মৰাণ, ২৫ আগষ্ট: ৰাজ্যত বিদ্যুৎ বিভাগৰ বিৰুদ্ধে তীব্ৰ প্ৰতিবাদ আৰম্ভ হৈছে । স্মাৰ্ট মিটাৰৰ নামত সাধাৰণ ৰাইজক লুণ্ঠন,বিদ্যুতৰ মাচুল বৃদ্ধি আদিৰ বিৰুদ্ধে বিভিন্ন জিলাত একাংশ দল-সংগঠন আৰু ৰাইজে প্ৰতিবাদ সাব্যস্ত কৰিছে । কিয়নো স্মাৰ্ট মিটাৰ ব্যৱহাৰ কৰা পাছতে ৰাইজে অধিক মাচুল ভৰিব লগা হৈছে । ফলত সাধাৰণ ৰাইজৰ মাজত হাহাকাৰ পৰিস্থিতিৰ সৃষ্টি হৈছে । চৰকাৰে বলপূৰ্বকভাৱে জাপি দিয়া স্মাৰ্ট মিটাৰৰ বিৰুদ্ধে ডিব্ৰুগড়ৰ খোৱাঙত ৰাজপথলৈ ওলাই আহিল মহিলা ৷
স্মাৰ্ট মিটাৰ বৰ্জনৰ সিদ্ধান্ত :
স্মাৰ্ট মিটাৰে ৰাজ্যৰ সৰ্ব্বসাধাৰণ ৰাইজক জলা-কলা খুওৱাৰ সময়তে ইয়াৰ বিৰুদ্ধে প্ৰতিবাদমুখৰ হৈ পৰিছে ৰাইজ ৷ খোৱাঙত পাঁচখন গাঁৱৰ মহিলাই স্মাৰ্ট মিটাৰ বৰ্জন কৰাৰ সিদ্ধান্ত গ্ৰহণ কৰিছে ৷ খোৱাং চমুৱা গাঁও, নিজখোৱাং, আঠাবাৰী, খোৱাং সোণোৱাল বঙালী গাঁৱকে ধৰি পাঁচখন গাঁৱৰ মহিলাই আজি এখন সভা অনুষ্ঠিত কৰি স্মাৰ্ট মিটাৰৰ বিৰুদ্ধে সৰৱ হৈ পৰে ৷ মহিলাসকলে যিসমূহ গৃহত এতিয়ালৈকে স্মাৰ্ট মিটাৰ লগালে সেইসমূহ খুলি নিবলৈ দাবী জনাইছে । লগতে যিসকল লোকৰ ঘৰত স্মাৰ্ট মিটাৰ লগোৱা নাই সেইসকল লোকৰ ঘৰত স্মাৰ্ট মিটাৰ বহুৱাবলৈ দিয়া নহ'ব বুলি স্পষ্ট কৰি দিছে ৷
মুখ্যমন্ত্ৰীক স্মাৰ্ট মিটাৰ আঁতৰ কৰিবলৈও আহ্বান :
উক্ত প্ৰতিবাদী কাৰ্যসূচীত অংশগ্ৰহণ কৰা এগৰাকী মহিলাই কয়, "দিন হাজিৰা কৰি মাহে বিদ্যুৰ ২০০ টকা বিল দিবলৈ অসুবিধা, স্মাৰ্ট মিটাৰৰ বিল দিম কেনেকৈ ?" দুখীয়াক সহায় কৰা চৰকাৰ বুলি কোৱা মুখ্যমন্ত্ৰীগৰাকীক স্মাৰ্ট মিটাৰ বাতিল কৰিবলৈও আহ্বান জনাই প্ৰতিবাদী মহিলাসকলে ৷
