তিনিচুকীয়া, 21 জুন : ৰাজ্যত বাৰিষাৰ দ্বিতীয়টো বানে প্লাৱিত কৰিছে প্ৰায় 19 খনকৈ জিলা ৷ য’ত ক্ষতিগ্ৰস্ত হৈছে প্ৰায় দুই লক্ষাধিক জনসাধাৰণ ৷ বান-খহনীয়াই ক্ষতিগ্ৰস্ত কৰিছে ৰাজ্যৰ বহু অঞ্চলৰ ৰাইজক ৷ প্ৰাপ্ত তথ্য় অনুসৰি, যি কোনো মুহূৰ্তত ব্ৰহ্মপুত্ৰৰ কোবাল সোঁতে ভাঙিব পাৰে ছৈখোৱাৰ মূল সুৰক্ষা বান্ধ ৷ ইয়াকে লৈ আতংকিত হৈ পৰিছে সেই অঞ্চলৰ বাসিন্দাসকল ৷
নিজৰ ভেঁটি-মাটি উছন হোৱাৰ ভয়ত নৈপৰীয়া ভকত বৈষ্ণৱ, আই মাতৃ আৰু স্থানীয় অঞ্চলৰ লোকসকলে আৰম্ভ কৰিছে পূজা-অৰ্চনা ৷ তেওঁলোকৰ মনোভাৱ- কিজানিবা পূজা-অৰ্চনা কৰিলে সন্তুষ্ট হয়েই মহাবাহু ব্ৰহ্মপুত্ৰ ৷ তেতিয়া উছন হোৱাৰ পৰা ৰক্ষা পৰিব তেওঁলোকৰ সপোনৰ ঘৰখন ৷
লগতে পঢ়ক: গছ বগৰাই ব্ৰহ্মপুত্ৰৰ প্ৰৱল খহনীয়া ৰোধৰ চেষ্টা নৈপৰীয়া ৰাইজৰ - Massive erosion in Nalbari
পূজা-পাতলৰ সমান্তৰালকৈ স্থানীয় ৰাইজে যুদ্ধকালীন প্ৰস্তুতিৰে মথাউৰি নিৰ্মাণ কৰাও দেখিবলৈ পোৱা যায় ৷ কাৰণ অঞ্চলটোত থকা পশ্চিম ছৈখোৱা হাতীঘূলী ফেলাই-নাওকটা মথাউৰিটোৰ প্ৰায়খিনি অংশই খহাই পেলাইছে ব্ৰহ্মপুত্ৰই ৷ সেয়ে দিনে-নিশাই স্থানীয় ৰাইজে হাতে-কামে লাগিছে মথাউৰিটো ৰক্ষা কৰিবলৈ ৷
