জোনাই,২৬ এপ্ৰিল: অৰুণাচল প্ৰদেশৰ নামনি দিবাং উপত্যকা সংযোগী চাৰিলেনযুক্ত পথত বিচ্ছিন্ন হৈছে যোগাযোগ ব্যৱস্থা । বুধবাৰে বিয়লি হোৱা প্ৰচণ্ড বৰষুণ আৰু ভূমিস্খলনৰ ফলতেই চীনৰ সীমান্তৱৰ্তী জিলা দিবাং উপত্যকাৰ সৈতে এই পথছোৱাৰ সংযোগ বিঘ্নিত হৈছে ।
যোৱা কেইদিনমানৰ পৰা হোৱা নেৰানেপেৰা বৰষুণৰ ফলতে জিলাখনত বুধবাৰে ৰাষ্ট্ৰীয় ঘাইপথ-৩১৩ ত হুনলী আৰু আনিনিৰ মাজত প্ৰচণ্ড ভূমিস্খলন হয় ৷ এই কথা সদৰী কৰিছিল বিভাগীয় কৰ্তৃপক্ষই ৷ প্ৰাথমিক তথ্য অনুসৰি, দিবাং উপত্যকা জিলাক ভাৰতৰ বাকী অংশৰ সৈতে সংযোগ কৰা ঘাইপথটোৰ হুনলী আৰু আনিনিৰ মাজৰ অংশত ব্যাপক ক্ষতিসাধন হয় ।
দিবাং উপত্যকা প্ৰশাসনে জনোৱা মতে, এই ঘাইপথছোৱা পুনৰুদ্ধাৰৰ বাবে কমেও তিনিদিন সময়ৰ প্ৰয়োজন হ’ব ৷ লগতে প্ৰশাসনৰ তৰফৰ পৰা স্থানীয় লোকসকলক ভূমিস্খলন হোৱা অঞ্চল বা কাষৰীয়া জলশয়সমূহত মাছ মৰাৰ পৰা বিৰত থাকিবলৈ অনুৰোধ জনায় । লগতে প্ৰশাসনৰ তৰফৰ পৰা বাৰিষাৰ সময়চোৱাত নিশা ভ্ৰমণ আৰু মাটি নাকাটিবলৈয়ো সকীয়াই দিয়ে ।
ইফালে এই ভূমিস্খলনৰ ফলত হাহাকাৰ পৰিস্থিতিৰ সন্মুখীন হৈছে স্থানীয় ৰাইজ । খাদ্য সামগ্ৰী যোগানত ব্যাঘাত জন্মাৰ উপৰিও খোৱাপানীৰ সমস্যাই দেখা দিছে অঞ্চলসমূহত । পথছোৱা পুনৰ নিৰ্মাণ নকৰালৈকে এই সমস্যাৰ সন্মুখীন হৈ থাকিব লাগিব বুলি উল্লেখ কৰে দুয়োপাৰৰ ৰাইজে ।
উল্লেখ্য যে, উক্ত পথচোৱা বিগত ২০১৫ চনৰ মাৰ্চ মাহৰ মুকলি কৰা হৈছিল ৷ চাৰিলেনযুক্ত এই পথটো পাঁচ বছৰৰ মূৰত সম্পূৰ্ণ কৰিছিল সীমান্ত পথ সুৰক্ষা বাহিনীয়ে । বৰ্তমান এই পথছোৱা বিধ্বস্ত হৈ পৰাত স্থানীয় লোকৰ বাবে খাদ্য সামগ্ৰীৰ লগতে অন্যান্য অত্যাৱশ্যকীয় সামগ্ৰী কঢ়িয়াই অনাত বাধাৰ সৃষ্টি হৈছে ৷ আনহাতে পৰ্যটনৰ বাবে যোৱা লোকসকলেও সমস্যাৰ সন্মুখীন হ’ব লগা হৈছে ।
লগতে পঢ়ক: অৰুণাচল চীন সীমান্তত ভূমিস্খলন; জাহ গ’ল ৰাষ্ট্ৰীয় ঘাইপথ - Massive Landslide In Arunachal
