কলিয়াবৰ, ২২ জুন: নগাঁও জিলাৰ হাতীমূৰাৰ কলংমুখ পৰিদৰ্শন কৰি আবকাৰী মন্ত্ৰী কেশৱ মহন্তই জনসাধাৰণক শংকিত নহ'বলৈ আহ্বান জনাইছে । শনিবাৰে মন্ত্ৰীগৰাকীয়ে কলঙৰ নৱনিৰ্মিত শ্লুইছ গেটৰ তলেদি লুইতৰ পানী নিগৰি বৈ যোৱাৰ পিচতেই তেওঁ উক্ত স্থান পৰিদৰ্শন কৰি ৰাইজক এইদৰে অভয়বাণী দিয়ে । এই শ্লুইছ গেটৰ তলেদি লুইতৰ পানী নিগৰি বৈ যোৱাত অঞ্চলটোৰ ৰাইজ শংকিত হোৱাত মন্ত্ৰী কেশৱ মহন্তই এই ঠাই পৰিদৰ্শন কৰি কয়, "চিন্তাৰ কাৰণ নাই । কলঙৰ নৱনিৰ্মিত শ্লুইছ গেটৰ তলেদি নিগৰি বৈ যোৱা লুইতৰ পানীয়ে একো ক্ষতি নকৰে । যিহেতু শ্লুইছ গেটখন এতিয়াও খুলি দিয়া হোৱা নাই । শ্লুইছ গেটখন খুলি দিলে সোঁত ব'ব । যি পানী কলঙৰ বুকুৰে বৈ গৈছে তাকে লৈ শংকিত হ'ব নালাগে ।"
আনহাতে, জলসম্পদ বিভাগৰ বিষয়াই জনোৱা মতে, শ্লুইছ গেটখন বহুৱাওঁতে তলফালে কিছু ফাঁক থাকিব পাৰে । যিহেতু এই শ্লুইছ গেটখন এতিয়া প্ৰাৰম্ভিক পৰ্যায়তে আছে, এনে সৰু-সুৰা বিসংগতি স্বাভাৱিকতে ওলাব পাৰে । বিভাগীয় অভিযন্তা-কাৰিকৰী বিশেষজ্ঞই সমগ্ৰ বিষয়টো পৰ্যৱেক্ষণ কৰি বিসংগতি আঁতৰোৱাৰ কাম আৰম্ভ কৰিছে । কলং প্ৰকল্পত অভিজ্ঞ কাৰিকৰী বিশেষজ্ঞ বিষয়াৰ উপস্থিতিত পানী বোৱতীকৰণৰ প্ৰাৰম্ভিক কাম আৰম্ভ হ'ব বুলি বিষয়াগৰাকীয়ে সদৰী কৰে ।
ইপিনে,শুকুৰবাৰে জখলাবন্ধাত কলং পৰিদৰ্শন কৰি শীঘ্ৰে আনুষ্ঠানিকভাৱে কলং বৈ যোৱাৰ আশা প্ৰকাশ কৰিছে মুখ্যমন্ত্ৰী ড৹ হিমন্ত বিশ্ব শৰ্মাই । যি কাৰণতেই নহওক কলঙৰ বুকুত লুইতৰ পানী ভৰি পৰাত এক সুখানুভূতি বৈ গৈছে কলিয়াবৰীয়াৰ মাজত । কলিয়াবৰৰ হাতীমূৰাত ব্ৰহ্মপুত্ৰৰ সৈতে সংলগ্ন কলঙৰ মুখ খান্দি দিয়াৰ পাচতে পুনৰ প্ৰাণ পোৱা মৃত কলঙে ভৰ বাৰিষাতে এইবাৰ চিৰপ্ৰৱাহিত হ’ব । ব্ৰহ্মপুত্ৰৰ জলৰাশি বৃদ্ধি হ'লেই নতুন শ্লুইছ গেটৰে বোৱতী হ’ব কলং ।
২০২০ চনৰ ৩০ অক্টোবৰত তদানীন্তন জলসম্পদ মন্ত্ৰী কেশৱ মহন্তই শুভাৰম্ভ কৰা প্ৰকল্প প্ৰায় ৩ বছৰ ৬ মাহৰ ভিতৰতেই সম্পূৰ্ণ হৈ উঠে । উল্লেখযোগ্য যে ১৯৬৩ চনত ব্ৰহ্মপুত্ৰৰ বানৰ পৰা মধ্য অসমক ৰক্ষা কৰিবলৈ হাতীমূৰাত বন্ধ কৰি দিয়া হৈছিল কলঙৰ মুখ । তাৰ লগে লগে মৃত্যু ঘটিছিল নগাঁৱৰ প্ৰাণস্পন্দন বোৱতী কলঙৰ । কেন্দ্ৰীয় জলসম্পদ বিভাগৰ অধীনস্থ প্ৰতিষ্ঠান WAPCOS ক ২০১৯ চনত কলং উন্নয়নৰ দায়িত্ব অৰ্পণ কৰা হৈছিল । ১৩৫.৪০ কোটি টকা নিৰ্ধাৰণ কৰিছিল সম্পূৰ্ণ প্ৰকল্পটোত ।
