জোনাই, 6 আগষ্ট: উন্নয়নৰ ঢাক-ঢোল বজোৱা বিজেপি নেতৃত্বাধীন মিত্ৰজোঁটৰ চৰকাৰখনৰ উন্নয়নৰ ফোঁপোলা স্বৰূপ উদঙাই দিছে বিজেপি বিধায়ক ভূৱন পেগুৰ গৃহ সমষ্টিৰ এটা পথে ৷ স্থানীয় বিধায়কৰ চৰম অৱহেলাৰ বাবেই এতিয়া নৰক যন্ত্ৰণা ভোগ কৰিবলগীয়া হৈছে জোনাই বিধানসভা সমষ্টিৰ অন্তৰ্গত ৰাইজে । নিৰ্মাণৰ অভাৱত জহি-খহি বিধ্বস্ত হৈ পৰিছে জোনাই বিধানসভা সমষ্টিৰ অন্তৰ্গত মূল পথছোৱা । জোনাই গাঁও পঞ্চায়তৰ বগীনদী গেজেৰা গাঁৱৰ পথটোৰ নাজল-নাথল অৱস্থাই প্ৰাত্যহিক জীৱন যাত্ৰা সুচাৰুৰূপে পৰিচালনা কৰাত সমস্যাত পেলাইছে জোনাই সমষ্টিবাসীক ৷
জোনাই বিধানসভা সমষ্টিৰ অন্তৰ্গত এই পথটো দেখিলেই ৰাজ্যৰ গাঁৱে-ভূঞে ৰাস্তা-ঘাটৰ কিমান উন্নয়ন হৈছে সেয়া স্পষ্ট হৈ পৰে ৷ স্থানীয় বিজেপি বিধায়কৰ গুৰুত্বহীনতাৰ বাবেই আজিও এক কদৰ্যময় পথেৰে যাতায়াত অব্যাহত ৰাখিবলৈ বাধ্য হৈ পৰিছে ভুক্তভোগী গঞা ৰাইজ । লোকনিৰ্মাণ বিভাগৰ পথ সংযোগী বগীনদী, গেজেৰা, অকলেণ্ড, মাজগাঁও আদিকে ধৰি প্ৰায় দুই-তিনি কিলোমিটাৰ নাজল-নাথল পথেৰে বিভিন্ন ৰোগী, ছাত্ৰ-ছাত্ৰীৰ লগতে বিভিন্ন লোকে প্ৰতিদিনে যাতায়াত কৰিবলৈ বাধ্য ।
স্থানীয় লোকে এই সন্দৰ্ভত আক্ষেপ প্ৰকাশ কৰি জনায়, "ব’হাগ মাহৰ পৰা আহিন-কাতি মাহ পৰ্যন্ত এই পথটো এনেদৰেই থাকে ৷ বিদ্যালয়লৈ শিক্ষাৰ্থী অহা-যোৱাৰ ক্ষেত্ৰত সমস্যাই দেখা দিয়ে ৷ ৰোগীক হাস্পতাললৈ লৈ যোৱাৰ ক্ষেত্ৰতো বহু অসুবিধা হয় ৷ ভূৱন পেগু নিৰ্বাচনৰ সময়ত আহে যদিও পিচত কোনো খবৰ নাথাকে ৷ আমি কেবাবাৰো তেখেতক সাক্ষাৎ কৰি পথছোৱা উন্নীতকৰণৰ বাবে অনুৰোধ জনাইছিলো যদিও আজি পৰ্যন্ত কোনো গুৰুত্ব নিদিলে ৷ হ’ব বুলি প্ৰতিশ্ৰুতি দিয়ে যদিও কাৰ্যতঃ একোৱেই নহয় ৷"
