গুৱাহাটী, 21 জুলাই: অৱশেষত নিযুক্তি দিয়া হ’ল ভাৰতীয় জনতা যুৱ মৰ্চাৰ নতুন ৰাজ্যিক সভাপতি ৷ ৰাকেশ দাসক বিজেপি যুৱ মৰ্চাৰ ৰাজ্যিক সভাপতি হিচাপে নিযুক্তি দিয়া হয় ৷ পূৰ্বে অখিল ভাৰতীয় বিদ্যাৰ্থী পৰিষদৰ ৰাষ্ট্ৰীয় আৰু ৰাজ্যিক সম্পাদকৰ দায়িত্বত আছিল ৰাকেশ দাস ৷
দেওবাৰে বিজেপিৰ ৰাজ্যিক সভাপতি ভৱেশ কলিতাই ৰাকেশ দাসক ভাৰতীয় জনতা যুৱ মৰ্চাৰ ৰাজ্যিক সভাপতি হিচাপে নিযুক্তি দিয়ে ৷ সিদ্ধাংকু অংকুৰ বৰুৱাৰ ঠাইত সভাপতি হিচাপে দায়িত্ব দিয়া হৈছে ৰাকেশ দাসক ৷
উল্লেখ্য যে, ভাৰতীয় জনতা যুৱ মৰ্চাৰ ৰাজ্যিক সভাপতিৰ দায়িত্ব কাক দিব তাক লৈ ব্যাপক চৰ্চা চলি থকাৰ সময়তে এই ঘোষণা কৰা হয় ৷ এই চৰ্চাত অৱশ্যে কেইবাজনৰো নাম সন্নিৱিষ্ট আছিল ৷ ইয়াৰ ভিতৰত ৰাকেশ দাসৰ নামটোও চৰ্চাত আছিল ৷ অৱশেষত সকলো জল্পনা-কল্পনাৰ অন্ত পেলাই নিযুক্তি দিয়া হয় ৰাকেশ দাসক ৷
আনহাতে, সভাপতিৰ পদ লাভ কৰাৰ পিছতে পোনে পোনে প্ৰথমবাৰৰ বাবে বশিষ্ঠস্থিত ভাৰতীয় জনতা পাৰ্টীৰ অসমৰ মুখ্য কাৰ্যালয়ত উপস্থিত হয় ৰাকেশ দাস ৷ কাৰ্যালয়ত সংবাদ মাধ্যমৰ আগত প্ৰতিক্ৰিয়া প্ৰকাশ কৰি ৰাকেশ দাসে কয় যে, মই পোনপ্ৰথমে ৰাষ্ট্ৰীয় সভাপতি জে পি নাড্ডা, ভৱেশ কলিতা, প্ৰধানমন্ত্ৰী মোদী, মুখ্যমন্ত্ৰী ড৹ হিমন্ত বিশ্ব শৰ্মাৰ লগতে সকলো জ্যেষ্ঠক ধন্যবাদ জ্ঞাপন কৰিছো ৷ মোৰ ওপৰত বিশ্বাস ৰাখি এই গধুৰ দায়িত্ব প্ৰদান কৰাৰ বাবে ৷ যিটো আদৰ্শৰে বিগত দহ বছৰে মই ছাত্ৰ সমাজৰ মাজত কাম কৰি আহিছোঁ, সেই আদৰ্শৰে পুনৰ যুৱ প্ৰজন্মৰ বাবে কাম কৰি যাম ৷
সমান্তৰালকৈ দাসে কয় যে, সিদ্ধাংকু অংকুৰ বৰুৱাৰ সৈতে তেওঁৰ সম্পৰ্ক জ্যেষ্ঠ ভাতৃৰ লেখীয়া ৷ বৰুৱাই যুৱ মৰ্চাক যুৱ নেতৃত্বৰ মাজলৈ নিয়াৰ ক্ষেত্ৰত অগ্ৰণী ভূমিকা গ্ৰহণ কৰিছে ৷ সিদ্ধাংকু অংকুৰ বৰুৱা ৰাকেশ দাসৰ ৰাজনৈতিক প্ৰতিদ্বন্দ্বী বুলি কোৱাৰ ক্ষেত্ৰত ৰাকেশ দাসে কয় যে, এয়া সকলো সংবাদ মাধ্যমে নিজাববীয়াকৈ প্ৰকাশ কৰা খবৰ । তেওঁ মোৰ পুৰণি চিনাকী তথা একে আদৰ্শৰ মানুহ ৷ দিনটোৰ ২৪ ঘণ্টাৰ ২২ ঘণ্টা সংগঠনক দিয়াৰ ক্ষেত্ৰত পৰৱৰ্তী সময়ত যুৱ মৰ্চাৰ নৱনিযুক্ত সভাপতিগৰাকী দায়বদ্ধ থাকিব বুলি প্ৰতিশ্ৰুতি প্ৰদান কৰি প্ৰয়োজনত ৰাজনীতিৰ ঊৰ্ধত থাকি কাম কৰি যোৱাৰ প্ৰতিশ্ৰুতি প্ৰদান কৰে ৷
লগতে পঢ়ক: ভাৰতীয় জনতা যুৱ মৰ্চাৰ নতুন ৰাজ্যিক সভাপতি ৰাকেশ দাস - BJYM Assam
