যোৰহাট, 13 আগষ্ট: ৰাজ্যত পুনৰ ভূ-লুণ্ঠিত মানৱতা । যোৰহাটত সংঘটিত হৈছে এক সভ্য সমাজক লজ্জানত কৰা ঘটনা । জিলাখনৰ ডি চি বি কলেজৰ সন্মুখৰ পথৰ দাঁতিত পোৱা গৈছে এটি নৱজাতক ।
সোমবাৰে সংঘটিত হৈছে এই কৰুণ ঘটনাটো । নিজৰ কু-কৰ্ম লুকুৱাই ৰাখিবৰ বাবেই এই ঘটনা সংঘটিত কৰা বুলি সন্দেহ প্ৰকাশ কৰিছে স্থানীয় লোকে ৷ সমাজত লজ্জানত হোৱাৰ ভয়ত যোৰহাটৰ ডি চি বি কলেজৰ সন্মুখৰ পথৰ দাঁতিত অভিভাৱকে নৱজাতকটিক পেলাই থৈ যায় বুলি ক্ষোভ প্ৰকাশ কৰিছে স্থানীয় লোকে ।
জানিব পৰা মতে, নৱজাতকটি এটি কন্যা শিশু ৷ পথৰ দাঁতিত পেলাই থৈ যোৱা নৱজাতকটিৰ ৰাউচিজোৰা কান্দোন শুনি বাহিৰলৈ ওলাই আহে স্থানীয় ৰাইজ আৰু ততাতৈয়াকৈ খবৰ দিয়ে আৰক্ষীক ৷ ঘটনাস্থলীত যোৰহাট আৰক্ষী উপস্থিত হৈ আৰু অতি ক্ষীপ্ৰতাৰে নৱজাতকটিক যোৰহাট চিকিৎসা মহাবিদ্যালয় হাস্পতালত ভৰ্তি কৰোৱায় ৷
বৰ্তমান নৱজাতকটি যোৰহাট চিকিৎসা মহাবিদ্যালয় হাস্পতালৰ শিশুকক্ষত ৰখা হৈছে বুলি জানিব পৰা গৈছে । বৰ্তমান শিশুটিৰ অৱস্থা সংকটমুক্ত বুলি জানিবলৈ দিছে চিকিৎসা মহাবিদ্যালয় সূত্ৰই ।
আনহাতে, এনে ঘৃণনীয় কাণ্ড সংঘটিত কৰা লোকক শীঘ্ৰে চিনাক্ত কৰি কঠোৰৰ পৰা কঠোৰতম শাস্তি বিহিবলৈ দাবী জনাইছে সচেতন ৰাইজে । এই ঘটনাই বৰ্তমান শৈক্ষিক মহানগৰী যোৰহাটত তীব্ৰ চাঞ্চল্যৰ সৃষ্টি কৰিছে । সমান্তৰালভাৱে ৰাজ্যত বৃদ্ধি পাই অহা এনেবোৰ ঘটনাত উদ্বিগ্নতা প্ৰকাশ কৰিছে স্থানীয় লোকে ৷
উল্লেখ কৰা প্ৰয়োজন যে, ৰাজ্যৰ বিভিন্ন প্ৰান্তৰ লগতে এই ঘটনাটোৰ পূৰ্বেও বহুবাৰ এনে দুৰ্ভাগ্যজনক ঘটনা সংঘটিত হৈছে জিলাখনত ৷
