বকো,২৬ জুন: অসমৰ বাবে এক যুগান্তকাৰী পদক্ষেপ হিচাপে ভাৰত চৰকাৰৰ নৰ্থ-ইষ্ট চেণ্টাৰ ফৰ টেকন’লজি এপ্লিকেচন এণ্ড ৰিচ (নেক্টাৰ) এ বকোৰ জৱাহৰলাল নেহৰু কলেজৰ সৈতে অংশীদাৰিত্বৰে মহাবিদ্যালয়খনত স্থাপন কৰে ৰিম’ট পাইলট ট্ৰেইনিং অৰ্গেনাইজেশ্যন (আৰ পি টি অ’) । অসমত মহাবিদ্যালয় পৰ্যায়ত প্ৰথমবাৰৰ বাবে ড্ৰ’নৰ প্ৰশিক্ষণ প্ৰদান কৰা হ'ব । যোৱা ২৫ জুনত উদ্বোধন কৰা এই কেন্দ্ৰটোৰ লক্ষ্য হৈছে উত্তৰ-পূব ভাৰতৰ বিশেষকৈ অসমৰ নিবনুৱা সমস্যা সমাধান কৰি একবিংশ শতিকাৰ দক্ষতাৰে সজ্জিত কৰা ।
বকোস্থিত জে এন কলেজৰ অধ্যক্ষ ড৹ তপন দত্তই মহাবিদ্যালয় আৰু ৰাজ্যৰ বাবে এই উন্নয়নৰ তাৎপৰ্যৰ ওপৰত আলোকপাত কৰি আৰ পি টি অ’ মুকলি কৰাত গৌৰৱ প্ৰকাশ কৰে । তেওঁ উল্লেখ কৰে যে এই কাৰ্যসূচী অসামৰিক বিমান পৰিবহণ সঞ্চালকালয়ৰ পৰা অনুমোদন লাভ কৰি নেক্টাৰৰ সহযোগত আনুষ্ঠানিকভাৱে আৰম্ভ কৰিছে । উদ্বোধনী বেটচত মেঘালয়, ত্ৰিপুৰা, অৰুণাচল প্ৰদেশ, নাগালেণ্ড, আৰু অসমৰ দহগৰাকী মহিলাই কেন্দ্ৰীয় চৰকাৰৰ 'ড্ৰ'ন ডিডি' আঁচনিৰ অধীনত বিনামূলীয়াকৈ প্ৰশিক্ষণ লাভ কৰিব ।
এই প্ৰশিক্ষাৰ্থীসকলক নিজা নিজা ৰাজ্য চৰকাৰে মনোনীত কৰে । নেক্টাৰৰ সঞ্চালক প্ৰধান ড৹ অৰুণ কুমাৰ শৰ্মাই এই পদক্ষেপৰ গুৰুত্ব আৰোপ কৰি গাঁও পৰ্যায়ত ড্ৰ’ন ব্যৱহাৰক প্ৰসাৰিত কৰাৰ লগতে কৃষি, প্ৰতিৰক্ষা, আৰু সংবাদ মাধ্যমটো প্ৰয়োজনীয়তাৰ বিষয়ে উল্লেখ কৰে । ড৹ শৰ্মাই ভাৰতত ড্ৰ’ন পাইলটৰ উল্লেখযোগ্য চাহিদাৰ কথাও আঙুলিয়াই দিয়ে । বৰ্তমানৰ ১০-২০ হাজাৰৰ তুলনাত দেশখনত এক লাখৰো অধিক ড্ৰ’ন পাইলটৰ প্ৰয়োজন ।
