মাজুলী, 5 জুলাই: ৰাজ্যত অপৰিৱৰ্তিত বান পৰিস্থিতি ৷ মাজুলীৰ শেহতীয়া বান পৰিস্থিতিৰ বুজ ল’বলৈ বৃহস্পতিবাৰৰ সন্ধিয়া মাজুলীত উপস্থিত হয় সাংসদ গৌৰৱ গগৈ । মাজুলীত উপস্থিত হৈ সাংসদগৰাকীয়ে মাজুলীৰ বিভিন্ন দল-সংগঠন, বিশিষ্ট নাগৰিকসকলৰ লগত মাজুলীৰ বিভিন্ন সমস্যাৰাজিৰ ওপৰত এক আলোচনাত মিলিত হয় ।
এই আলোচনাত মাজুলীৰ সমস্যাসমূহ কিদৰে সমাধান কৰিব পাৰি, সেই সন্দৰ্ভতো আলোচনা কৰা হয় । এই আলোচনাত মাজুলীৰ বিভিন্ন সমস্যাৰাজিৰ লগতে বৃহৎ নদীবান্ধৰ বিষয়টোৱেও স্থান পায় ।
সাংসদগৰাকীয়ে কয়, "ৰজাৰ দৰে শাসন কৰি অকলে কোনেও সমস্যা সমাধান কৰিব নোৱাৰে সেইবাবে ৰাইজৰ লগত আলোচনা কৰি মাজুলীৰ দল-সংগঠনৰ লগত আলোচনা কৰি ছাত্র-ছাত্ৰীসকলৰ লগত আলোচনা কৰিহে সমস্যাসমূহ সমাধানৰ বাবে আগবাঢ়িম, যাতে মাজুলীখন আৰু আগবাঢ়ি যায়" ৷
মাজুলীৰ আউনিআটী সত্ৰৰ সমীপৰ এই বছৰ বানে ছিগা অংশ পৰিদৰ্শন কৰাৰ লগতে মাজুলীৰ আন আন বান ক্ষতিগ্ৰস্ত অঞ্চল পৰিদৰ্শন কৰি সাংসদগৰাকীয়ে মথাউৰি নিৰ্মাণত হেমাহি, দুৰ্নীতিগ্ৰস্ত ঠিকাদাৰক ঠিকা প্ৰদান বন্ধ আৰু ব্লেক লিষ্টেড কৰিব লাগে বুলি দাবী জনায় সাংসদ গৌৰৱ গগৈয়ে ।
বানৰ লগতে ঢকুৱাখনাৰ ৰহস্যজনক যি হত্যাকাণ্ড সংঘটিত হৈছিল, সেই সন্দৰ্ভতো প্ৰতিক্ৰিয়া ব্যক্ত কৰে সাংসদগৰাকীয়ে ৷ তেওঁ কয়, "হত্যাকাণ্ডৰ ৰহস্য ফাদিল কৰাত গৃহ বিভাগ সম্পূৰ্ণৰূপে বিফল হৈছে । অকল এইটো কথাতেই নহয় গৃহ বিভাগ বিভিন্ন ক্ষেত্ৰত বিফল হৈছে ৷ যাৰ বাবে হত্যা, হিংসা আজিৰ তাৰিখত বেছি হৈছে" ৷
উল্লেখ্য যে, যোৰহাট লোকসভা সমষ্টিৰ বান পৰিস্থিতিৰ বুজ ল'বলৈ ডিব্ৰুগড়ৰ মোহনবাৰী বিমানবন্দৰত বৃহস্পতিবাৰৰ বিয়লি উপস্থিত হৈছিল সাংসদ গৌৰৱ গগৈয়ে । ডিব্ৰুগড় বিমানবন্দৰৰ পৰা পোনে পোনে মাজুলীলৈ ৰাওনা হৈছিল সাংসদ গগৈ ।
