ডিব্ৰুগড়: উজনি অসমৰ ডিব্ৰুগড়ত অৱস্থিত বগীবিল এতিয়া পৰ্যটকৰ আকৰ্ষণৰ কেন্দ্ৰবিন্দু । এই বগীবিলত নিৰ্মাণ হোৱা বগীবিল দলঙে ইতিমধ্যে সংযোগ কৰিছে ধেমাজি আৰু ডিব্ৰুগড় জিলাক । এই বগীবিল দলং সম্পূৰ্ণ হোৱাৰ পাছতে ধেমাজি-লখিমপুৰ জিলাৰ বাবে যোগাযোগত আমূল পৰিৱৰ্তন ঘটিল । কিয়নো অতীজৰ পৰাই ফেৰীৰ সহায়ত বগীবিল পাৰ হৈ ধেমাজি-লখিমপুৰ জিলাৰ ৰাইজে ডিব্ৰুগড় জিলাৰ সৈতে যোগাযোগ স্থাপন কৰিছিল । যিটো আছিল ৰাইজৰ বাবে ডাঙৰ সমস্যা ।
ৰাইজৰ দীৰ্ঘদিনীয়া সমস্যাৰ অৱসান ঘটাবলৈ ১৯৯৭ চনৰ ২২ জানুৱাৰীত ব্ৰহ্মপুত্ৰৰ উত্তৰ পাৰৰ চিচিবৰগাঁৱৰ কুলাজানত তদানীন্তন প্ৰধানমন্ত্ৰী এইচ ডি দেৱেগৌড়াই বগীবিল দলঙৰ আধাৰশিলা স্থাপন কৰিছিল । ২০০২ চনত সেই সময়ৰ প্ৰধানমন্ত্ৰী অটল বিহাৰী বাজপেয়ীয়ে ব্ৰহ্মপুত্ৰৰ ওপৰত নিৰ্মাণ হোৱা চতুৰ্থখন দলং বগীবিলৰ নিৰ্মাণকাৰ্যৰ শুভাৰম্ভ কৰিছিল । ইয়াৰ পাছতে ৰে'ল আৰু পথ যোগাযোগৰ ব্যৱস্থা থকা বগীবিল দলং নিৰ্মাণৰ কাম সম্পূৰ্ণ হৈছিল ২০১৮ চনত ।
২০১৮ চনত প্ৰধানমন্ত্ৰী নৰেন্দ্ৰ মোদীয়ে আনুষ্ঠানিকভাৱে বগীবিল দলং শুভাৰম্ভ কৰাৰ পাছতেই উজনিৰ ৰাইজৰ এক দীঘলীয়া এক কষ্টকৰ সংগ্ৰামৰ অন্ত পৰিছিল । ইয়াৰ পাছতেই যোগাযোগ ব্যৱস্থা অতি দ্ৰুত কৰিবলৈ ডিব্ৰুগড়ৰ বগীবিলত পুনৰ আন এখন দলং নিৰ্মাণ কৰিবলৈ পৰিকল্পনা কৰিছে ৰাজ্য চৰকাৰে । ১২ হাজাৰ কোটি ব্যয়ৰে নিৰ্মাণ হ'ব ডিব্ৰুগড়-ধেমাজি সংযোগ কৰা বগীবিলৰ দ্বিতীয়খন দলং । ডিব্ৰুগড়ত এই কথা আনুষ্ঠানিকভাৱে জনাই বিধায়ক প্ৰশান্ত ফুকনে ।
বগীবিলৰ দ্বিতীয়খন দলং নিৰ্মাণ প্ৰসংগত বিধায়ক প্ৰশান্ত ফুকন:
এই সন্দৰ্ভত বিধায়ক প্ৰশান্ত ফুকনে কয়,"ডিব্ৰুগড়ৰ চ্যুকাফা ভৱনৰ পৰা বগীবিল দলঙৰ পথছোৱা চাৰিলেনযুক্ত কৰি নিৰ্মাণ কৰা হ'ব । বৰ্তমানৰ পথছোৱাৰ পৰা দুয়োফালে পথ বহলাই চাৰিলেনযুক্ত কৰা হ'ব । ফলত ডিব্ৰুগড়ৰ বগীবিলত বগীবিল দলঙৰ সমান্তৰালকৈ ডিব্ৰুগড়-ধেমাজি সংযোগী আন এখন দলং নিৰ্মাণ হ'ব ।"
তেওঁ লগতে কয়,"১২ হাজাৰ কোটি ব্যয়ৰে নিৰ্মাণ হ'বলগীয়া দলঙৰ কাম প্ৰায় আৰম্ভ হোৱাৰ পথত । পূৰ্বৰ বগীবিল দলঙৰ সমান দৈৰ্ঘৰ নিৰ্মাণ হ'ব যদিও নতুন দলঙত নাথাকে ৰে'লপথ । কেৱল পথ যোগাযোগৰ বাবে নিৰ্মাণ হ'ব । দলংখনৰ নিৰ্মাণ পূৰ্বৰখনৰ তুলনাত ধন কম খৰচ হ'ব ।"
