বাক্সা,১৮ ছেপ্টেম্বৰ: অচিৰেই পৰ্যটকৰ বাবে মুকলি হ'ব বিশ্ব ঐতিহ্য ক্ষেত্ৰ মানাহ ৰাষ্ট্ৰীয় উদ্যান । পৰ্যটকে উপভোগ কৰিব পাৰিব মানাহৰ প্ৰাকৃতিক সৌন্দৰ্য । এক জাননীযোগে মানাহ ব্যাঘ্ৰ প্ৰকল্পৰ ক্ষেত্ৰ সঞ্চালক ড° চি. ৰমেশে সদৰী কৰিলে মানাহৰ দ্বাৰ কেতিয়া মুকলি কৰা হ'ব পৰ্যটকৰ বাবে । ভাৰত চৰকাৰৰ পৰিৱেশ মন্ত্ৰালয়, বন আৰু জলবায়ু পৰিৱৰ্তন মন্ত্ৰালয়, ৰাষ্ট্ৰীয় ব্যাঘ্ৰ সংৰক্ষণ প্ৰাধিকাৰীৰ বিধি অনুসৰি এই ঘোষণা মানাহ কৰ্তৃপক্ষৰ ।
মানাহ ব্যাঘ্ৰ প্ৰকল্পৰ ক্ষেত্ৰ সঞ্চালকগৰাকীয়ে সদৰী কৰা অনুসৰি অহা ১ অক্টোবৰত পৰ্যটকৰ বাবে মুকলি কৰা হ'ব বিশ্ব ঐতিহ্য ক্ষেত্র মানাহ ৰাষ্ট্ৰীয় উদ্যানৰ প্ৰৱেশদ্বাৰ । ২০২৪-২৫ পৰ্যটন বৰ্ষৰ বাবে পুনৰ জাননী নিদিয়া পৰ্যন্ত পৰ্যটকৰ বাবে খোলা থাকিব মানাহৰ প্ৰৱেশদ্বাৰ । উল্লেখ্য যে, যোৱা ২০ জুনত বাৰিষাৰ পৰিপ্ৰেক্ষিতত প্ৰতিকূল বতৰৰ প্ৰতি লক্ষ্য ৰাখি পৰ্যটকৰ বাবে বন্ধ কৰা হৈছিল ৰাষ্ট্ৰীয় উদ্যানখনৰ প্ৰৱেশদ্বাৰ ৷
মানাহ ৰাষ্ট্ৰীয় উদ্যান ইতিমধ্যে ১ অক্টোবৰত খুলিব বুলি জাননী জাৰি কৰাৰ লগে লগে প্ৰকৃতিপ্ৰেমীসকলৰ উৎসাহ বৃদ্ধি পোৱা পৰিলক্ষিত হৈছে ৷ অহা ১ অক্টোবৰত মানাহ ৰাষ্ট্ৰীয় উদ্যানখনৰ দ্বাৰ পুনৰ মুকলিৰ পাচৰে পৰাই পৰ্যটকে ৰাষ্ট্ৰীয় উদ্যানখনত জীপ চাফাৰী, হাতী চাফাৰী, ৰিভাৰ ৰাফটিং আদি উপভোগ কৰিব পাৰিব ।
২০২৪-২৫ বৰ্ষৰ বাবে পুনৰ জাননী নিদিয়া পৰ্যন্ত পৰ্যটকৰ বাবে খোলা থাকিব মানাহ ৰাষ্ট্ৰীয় উদ্যানখনৰ প্ৰৱেশদ্বাৰ । অৱশ্যে প্ৰতি মঙলবাৰে মানাহত পুৰ্বৰ দৰেই বন্ধ থাকিব পৰ্যটন সম্পৰ্কীয় কাৰ্যকলাপ । ইফালে পৰ্যটকক মানাহৰ প্ৰাকৃতিক সৌন্দৰ্য উপভোগ কৰিবলৈ আহ্বান জনাইছে প্ৰকৃতিপ্ৰেমীসকলে ।
