ধিং: বিপদে যেন লগ নেৰা হৈছে ধিংবাসীক । বছৰটোৰ প্ৰায় আধাখিনি সময়ত বাঘৰ আতংকত পাৰ কৰা পিচত এইবাৰ আহিছ আন এক বিপদ । এইবাৰ বিষাক্ত পোকে নিদ্ৰা হৰিছে ধিংবাসীৰ । অচিন পোকে ইতিমধ্যে প্ৰাণ লৈছে এজনৰ, বৰ্তমানো চিকিৎসাধীন কেইবাজনো লোক । ইফালে বন গাহৰিৰ আক্ৰমণতো আহত কেইবাজনো লোক ।
ঘটনা অনুসৰি, ধিঙত বিষাক্ত পোকৰ পোকৰ দংশনত ইতিমধ্যে এজনৰ মৃত্যু হৈছে । বৰ্তমানলৈকে এই বিষাক্ত পোকৰ দংশনত আক্ৰান্ত হৈছে প্ৰায় ১৫ জনতকৈ অধিক লোক । মৃত লোকজন ধিঙৰ বৰঙাবাড়ীৰ যতীন শইকীয়া বুলি চিনাক্ত কৰে । অচিন বিষাক্ত পোকৰ দংশনত আক্ৰান্ত হৈ গুৱাহাটী GMCH ত চিকিৎসাধীন অৱস্থাত মৃত্যু হয় যতীন শইকীয়াৰ । বৰ্তমান সমগ্ৰ ধিং অঞ্চলত এই বিষাক্ত পোকৰ আতংক অব্যাহত আছে ।
ইফালে আকৌ ধিঙত অব্যাহত আছে বন গাহৰিৰ সন্ত্ৰাস । বৃহস্পতিবাৰে দিনৰ ভাগত ধিং চহৰৰ মাজ-মজিয়াত বন গাহৰিৰ আক্ৰমণত দুজনকৈ লোক গুৰুতৰভাৱে আহত হোৱাৰ পাছত পুনৰ নিশা গাহৰিৰ আক্ৰমণত গুৰুতৰভাৱে আহত হয় ধিং আঠগাঁৱৰ মানস কুমাৰ শইকীয়া নামৰ লোকজন । গুৰুতৰভাৱে আঘাতপ্ৰাপ্ত মানস কুমাৰ শইকীয়া বৰ্তমান ধিং এফ আৰ ইউত চিকিৎসাধীন ।
উল্লেখ্য যে, ধিঙত অবাধ গতিত বৃদ্ধি পাইছে বন গাহৰিৰ সংখ্যা । ইপিনে গাহৰিৰ সমান্তৰালকৈ এক বিশেষ পোকৰ আক্ৰমণৰ বলি হৈ চিকিৎসাধীন হ'ব লগাত পৰিছে বহুকেইজন লোক । পোকে কামোৰাৰ পাছতে অসহ্য বিষ আৰু জ্বৰত আক্ৰান্ত হৈছে কেইবাজনো লোক । সকলো বৰ্তমান ধিং এফ আৰ ইউত চিকিৎসাধীন অৱস্থাত । পোকটোৱে বহু দ্ৰুত গতিত উৰি আহি মানুহৰ গাত কামুৰি সোমাই পৰে ।
কিছুমানে কয় চিকৰাৰ দৰে পোকটোৱে কোনো শব্দ নকৰে । যোৱা দুই দিন ধৰি এই বিশেষ পোকটোৱে আক্ৰমণ কৰাত মানুহৰ মাজত এক হাহাকাৰময় পৰিস্থিতিৰ সৃষ্টি হৈছে । পোকটোৰ পৰা পৰিত্ৰাণ পাবলৈ কেনে কৌশল অৱলম্বন কৰিব লাগিব তাকে লৈ সকলোৱে চিন্তিত হৈ পৰিছে ।
