গুৱাহাটী, ২৪ ছেপ্টেম্বৰ : সৰ্বোচ্চ তাপমাত্ৰাই ৰেকৰ্ড সৃষ্টি কৰাৰ পিছত ৰাজ্যত বতৰ সলনিৰ আগজাননী দিছে গুৱাহাটীত থকা আঞ্চলিক বতৰ বিজ্ঞান কেন্দ্ৰই । আগন্তুক দুদিনৰ বাবে আঞ্চলিক বতৰ বিজ্ঞান কেন্দ্ৰই ৰাজ্যজুৰি অৰেঞ্জ এলাৰ্ট জাৰি কৰিছে ।
আগন্তুক দুদিনত ৰাজ্যত ঠায়ে ঠায়ে প্ৰবলৰ পৰা প্ৰবলতৰ বৰষুণ হ'ব । ঠায়ে ঠায়ে পাতলীয়াৰ পৰা মজলীয়া বৰষুণ হ'ব । লগতে মঙলবাৰে ৰাজ্যৰ কেইবাখনো জিলাত পাতলীয়াৰ পৰা মজলীয়া বৰষুণ হোৱাৰ সম্ভাৱনা ব্যক্ত কৰিছে । আঞ্চলিক বতৰ বিজ্ঞান কেন্দ্ৰৰ তথ্য মতে, মঙলবাৰে কামৰূপ মহানগৰ জিলাৰ লগতে তিনিচুকীয়া, ডিব্ৰুগড়, হোজাই আৰু ধেমাজি জিলাত ৭.৬ মিলিমিটাৰৰ পৰা ৩৫ মিলিমিটাৰলৈ বৰষুণ হোৱাৰ সম্ভাৱনা আছে ।
গুৱাহাটীত বুধবাৰৰ পৰা সৰ্বোচ্চ তাপমাত্ৰা হ্ৰাস হ'ব
আনহাতে, গুৱাহাটী মহানগৰীত বুধবাৰৰ পৰা সৰ্বোচ্চ তাপমাত্ৰা হ্ৰাস হ'ব । আঞ্চলিক বতৰ বিজ্ঞান কেন্দ্ৰৰ তথ্য মতে, মঙলবাৰে গুৱাহাটীৰ সৰ্বোচ্চ তাপমাত্ৰা ৩৫ ডিগ্ৰী চেলচিয়াছ ৰেকৰ্ড কৰা হৈছে । ইফালে বুধবাৰে গুৱাহাটীৰ সৰ্বোচ্চ তাপমাত্ৰা ৩২ ডিগ্ৰী চেলচিয়াছ আৰু অহা ৩০ ছেপ্টেম্বৰলৈকে গুৱাহাটীৰ সৰ্বোচ্চ তাপমাত্ৰা ৩০ ডিগ্ৰী চেলচিয়াছ থাকিব ।
এই সন্দৰ্ভত আঞ্চলিক বতৰ বিজ্ঞান কেন্দ্ৰৰ জ্যেষ্ঠ বিজ্ঞানী সঞ্জয় ওনিল শ্ব'ৱে কয়, "এই সময়ছোৱাত বতৰ সলনিৰ দক্ষিণৰ পৰা আহিবলগীয়া বতাহৰ চাপ ক্ৰমাৎ বৃদ্ধি হৈছে । এই সময়ছোৱাত ৰাজস্থান হৈ পশ্চিমবংগৰ মাজেৰে দক্ষিণ দিশৰ পৰা এই বতাহৰ চাপ অসমত বৃদ্ধি পাব লাগিছিল, কিন্তু অহা নাছিল । দক্ষিণ-পশ্চিমৰ পৰা অহা বতাহত আৰ্দ্ৰতা আছে । দক্ষিণৰ পৰা আহিবলগীয়া বতাহৰ চাপ ক্ৰমাৎ বৃদ্ধিয়ে বৰষুণৰ পৰিমাণ বৃদ্ধি কৰিব ।"
ৰাজ্যত বৰষুণৰ পৰিমাণ হ্ৰাস
উল্লেখ্য যে বতৰ বিজ্ঞান কেন্দ্ৰৰ পৰা লাভ কৰা তথ্য অনুসৰি, বিগত ১ জুনৰ পৰা (বর্ষাকাল আৰম্ভ হোৱা সময়ৰ পৰা) মঙলবাৰলৈকে ৰাজ্যৰ ১২ খন জিলাত কমকৈ বৰষুণ হৈছে । উক্ত জিলাকেইখন হৈছে বঙাইগাঁও (-৩৬ শতাংশ), চিৰাং (-৪২ শতাংশ), দৰং (-৬০ শতাংশ), ধেমাজি (-৩৪ শতাংশ), ডিমা হাছাও (২৩ শতাংশ), গোৱালপাৰা (-৩৮ শতাংশ), কামৰূপ (-৪১ শতাংশ), কার্বি আংলং (-২৩ শতাংশ), লখিমপুৰ (-২৭ শতাংশ), নগাঁও (-৩৮ শতাংশ), শোণিতপুৰ (-৩০ শতাংশ) আৰু ওদালগুৰি (-২৭ শতাংশ) ।
বাকীকেইখন জিলাতো বৰষুণ কম পৰিমাণে হৈছে যদিও ‘-১৯ 'শতাংশলৈ বতৰ বিজ্ঞানে স্বাভাৱিক বৰষুণ হোৱা বুলিয়েই হিচাপ কৰে ।
