লখিমপুৰ, ২১ আগষ্ট: উৰণ সেতু নিৰ্মাণৰ দাবীত বুধবাৰে উত্তাল হৈ পৰে লখিমপুৰৰ নকাৰী ৷ লখিমপুৰ নগৰ এলেকাৰ নকাৰীস্থিত ৰে’লৱে ক্ৰচিঙত প্ৰস্তাৱিত উৰণ সেতু নিৰ্মাণৰ কাম শীঘ্ৰে আৰম্ভ কৰাৰ দাবীত উত্তাল হৈ পৰিল সমগ্ৰ অঞ্চল ৷ নকাৰীত উৰণ সেতু নিৰ্মাণৰ কাম শীঘ্ৰে আৰম্ভ কৰাৰ দাবীত ৰাজপথলৈ ওলাই আহিল অঞ্চলটোৰ শতাধিক লোক ।
উল্লেখ্য যে, লখিমপুৰ নগৰ এলেকাৰ নকাৰীত থকা ৰে’লৱে ক্ৰচিঙত এখন উৰণ সেতু নিৰ্মাণৰ বাবে ইতিমধ্যে চৰকাৰীভাৱে প্ৰস্তুতি কৰা হৈছে । কিন্তু উৰণ সেতুখন নিৰ্মাণৰ কাম অতি লেহেমীয়া হোৱাৰ অভিযোগ তুলি আজি অঞ্চলটোৰ শ শ লোক পুৱা ৰে’লৱে ক্ৰচিঙৰ সমুখলৈ ওলাই আহি উত্তাল প্ৰতিবাদ সাব্যস্ত কৰে ৷ প্ৰতিবাদকাৰী স্থানীয় ৰাইজে অতি সোনকালে উৰণ সেতুখনৰ নিৰ্মাণ কৰিবলৈ চৰকাৰ তথা স্থানীয় বিধায়ক মানৱ ডেকাক দাবী জনায় ৷
ৰাইজে লগতে উৰণ সেতুখন নিৰ্মাণত পলম হ’লে পথ বন্ধৰ দৰে প্ৰতিবাদী কাৰ্যসূচী গ্ৰহণ কৰাৰো হুংকাৰ দিয়ে ৷ উল্লেখ্য যে, লখিমপুৰ নগৰৰ পৰা চাবতি সংযোগী পথত নকাৰীত আছে এই ৰে’লৱে ক্ৰচিংটো । এই পথটোৱে লীলাবাৰী বিমান বন্দৰ, লখিমপুৰ মেডিকেল কলেজ, সেনা শিবিৰ, আৰক্ষী বেটেলিয়নৰ শিবিৰ আদি বহু গুৰুত্বপূৰ্ণ অনুষ্ঠান-প্ৰতিষ্ঠানক সংযোগ কৰিছে ।
অতি গুৰুত্বপূৰ্ণ এই পথটোত ৰে’লৱে ক্ৰচিঙত গেট বন্ধ থকাৰ বাবে ভীষণ সমস্যা সৃষ্টি হয় । বিশেষকৈ মেডিকেল কলেজলৈ নিয়া ৰোগীসকলৰ ক্ষেত্রত স্থানীয় লোক অবৰ্ণনীয় অৱস্থাৰ সন্মুখীন হয় । সেয়ে দীর্ঘদিন ধৰি এই ৰে’লৱে ক্ৰচিঙত এখন উৰণ সেতু নিৰ্মাণৰ বাবে ৰাইজে দাবী জনাই আহিছে ।
লগতে পঢ়ক: উচ্ছেদৰ বিৰুদ্ধে মাৰ্ঘেৰিটাৰ ক'ল ইণ্ডিয়াৰ মুখ্য কাৰ্যালয়ত গোৰ্খা ছাত্ৰ সন্থাৰ প্ৰতিবাদ - Coal India
