গুৱাহাটী, ২৯ আগষ্ট: শেহতীয়াকৈ ৰাজ্যৰ ৰাজনীতিৰ লগতে বিভিন্ন মহলত সৰৱ চৰ্চা লাভ কৰা এটা বিষয় হৈছে মিঞা ৷ আনকি অসম বিধানসভাৰ চলিত শৰৎকালীন অধিৱেশনতো এই বিষয়টোক লৈ তীব্ৰ বিতৰ্ক হোৱা দেখা গৈছে ৷ তাৰ মাজতে কংগ্ৰেছ সাংসদ প্ৰদ্যুৎ বৰদলৈয়ে কৰা এক মন্তব্যক লৈ সাংসদগৰাকীক উভতি ধৰিছে এ আই ইউ ডি এফৰ বিধায়ক আমিনুল ইছলামে ।
নিকৃষ্ট ৰাজনীতি কৰিছে:
বিধানসভাৰ বাহিৰত বৃহস্পতিবাৰে সাংবাদিকক সম্বোধন কৰি তেওঁ কয়, ‘‘নগাঁৱৰ পৰা উজনি অসমলৈ মাছৰ ৰপ্তানি বন্ধ কৰাৰ ক্ষেত্ৰত মোৰ হাত আছে বুলি প্ৰদ্যুৎ বৰদলৈয়ে মন্তব্য কৰিছিল । প্ৰদ্যুৎ বৰদলৈয়ে কৈছে যে মোৰ উচটনিত মাছ ব্যৱসায়ীসকলে এনেকৈ কৈছে । তেনে কোনো মাছ ব্যৱসায়ীৰ লগত মোৰ কোনো চিনাকী নাই । কোনো পৰিচয় নাই । বৰদলৈয়ে এক বিভাজনৰ পৰিৱেশ সৃষ্টি কৰিব বিচাৰিছে । অসমত শান্তি হ'ব লাগে । তেওঁৰ বক্তব্যক গৰিহণা দিছো ৷ তেওঁ নিৰ্যাতিত সংখ্যালঘু মানুহৰ বাবে ক'ব লাগিছিল । বৰদলৈয়ে নিকৃষ্ট ৰাজনীতি কৰিছে ।’’
ক্ষমা খোজক প্ৰদ্য়ুৎ বৰদলৈয়ে:
বিধায়ক আমিনুল ইছলামে লগতে কয়, ‘‘প্ৰদ্যুৎ বৰদলৈয়ে সাংসদ নিৰ্বাচিত হোৱাৰ পিছত নগাঁৱৰ ৰাইজৰ খবৰ লোৱা নাই । বাঘৰ আক্ৰমণৰ খবৰ লোৱা নাই । বানত ক্ষতিগ্ৰস্ত লোকৰ খবৰ ল'বলৈ যোৱা নাই । কোনো মাত মতা নাই । সহায় কৰিবলৈ অহা নাই । বৰদলৈ ইমান অহংকাৰী হ'ব নালাগে । তেওঁ নগাঁৱৰ ৰাইজক ক্ষমা খোজক ।’’
মিঞাক অসমীয়া জাতিৰ কাল্পনিক শত্ৰু বুলি বুজাব খুজিছে:
আমিনুল ইছলামে লগতে কয়, ‘‘যিসকল লোকক মিঞা বুলি কোৱা হৈছে তেওঁলোকে মিঞা বুলি ক’লে বেয়া পায় । তেওঁলোক অসমীয়া জাতি সত্বাৰ লগত বিলীন হ’ব বিচাৰে । কিন্তু একাংশই বাৰে বাৰে এনে কথা কৈ তেওঁলোকৰ মনত দুখ দি থাকে । বিজেপি দলে ৰাজনৈতিক স্বাৰ্থৰ বাবে এনেবোৰ কথা কৈ আছে । বিজেপিয়ে এইসকল লোকক অসমীয়া জাতিৰ কাল্পনিক শত্ৰু বুলি বুজাব খুজিছে । বিজেপিয়ে ৰাজনৈতিক স্বাৰ্থত অসমীয়া জাতিক টুকুৰা-টুকুৰ কৰিব খুজিছে ।
