শিৱসাগৰ,২০ আগষ্ট: অসমীয়া যুৱতীক অনাঅসমীয়াই প্ৰহাৰ কৰা ঘটনাক লৈ প্ৰতিক্ৰিয়া অব্যাহত শিৱসাগৰত । যোৱা ১৩ আগষ্টত সংঘটিত হোৱা ঘটনাৰ উচিত বিচাৰ নোহোৱাৰ বাবে শিৱসাগৰ জিলাৰ ৩০ সংগঠনে ৰাইজৰ সহযোগত শিৱসাগৰ নগৰত সোমবাৰে এক বিশাল প্ৰতিবাদী কাৰ্যসূচী ৰূপায়ণ কৰাৰ পাছত মঙলবাৰে শিৱসাগৰ নগৰত বন্ধসদৃশ পৰিৱেশ । নগৰৰ অধিকাংশ বহিৰাগত ব্যৱসায়ীৰ প্ৰতিষ্ঠানসমূহ মঙলবাৰে নগৰখনত স্বতঃস্ফূৰ্তভাৱে বন্ধ থকা দেখা যায় ।
উল্লেখযোগ্য যে শিৱসাগৰ নগৰৰ তিনি ৰাজস্থানী ব্যৱসায়ীৰ দলবদ্ধ আক্ৰমনৰ বলি হৈ শাৰিৰীক মানসিকভাৱে অপদস্থ হোৱা ৰাষ্ট্ৰীয় পাঞ্জা খেলুৱৈ জিমি দাস যোৱা ১৩ আগষ্টত গুৰুতৰভাৱে আহত হৈ সম্প্ৰতি চিকিৎসাধীন হৈ আছে । এই ঘটনাৰ বিৰুদ্ধে সোমবাৰৰ কাৰ্যসূচীত শিৱসাগৰ নগৰ আৰু ইয়াৰ সমীপৱৰ্তী এলেকাৰ কেইবাহাজাৰৰো অধিক লোকে অংশগ্ৰহণ কৰি বহিৰাগত ব্যৱসায়ীৰ অতপালি ৰোধ কৰাৰ বাবে দাবী জনাইছিল ।
ইফালে এই ঘটনা সন্দৰ্ভত মঙলবাৰে শিৱসাগৰ জিলাৰ ৩০ টা জাতীয়-জনগোষ্ঠীয় সংগঠনৰ লগত জিলাখনৰ অভিভাৱক মন্ত্ৰী ড৹ ৰণোজ পেগু আলোচনাত মিলিত হয় । শিৱসাগৰ নগৰৰ যুৱদলত অনুষ্ঠিত হোৱা এই আলোচনালৈ জিলাখনৰ ৩০ দল-সংগঠন, সাংবাদিকৰ লগতে জিলাখনৰ সচেতন ৰাইজক জিলা প্ৰশাসনৰ ফালৰ পৰা নিমন্ত্ৰণ জনায় ।
উক্ত আলোচনাত মিলিত হোৱাৰ পূৰ্বে জাতীয়তাবাদী যুৱনেতা শৃংখল চলিহাই কয়,"কালিৰ যি প্ৰতিবাদ সেই প্ৰতিবাদক অন্যান্য জিলাক অনুকৰণ কৰিবলৈ আহ্বান জনাইছো । অনাগত দিনত বহিৰাগত মানুহৰ বিৰুদ্ধে এই সংগ্ৰাম অব্যাহত থাকিব । আমাক ভূমিৰ অধিকাৰ দিব লাগিব । ভূমিৰ অধিকাৰৰ ক্ষেত্ৰত কোনো আপোচ কৰা নহ'ব । আমাক অধিকাৰ ৰণোজ পেগুৱে দি যাব লাগিব । অধিকাৰ নিদিলে আকৌ সংগ্ৰাম হ'ব ।"
