লখিমপুৰ, ৮ জুন : লখিমপুৰত চপৰা চপৰে খহিছে সোৱণশিৰি গৰা । সমানে খহিছে বিধায়কৰ জনপ্ৰিয়তা । বাৰিষা বান আৰু খৰালিত খহনীয়া । এইবোৰ প্ৰাকৃতিক দুৰ্যোগৰ পৰা যেন কেতিয়াও উদ্ধাৰ নহ'ব লখিমপুৰ জিলাৰ ৰাইজ । বাৰিষাৰ বানৰ পাচত খৰালি কালচোৱাত জিলাখনৰ বিভিন্ন স্থানত খহনীয়াৰ তাণ্ডৱ প্ৰতিবছৰে অব্যাহত আছে ।
বিশেষকৈ সোৱণশিৰিৰ খহনীয়াই বহু শস্য ক্ষেত্র, গাঁও আদি উচন কৰিছে ৷ শেহতীয়া কৈ ঘাগৰঘাটত তীব্র ৰূপ ধাৰণ কৰিছে খহনীয়াই । খহনীয়াই কালৰূপ ধৰিছে ন-আলি-ঘাগৰঘাট-বালিগাঁৱত । সোৱণশিৰিৰ এনে গড়াখহনীয়াত ত্ৰস্তমান জনতা ৷
খহনীয়াত ঘৰ-বাৰী হেৰুৱাই মুকলি আকাশৰ তলতে অন্ন-বাসস্থানৰ ব্যৱস্থা কৰিবলগীয়া হৈছে ৰাইজে । সম্প্রতি নিঃশেষ হোৱাৰ পথত অঞ্চলটোৰ দুই শতাধিক পৰিয়ালৰ বাসগৃহ । সোৱণশিৰিৰ খহনীয়াৰ পৰা পৰিত্ৰাণ বিচাৰি ন-আলি ঘাগৰমুখ বালিগাঁওবাসীয়ে প্ৰতিবাদ কৰি আছে যদিও কাণসাৰ নাই সংশ্লিষ্ট বিভাগ, চৰকাৰ, অথবা জনপ্রতিনিধিৰ ।
উল্লেখ্য ইতিমধ্যে অঞ্চলটোত সোৱণশিৰিত জাহ গৈছে দুই শতাধিক পৰিয়ালৰ বাসগৃহ । খহনীয়াৰ প্ৰকোপত নিজে সজা ঘৰখন আজি নিজে ভাঙিছে নৈ পৰীয়াই । অসমৰ মানচিত্রৰ পৰা নিঃশেষ হোৱাৰ পথত সোৱণশিৰি নদীপৰীয়া এক বৃহৎ অঞ্চল । যাৰ ফলত ক্ষুদ্ধ হৈ পৰিছে ৰাইজ ।
