গুৱাহাটী: স্মাৰ্ট আৰক্ষীয়ে গিজগিজাই থকাৰ পিছতো গুৱাহাটী মহানগৰীত নিতৌ সংঘটিত হৈ আহিছে অপৰাধজনিত ঘটনা । চোৰ-ডকাইতৰ তাণ্ডৱত ত্ৰাহি মধুসুধন দেখিছে মহানগৰবাসীয়ে । ইয়াৰ মাজতেই মহানগৰীত পুনৰ ফুটিল আৰক্ষীৰ গুলী । আৰক্ষীৰ গুলীত আহত হৈছে এটা দুধৰ্ষ ডকাইত ।
দুধৰ্ষ ডকাইত ৰমেশ দৈমাৰী (৩২)ক আৰক্ষীয়ে কৌশলেৰে গ্ৰেপ্তাৰ কৰাৰ পিছত ডকাইতটোক লগত লৈ দিছপুৰ আৰক্ষীয়ে অভিযান চলায় । এই অভিযানৰ সময়তে আৰক্ষীৰ জিম্মাৰ পৰা পলায়নৰ চেষ্টা কৰাত আৰক্ষীৰ গুলীত আহত হয় ধৃত ডকাইতটো । বুধবাৰে পূব গুৱাহাটী আৰক্ষী জিলাৰ উপ-আয়ুক্ত মৃণাল ডেকাই এই বিষয়ে সংবাদ মাধ্যমৰ আগত প্ৰকাশ কৰিছে ।
মহানগৰীৰ ক'ত ফুটিল আৰক্ষীৰ গুলী ?:
কুমাৰীকাটাৰ ৰমেশ দৈমাৰীয়ে ডকাইতি কৰাৰ বাবে মঙলবাৰে গুৱাহাটীলৈ আহিছিল । আৰক্ষীয়ে গোপন সূত্ৰৰ ভিত্তিত এই খবৰ পোৱাৰ পিছতেই গুৱাহাটীৰ এটা গোপন স্থানৰ পৰা গ্ৰেপ্তাৰ কৰাৰ লগতে এখন ডেগাৰ,বাইক আৰু নগদ ধন জব্দ কৰে । তাৰ পিছতেই আন এটা ডকাইতৰ সন্ধান দিব বুলি আজি পুৱতি নিশা যোৰাবাটৰ তেৰ মাইলৰ গাৰোবস্তিতত লৈ যায় । গাৰোবস্তিত আৰক্ষী কনিষ্টবলক ঠেলি পাহাৰৰ পৰা জঁপিয়াই পলাবলৈ চেষ্টা কৰোতে আৰক্ষীয়ে ৰমেশক গুলিওৱাত দুধৰ্ষ ডকাইত ৰমেশৰ সোঁ ভৰিত গুলী লগাত আহত হয় । বৰ্তমান আহত ডকাইতটো জি এম চি এইচত চিকিৎসাধীন হৈ আছে ।
ৰামেশৰ সহযোগী সজল আলীক গ্ৰেপ্তাৰ :
ধৃত ৰমেশৰ বিৰুদ্ধে ৰাজ্যৰ বিভিন্ন স্থানত কেইবাটাও গোচৰ ৰুজু হৈ আছে । মহিলাৰ ডিঙিৰ চেইন চুৰি,গাড়ী চুৰিকে ধৰি কেইবাটাও ডকাইতিৰ ঘটনাত জড়িত হৈ আছে ৰমেশ । বিশেষকৈ মহানগৰীৰ পূব গুৱাহাটী আৰক্ষী জিলাৰ অন্তৰ্গত বিভিন্ন স্থানত সংঘটিত হোৱা মহিলাৰ ডিঙিৰ চেইন কাঢ়ি নিয়া ঘটনাৰ লগত জড়িত । ৰমেশে চেইন কাঢ়ি নিয়া ঘটনাৰ লগত জড়িত থকাৰ চি চি টিভি ফুটেজো আৰক্ষীয়ে লাভ কৰিছে । পূৰ্বেও কেবাবাৰো গ্ৰেপ্তাৰ হৈছে দুধৰ্ষ ডকাইতটো । আনহাতে, আৰক্ষীয়ে অভিযান চলাই আন এক স্থানৰ পৰা ৰামেশৰ সহযোগী সজল আলীক গ্ৰেপ্তাৰ কৰিছে ।
