নিউজ ডেস্ক, 12 জুলাই: পুনৰ এবাৰ দেশতেই অপমানিত হ’ল জাতিৰ পিতা, স্বাধীনতা সংগ্ৰামী মহাত্মা গান্ধী ৷ এটা ক্ল’ক টাৱাৰ নিৰ্মাণৰ বাবেই উচ্ছেদ কৰা হ’ল 75 বছৰীয়া পুৰণি মহাত্মা গান্ধীৰ প্ৰতিমূৰ্তি ৷ এই দুৰ্ভাগ্যজনক ঘটনাটো সংঘটিত হৈছে অসমৰ তিনিচুকীয়া জিলাৰ ডুমডুমাত ৷
I am not aware of this decision taken by the district administration. Let me verify the facts. Assam owes so much to Mahatma Gandhi. He stood firmly with Bharat Ratna Gopinath Bordoloi when the Congress party led by Nehru wanted to include Assam in Pakistan under the Grouping… https://t.co/KHlquy4gIz
— Himanta Biswa Sarma (@himantabiswa) July 12, 2024
উল্লেখ কৰা প্ৰয়োজন যে, এটা ক্ল’ক টাৱাৰ নিৰ্মাণৰ বাবে জাতিৰ পিতাগৰাকীৰ প্ৰতিমূৰ্তি আঁতৰোৱা হ’ব বুলি চৰ্চা চলাৰ পাচতেই ঘটনাটোৱে ৰাজ্যজুৰি লাভ কৰিছিল তীব্ৰ চৰ্চা ৷ ৰাজ্যৰ বিভিন্ন দল-সংগঠনে এই সিদ্ধান্তৰ তীব্ৰ প্ৰতিবাদ কৰিছিল । অৱশ্যে সকলো প্ৰতিবাদ-দাবীক ভেঙুচালি কৰি দুদিন পূৰ্বে ডুমডুমাৰ গান্ধী চ’কত থকা 5.5 ফুট উচ্চতাৰ মহাত্মা গান্ধীৰ প্ৰতিমূৰ্তিটো এক্সকেভেটৰেৰে আঁতৰাই পেলোৱাৰ পিচত ৰাজ্যজুৰি এই ঘটনাৰ ব্যাপক প্ৰতিক্ৰিয়াৰ সৃষ্টি হয় ।
সমান্তৰালভাবে, ঘটনা সন্দৰ্ভত X যোগে প্ৰতিক্ৰিয়া প্ৰকাশ কৰে মহাত্মা গান্ধীৰ নাতি তুষাৰ গান্ধীয়ে ৷ গান্ধীয়ে কয়, "অসমৰ বিজেপি চৰকাৰে বাপুৰ প্ৰতিমূৰ্তি থকা স্থানত ক্ল’ক টাৱাৰ স্থাপনৰ সিদ্ধান্ত লোৱাটো আচৰিত কথা নহয় । তেওঁলোকৰ দাসত্বপূৰ্ণ মনোভাৱ বৰ্তমানেও আছে ।"
তুষাৰ গান্ধীয়ে বিষয়টো সন্দৰ্ভত উদ্বেগ প্ৰকাশ কৰাৰ পাচতেই অসমৰ মুখ্যমন্ত্ৰী হিমন্ত বিশ্ব শৰ্মাই প্ৰতিমূৰ্তি আঁতৰোৱাৰ সিদ্ধান্তৰ বিষয়ে অৱগত নহয় বুলি X যোগে প্ৰকাশ কৰি কয়, "জিলা প্ৰশাসনে লোৱা এই সিদ্ধান্তৰ বিষয়ে মই অৱগত নহয় । তথ্যসমূহ নিৰীক্ষণ কৰিব লাগিব । মহাত্মা গান্ধীৰ ওচৰত অসম যথেষ্ট ঋণী । নেহৰুৰ নেতৃত্বত কংগ্ৰেছ দলে যেতিয়া গ্ৰুপিং প্লেনৰ অধীনত অসমক পাকিস্তানৰ অন্তৰ্ভূক্ত কৰিব বিচাৰিছিল, তেতিয়া গান্ধীয়ে ভাৰত ৰত্ন গোপীনাথ বৰদলৈৰ সৈতে দৃঢ়তাৰে থিয় দিছিল ।"
ডুমডুমা পৌৰসভাই ৰাইজৰ সৈতে কোনো আলোচনা-বিলোচনা নকৰাকৈয়ে এই সিদ্ধান্ত গ্ৰহণ কৰাত ক্ষোভ প্ৰকাশ কৰি বিৰোধী দলপতি দেৱব্ৰত শইকীয়াই মুখ্যমন্ত্ৰী হিমন্ত বিশ্ব শৰ্মালৈ এক পত্ৰ প্ৰেৰণ কৰে ৷ স্বাধীনতা সংগ্ৰামী এগৰাকীৰ প্ৰতি অসম বিজেপিয়ে গ্ৰহণ কৰা এই ব্যৱহাৰত ক্ষোভ প্ৰকাশ কৰে শইকীয়াই ৷ ডুমডুমা পৌৰসভাৰ এই কাৰ্যক ধিক্কাৰ দিয়াৰ লগতে পূৰ্বৰ স্থানতেই স-সন্মানে মহাত্মা গান্ধীৰ প্ৰতিমূৰ্তি স্থাপন কৰিবলৈ পত্ৰযোগে আহ্বান জনাই বিৰোধী দলপতিগৰাকীয়ে ৷
