মৰাণ, ২৫ জুন : ৰাজ্যত পিটপিটাই ফুৰিছে ড্ৰাগছ বেপাৰী ৷ চুবুৰীয়া মণিপুৰ, নাগালেণ্ড, ত্ৰিপুৰাৰ ড্ৰাগছ বেপাৰীয়ে ছানি ধৰি ৰাজ্য । বিভিন্ন কৌশলেৰে চলাই আছে এই বেহা । বৰবিহৰ বিৰুদ্ধে আৰক্ষীয়ে তীব্ৰ অভিযান চলাই আছে যদিও ডিব্ৰুগড়ত ড্ৰাগছ সৰবৰাহকাৰীৰ সংখ্যা হ্ৰাস পোৱা নাই ।
ডিব্ৰুগড় জিলাখনৰ বিভিন্ন আৰক্ষী থানা এলেকাত নিতৌ উদ্ধাৰ হৈ আছে ড্ৰাগছ । আৰক্ষীয়ে দিনে-নিশাই ডিব্ৰুগড় জিলাৰ সীমান্ত পথ সমূহত কটকটীয়া তালাচী চলোৱাৰ পাছতো ডিব্ৰুগড়ত প্ৰতিদিনে ড্ৰাগছ জব্দ হোৱা ঘটনাই সকলোকে আচৰিত কৰি তুলিছে । ইয়াৰ মাজতেই মঙলবাৰে জিলাখনৰ লাহোৱালৰ মোহনবাৰী আৰক্ষীয়ে তালাচী চলাই দুটা সৰবৰাহকাৰীক ২৫ গ্ৰাম ড্ৰাগছসহ গ্ৰেপ্তাৰ কৰিবলৈ সক্ষম হয় ।
ধৃত ড্ৰাগছ সৰবৰাহকাৰী দুটা হৈছে মিৰিপথাৰ গাঁৱৰ অৰ্পণ হাজৰিকা (৩২) আৰু জিতু গগৈ (৩৮) ৷ আৰক্ষীয়ে লগতে AS 06 BC 8780 নম্বৰৰ বাহনখনো জব্দ কৰে ৷ এই বাহনখনেৰে ডিব্ৰুগড় অভিমুখে আহি থকা অৱস্থাতে মোহনবাৰী আৰক্ষীয়ে অভিযান চলাই ড্ৰাগছসহ সৰবৰাহকাৰী দুটাক কৰায়ত্ব কৰিবলৈ সক্ষম হয় ।
