গুৱাহাটী/বিশ্বনাথ/ৰঙিয়া: অপৰাধৰ বিৰুদ্ধে আৰক্ষীয়ে ৰাজ্যৰ ভিন্ন প্ৰান্তত অভিযান অব্যাহত ৰখাৰ পিচতো অপৰাধী পিচ হোঁহকা নাই ৷ ভিন্ন স্থানত ড্ৰাগছ, জুৱা, নাৰীদেহৰ ব্যৱসায় আদি এতিয়াও অব্যাহত আছে ৷
শনিবাৰেও আৰক্ষীয়ে ৰাজ্যৰ ভিন্নপ্ৰান্তত অপৰাধজনিত ঘটনাৰ বিৰুদ্ধে অভিযান চলাই কেবাটাও অপৰাধীক গ্ৰেপ্তাৰ কৰাৰ লগতে জব্ধ কৰে নিচাজাতীয় সামগ্ৰী ৷ শনিবাৰৰ দিনটোত মহানগৰীৰৰ উপৰিও বিশ্বনাথ আৰু ৰঙিয়াত চলা অপৰাধবিৰোধী অভিযানত আৰক্ষীয়ে মুঠ 9 টা অপৰাধীক গ্ৰেপ্তাৰ কৰে ৷
- " class="align-text-top noRightClick twitterSection" data="">
মহানগৰীৰ বেহাৰবাৰীত এছ টি এফ ৰ অভিযানত দুটাকৈ ড্ৰাগছ সৰবৰাহকাৰী গ্ৰেপ্তাৰ কৰা হয় । সৰবৰাহকাৰী দুটা মানকাচৰৰ আছাদ আলী আৰু জিয়াউৰ ৰহমান । সৰবৰাহকাৰী দুটাৰ পৰা ২০ টা হেৰ’ইনভৰ্তি চাবোনৰ বাকচ জব্দ কৰা হয় । শনিবাৰে দিনৰ ভাগত বেহাৰবাৰীত কামৰূপ জিলাৰ অতিৰিক্ত আৰক্ষী অধীক্ষক কল্যাণ পাঠকৰ নেতৃত্বত যোৱা STF ৰ এটা দলটোৱে ড্ৰাগছ সৰৰাহকাৰীক গ্ৰেপ্তাৰ কৰিবলৈ সক্ষম হয় । ড্ৰাগছভৰ্তি চাবোনৰ বাকচকেইটাৰ লগতে নগদ ধনো জব্দ কৰে ।
ইফালে চতিয়া আৰক্ষীয়েও শনিবাৰে গ্ৰেপ্তাৰ কৰে দুটা ড্ৰাগছ পেডলাৰক ৷ শোণিতপুৰৰ ওঠৰমাইলৰ পৰা ড্ৰাগছখিনি বিশ্বনাথ চাৰিআলিলৈ সৰবৰাহ কৰাৰ সময়তে চতিয়াত ১১ টা কণ্টেইনাৰসহ দুই পেডলাৰ গ্ৰেপ্তাৰ কৰা হয় ৷ ধৃত পেডলাৰ দুটাৰ নাম চাইফুল হক আৰু চাইফুল ইছলাম ৷ দুয়োৰে ঘৰ চতিয়াৰ পলশণিত বুলি জানিব পৰা গৈছে ৷ আৰক্ষীয়ে লগতে দুই পেডলাৰৰ পৰা জব্দ কৰিছে AS 12 AG 1613 নম্বৰৰ এখন পালছাৰ বাইক ৷
ইপিনে ৰঙিয়াত আৰক্ষীৰ জালত পৰিল ৫ জুৱাৰী ৷ ৰঙিয়া আৰক্ষী থানাৰ অন্তৰ্গত বিহদিয়া খণ্ড উন্নয়ন কাৰ্যালয়ৰ পিছপালৰ পৰা গ্ৰেপ্তাৰ কৰা হয় ৫ জুৱাৰীক ৷ ধৃত পাঁচ জুৱাৰী ক্ৰমে টংকেশ্বৰ বড়ো, বাবৰ আলী, গোপাল দাস, উদয় দাস আৰু আৰমান আলী ৷ আৰক্ষীয়ে জুৱাৰী কেইটাৰ পৰা জুৱা খেলৰ সামগ্ৰীৰ লগতে নগদ ধনো জব্দ কৰে ।
লগতে পঢ়ক: ড্ৰাগছৰ ঘাটিলৈ পৰিণত মৰিয়নী-তিতাবৰ ! ড্ৰাগছসহ আটক দুই
