গুৱাহাটী, ১২ জুলাই : গুৱাহাটীৰ লখৰা-নেপালী মন্দিৰ পথত নতুন উৰণ সেতুৰ কাম আৰম্ভ কৰাক লৈ গুৱাহাটী আৰক্ষী আয়ুক্তালয়ৰ যান-বাহন শাখাই যান-বাহনৰ চলাচলৰ ক্ষেত্ৰত এক নিৰ্দেশনা জাৰি কৰিছে । বিৰুবাৰীৰ পৰা লালগণেশলৈ নিৰ্মাণ হ'বলগীয়া উৰণ সেতুৰ বাবে ট্ৰেফিকৰ ডি চি পিয়ে জাৰি কৰিছে এক নিৰ্দেশনা ৷
নিৰ্দেশনা অনুসৰি প্ৰস্তাৱিত ফ্লাই অভাৰ(উৰণ সেতু)ৰ নিৰ্মাণ সম্পূৰ্ণ নোহোৱালৈকে দুয়োফালৰ পৰা অৰ্থাৎ চাইকেল ফেক্টৰী পইণ্টৰ পৰা বিষ্ণুপুৰ তিনিআলিলৈ আৰু বিষ্ণুপুৰ তিনিআলিৰ পৰা চাইকেল ফেক্টৰী পইণ্টলৈ কোনো ধৰণৰ সামগ্ৰী কঢ়িওৱা বাহন, বাণিজ্যিক বাহন আৰু মন্থৰ গতিৰ বাহনৰ প্ৰৱেশ নিষিদ্ধ কৰা হৈছে ।
আনহাতে চাইকেল ফেক্টৰী পইণ্টৰ পৰা বিৰুবাৰী তিনিআলিলৈ অংশ চোৱা হ’ব ওৱান ৱে হ'ব । লালগনেশ-চাইকেল ফেক্টৰীৰ পৰা অহা যান-বাহনসমূহ চাইকেল ফেক্টৰী পইণ্টত বিষ্ণুপুৰ পথৰ ফালে ডাইভাৰ্ট হৈ যাব লাগিব । সেইদৰে আৰ্য নগৰ-বিৰুবাৰী তিনিআলিৰ পৰা অহা বাহনসমূহ বিৰুবাৰী তিনিআলিৰ পৰা চাইকেল ফেক্টৰী পইণ্ট অভিমুখে যাব পাৰিব । এই পথ নিৰ্দেশনা ১৫ জুলাইৰ পৰা কাৰ্যকৰী হ'ব ।
লগতে পঢ়ক : জনতাৰ প্ৰতি কি বিশেষ আহ্বান আৰক্ষীৰ সঞ্চালক প্ৰধান জি পি সিঙৰ - Heat Wave In Assam
উল্লেখ্য যে, চলিত বৰ্ষৰ পহিলা ফেব্ৰুৱাৰীত মুখ্যমন্ত্ৰী হিমন্ত বিশ্ব শৰ্মাই চাইকেল ফেক্টৰী জংচনৰ পৰা লালগণেশলৈ নিৰ্মাণ হ'বলগীয়া উৰণ সেঁতুখনৰ আধাৰশিলা স্থাপন কৰিছিল । ৩৭৬ কোটি টকা ব্যয় সাপেক্ষে এই সেঁতুখন নিৰ্মাণ কৰা হ'ব । তিনিলেনযুক্ত এই সেঁতুখনৰ দৈৰ্ঘ হ'ব ২.৮৪ কিলোমিটাৰ ।
এই সেঁতুখনে বৃহত্তৰ এই অঞ্চলটোৰ যান-জঁটৰ সমস্যা লাঘৱ কৰিব বুলি আশা কৰা হৈছে । চাইকেল ফেক্টৰীৰ পৰা লালগণেশলৈ নিৰ্মাণ হ'বলগীয়া সেঁতুখনৰ চাইকেল ফেক্টৰী আৰু লালগণেশত দুটা উইং থাকিব । ইতিমধ্যে উৰণ সেতুৰ কাম আৰম্ভ কৰা হৈছে ।
