষাগৃহত পালন কৰা হয় সীতাজখলাৰ ৬৭ সংখ্যক প্ৰতিষ্ঠা দিৱস ৷ বৃত্তিগত গো-সেৱাৰ শতবৰ্ষৰ দুৱাৰদলিত উপনীত হোৱা তথা মধ্য অসমত দুগ্ধ বিপ্লৱৰ সূচনা কৰিছে সীতাজখলাই ৷
প্ৰতিষ্ঠা দিৱসৰ লগত সংগতি ৰাখি তিৱা স্বায়ত্তপৰিষদৰ প্ৰাক্তন মুখ্য কাৰ্যবাহী সদস্য নাৰায়ণ ৰাডু কাকতিৰ সঞ্চালনাত অনুষ্ঠিত কৰা হয় এক কৃষক সভা । কৃষক সভাত উপস্থিত থাকে মন্ত্ৰী পীযুষ হাজৰীকা ৷ এই সভাতে মন্ত্ৰী হাজৰীকাৰ দ্বাৰা প্ৰদান কৰা হয় সীতাজখলাৰ নন্দলাল উপাধ্যায় ৰাজ্যিক কৃষক বঁটা ২০২৩ আৰু ২০২৪ ৷
লগতে ২০২৩ বৰ্ষৰ নন্দলাল উপাধ্যায় কৃষক বঁটা প্ৰদান কৰা হয় বাক্সা জিলাৰ উত্তৰ আঞ্চলিক জেনেৰেল পাগলাদিয়া ডাং-বান্ধ কমিটিক ৷ আনহাতে ২০২৪ বৰ্ষৰ এই বঁটাৰ প্ৰদান কৰা হয় লখিমপুৰৰ সান্দহখোৱাৰ লফা গাঁও উন্নয়ন সমিতিক ৷
ইয়াৰ উপৰি এইবেলি প্ৰথমবাৰৰ বাবে সীতাজখলা দুগ্ধ উৎপাদক সমবায় সমিতিয়ে কৃষিক বিষয়বস্তু হিচাপে লৈ ৰাজ্যিক ভিত্তিত আয়োজন কৰা হয় প্ৰেম বাহাদুৰ থাপা স্মাৰক চিত্ৰাংকন আৰু বিষ্ণুলাল বজগাই স্মাৰক ৰচনা প্ৰতিযোগিতা ৷ এই প্ৰতিযোগিতাৰ পুৰস্কাৰসমূহো উক্ত সভাতে মন্ত্ৰীগৰাকীয়ে প্ৰদান কৰে ৷ আনহাতে, উক্ত অনুষ্ঠানতে উন্মোচন কৰা হয় সীতাজখলাৰ যাত্ৰা পুথি আৰু সীতাজখলা নামৰ স্মৃতিগ্ৰন্থও ৷
সংবাদ মাধ্যমৰ সৈতে হোৱা এক বাৰ্তালাপত মন্ত্ৰী পীযুষ হাজৰীকাই কয় যে জাগীৰোড আমলিঘাটৰ সীতা জখলাই বাৰ্তা দিয়ে কেনেকৈ কৃষি কৰ্মৰ জৰিয়তে মানুহ স্বাৱলম্বী হ’ব পাৰ । তেওঁ লগতে কয় যে জাগীৰোড সীতা জখলা দুগ্ধ উৎপাদন অনুষ্ঠানটো ১৯২৫ চনত প্ৰতিষ্ঠা হৈছিল আৰু অহা বৰ্ষত এই গৰিমা মণ্ডিত আপোন অনুষ্ঠানটোৱে এশ বৰ্ষত ভৰি থ’ব ।
মঙলবাৰে আয়োজিত এই অনুষ্ঠানত অসম চৰকাৰৰ অসম গৌৰৱ বঁটা প্ৰাপক নাদিৰাম দেউৰী, ভোগা জোনবিল মেলাৰ সম্পাদক তথা সীতা জখলা আদৰণি সমিতিৰ সম্পাদক জুৰচিং বৰদলৈয়েও অংশগ্ৰহ ণ কৰে ৷
লগতে পঢ়ক : নাকেৰে বাঁহীত মধুৰ সুৰ তোলা এজন চহা শিল্পী - Unique flute player
