শিৱসাগৰ, ১০ জুলাই: অসমৰ চাকৰিৰ ক্ষেত্ৰত অসমীয়া ভাষা আৰু স্থায়ী বাসিন্দাৰ প্ৰমাণ পত্ৰ অৰ্থাৎ পি আৰ চি বাধ্যতামূলক নহয় বুলি উচ্চ শিক্ষা সঞ্চালকালয়ে কৰা ঘোষণাক লৈ প্ৰতিক্ৰিয়া ব্যক্ত কৰিছে ৰাইজৰ দলে ৷ ৰাইজৰ দলৰ সভাপতি তথা শিৱসাগৰৰ বিধায়ক অখিল গগৈয়ে অসম চৰকাৰৰ শিক্ষা বিভাগে জাৰি কৰা নিৰ্দেশনাৰ বিৰোধিতা কৰে ৷ তেওঁ শাসকীয় বিজেপি দলক কঠোৰ সমালোচনা কৰি এইটো অসমীয়া জাতিটোক গ্ৰাস কৰাৰ দলটোৰ এটা প্ৰচেষ্টা বুলি মন্তব্য কৰে ৷
তেওঁ লগতে কয় যে জাতি-মাটি-ভেটিৰ কথা কোৱা বিজেপি চৰকাৰৰ একমাত্ৰ আদৰ্শ হৈছে এক দেশ এক জাতি, এক দেশ এক ধৰ্ম, এক দেশ এক ভাষা ৷ তেওঁলোকে এতিয়া এনেকৈ ভাৰতবৰ্ষৰ বিভিন্ন ভাষা, বিভিন্ন জাতি-জনগোষ্ঠীক বৈচিত্ৰ্যক অস্বীকাৰ কৰা নীতিক প্ৰতিফলিত কৰি অসমৰ চাকৰিৰ ক্ষেত্ৰত অসমীয়া মানুহ তথা স্থায়ী বাসিন্দাক চাকৰি দিয়া নীতি বিলুপ্ত কৰি দিছে ৷
এইয়া ঐতিহাসিক অন্যায় বুলি উল্লেখ কৰি এই কথা কোনো কাৰণতে মানি লোৱা নহ’ব বুলি উল্লেখ কৰি ৪৮ ঘন্টাৰ ভিতৰত এই নিৰ্দেশনা সলনি কৰাৰ বাবে চৰকাৰক দাবী জনায় । অসমীয়া মানুহৰ মূৰত মাধমাৰ দিবলৈ লোৱা এই সিদ্ধান্তক কোনো কাৰণতে মানি লোৱা নহ’ব বুলি উল্লেখ কৰি তেওঁ ইয়াৰ বিৰুদ্ধে অসম বিধানসভাত প্ৰৱল প্ৰতিবাদ গঢ়ি তোলাৰ হুংকাৰ দিয়ে ।
অৱশ্যে বুধবাৰে ৰাজ্যৰ শিক্ষামন্ত্ৰী ডাঃ ৰণোজ পেগুৰ নিৰ্দেশৰ পিচতেই উচ্চ শিক্ষা সঞ্চালকালয়ে উক্ত নিৰ্দেশনাটো বাতিল কৰিছে ৷
লগতে বিধায়কৰ দৰমহা বঢ়াবলৈ লোৱা চৰকাৰৰ সিদ্ধান্তক সমৰ্থন নকৰে বুলি ৰাইজৰ দলৰ সভাপতি অখিল গগৈৰ ঘোষণা কৰে । ইয়াক জনবিৰোধী বুলি উল্লেখ কৰে গগৈয়ে । তেওঁ নিজৰ পে’ শ্লিপৰ বিষয়ে বিশদভাৱে দাঙি ধৰে । বৰ্তমান বিধায়কসকলে লাভ কৰা দৰমহা আৰু অন্যান্য সা-সুবিধাকে ধৰি লাভ কৰা ১,৭৩,০০০ টকা পৰ্যাপ্ত বুলি উল্লেখ কৰে । চৰকাৰে যদি দৰমহা বৃদ্ধি কৰিব বিচাৰিছে তেন্তে কমকৈ দৰমহা পোৱা কৰ্মচাৰীসকলৰ দৰমহা বৃদ্ধি কৰিবলৈ দাবী জনায় অখিল গগৈয়ে ।
লগতে পঢ়ক: বৃদ্ধি পাব মন্ত্ৰী-বিধায়কৰ দৰমহা : ৫০ শতাংশ দৰমহা বৃদ্ধিৰ সম্ভাৱনা - SALARIES OF MINISTERS AND MLAS
ইফালে শিৱসাগৰ অসামৰিক চিকিৎসালয়ত ম'বাইলৰ টৰ্চ জ্বলাই নাৰ্চে চিকিৎসা কৰিবলগা হোৱা ঘটনা সন্দৰ্ভত প্ৰতিক্ৰিয়া প্ৰকাশ কৰে অখিল গগৈয়ে । চিকিৎসালয়খনত থাকিবলগীয়া ২৬ জন চিকিৎসকৰ বিপৰীতে ১৮ জন চিকিৎসকহে থকাৰ কথা উল্লেখ কৰি বাকী ৮ জন চিকিৎসকক শীঘ্ৰে নিযুক্তি দিবৰ বাবেও দাবী অখিল গগৈয়ে ।
আনহাতে শিৱসাগৰ জলসিঞ্চন বিভাগত সংঘটিত হোৱা ১৯ কোটি টকাৰ কেলেংকাৰী সন্দৰ্ভত সৰৱ অখিল গগৈ । তেওঁ এই কেলেংকাৰী সন্দৰ্ভত চি বি আই তদন্তৰ দাবী জনায় ।
লগতে পঢ়ক: অসমত কোনো বিদেশী নাগৰিকক সংস্থাপিত কৰিবলৈ দিয়া নহ'ব: শংকৰজ্যোতি বৰুৱা - Chakma Hajong Issue
