প্ৰধানমন্ত্ৰীৰ আগমনে পৰ্যটন ক্ষেত্ৰত নতুন দিগন্তৰ সূচনা কৰিব: জয়ন্ত মল্লবৰুৱা

PM Modi Kaziranga Visit : প্ৰধানমন্ত্ৰী নৰেন্দ্ৰ মোদীয়ে পৰ্যটন ক্ষেত্ৰৰ প্ৰসাৰৰ বাবে যি স্থানতে গৈ উপস্থিত হয়, সেই স্থানেই বিশ্ববিখ্যাত হৈ পৰে । সেয়েহে প্ৰধানমন্ত্ৰী নৰেন্দ্ৰ মোদীৰ যোৰহাট আৰু কাজিৰঙা আগমনে পৰ্যটন মানচিত্ৰত অসমত এক নতুন দিগন্তৰ সূচনা কৰিব । এই মন্তব্য মন্ত্ৰী জয়ন্ত মল্লবৰুৱাৰ ।

যোৰহাট, ৭ মাৰ্চ : প্ৰধানমন্ত্ৰী নৰেন্দ্ৰ মোদীয়ে বৃহস্পতিবাৰে শ্ৰীনগৰৰ পৰা ৬,৪০০ কোটি টকা ব্যয় সাপেক্ষে স্বদেশ দৰ্শন ২.০ আঁচনিৰ অধীনত ৫৩ টা বিভিন্ন প্ৰকল্পৰ শিলান্যাস কৰে । এই অনুষ্ঠানৰ যোৰহাট জিলা পুথিভঁৰাল প্ৰেক্ষাগৃহত আয়োজিত ভাৰ্চুৱেল অনুষ্ঠানত উপস্থিত থাকে ৰাজ্যৰ পৰ্যটন মন্ত্ৰী জয়ন্ত মল্লবৰুৱা ।

উক্ত আঁচনিৰ অধীনত যোৰহাট আৰু কোকৰাঝাৰৰ পৰ্যটন ক্ষেত্ৰৰ বাবে দুটা প্ৰকল্পও শুভাৰম্ভ কৰা হয় । আনহাতে, উক্ত অনুষ্ঠানত অংশগ্ৰহণ কৰি মন্ত্ৰী জয়ন্ত মল্লবৰুৱাই কয় যে কাজিৰঙাত প্ৰধানমন্ত্ৰী নৰেন্দ্ৰ মোদীৰ নৈশযাপন আৰু জীপ, হাতী ছাফাৰিত অংশগ্ৰহণে বিশ্বত কাজিৰঙাৰ পৰ্যটন ক্ষেত্ৰক এক নতুন মাত্ৰা প্ৰদান কৰিব । কাৰণ প্ৰধানমন্ত্ৰী নৰেন্দ্ৰ মোদীয়ে পৰ্যটন ক্ষেত্ৰৰ প্ৰসাৰৰ বাবে যি স্থানতে গৈ উপস্থিত হয়, সেই স্থানেই বিশ্ববিখ্যাত হৈ পৰে বুলি উল্লেখ কৰে মন্ত্ৰীগৰাকীয়ে ।