গোলাঘাট, 17 জুলাই: গোলাঘাট জিলাৰ মাজেৰে দৈনিক অব্যাহত আছে বিলাতী সুৰাৰ অবৈধ সৰবৰাহ । আৰক্ষী আৰু আবকাৰী বিভাগৰ চকুত ধূলি দি এটা শক্তিশালী চক্ৰই নিতৌ নাগালেণ্ডলৈ ট্ৰাকে ট্ৰাকে অবৈধ বিলাতী সুৰাৰ সৰবৰাহ চলাই আহিছে । গোপন সূত্ৰৰ খবৰৰ ভিত্তিত গোলাঘাট আৰক্ষীৰ এটা দলে অভিযান চলাই আঠখেলীয়াৰ বৰ কছাৰীত জব্দ কৰিবলৈ সক্ষম হয় বিলাতী সুৰাভৰ্তি এখন ট্ৰাক । জব্দ কৰা বিলাতী সুৰাখিনিৰ মূল্য প্ৰায় পঞ্চাশ লক্ষাধিক টকাৰ হ'ব বুলি আৰক্ষীয়ে অনুমান কৰিছে ।
যোৰহাটৰ মাজেৰে কাষৰীয়া ৰাজ্য নাগালেণ্ড অভিমুখে কঢ়িওৱাৰ সন্দেহ প্ৰকাশ কৰিছে আৰক্ষীয়ে । জব্দ কৰা ট্ৰাকখনৰ পঞ্জীয়ন নম্বৰ AS 03 BC 7030 । সুৰা সৰবৰাহৰ ঘটনাত জড়িত চালকসহ সাতজন লোকক আৰক্ষীয়ে গ্ৰেপ্তাৰ কৰিছে । ঘটনা সন্দৰ্ভত মেৰাপানী আৰক্ষী, ঘিলাধাৰী আৰক্ষী আৰু ফৰকাটিং আবকাৰী বিভাগে তদন্ত অব্যাহত ৰাখিছে ।
উল্লেখযোগ্য যে, গোলাঘাট জিলাৰ মেৰাপানী সীমান্তৰ মাজেৰে বিভিন্ন সময়ত একাংশ অসাধু ব্যাৱসায়ীয়ে অবৈধভাৱে বিভিন্ন ধৰণৰ সামগ্ৰী সৰহবৰাহ কৰি আহিছে বুলি অভিযোগ উত্থাপিত হৈ আহিছে । গোলাঘাট আৰক্ষীয়ে এই অবৈধ সামগ্ৰীৰ সৰবৰাহৰ বিৰুদ্ধে কঠোৰ ব্যৱস্থা গ্ৰহণ কৰি আহিছে যদিও পুনৰ ন ন কৌশল অৱলম্বন কৰি দুষ্ট চক্ৰই অব্যাহত কৰিছে অবৈধ সামগ্ৰীৰ সৰবৰাহ ।
এক নিৰ্ভৰযোগ্য সূত্ৰই জানিবলৈ দিয়া মতে অসম-নাগালেণ্ড সীমান্তৰ একাংশ সৰু সৰু পথেৰে এই অবৈধ সামগ্ৰীৰ সৰহবৰাহ কৰি আহিছে একাংশ দুষ্ট চক্ৰই । স্মৰ্তব্য যে, কিছুদিন পূৰ্বে মেৰাপানী আৰক্ষীয়ে নাগালেণ্ডলৈ অবৈধভাবে সৰহবৰাহ কৰিবলৈ চেষ্টা চলাওঁতেই এখন অৰুণাচলী সুৰা ভৰ্তি ট্ৰাক জব্দ কৰিবলৈ সক্ষম হৈছিল ।
