টীয়ক, 19 আগষ্ট : ৰাজ্য চৰকাৰৰ শক্তি বিভাগৰ স্মাৰ্ট মিটাৰ আৰু বৰ্ধিত বিদ্যুৎ মাচুলে জলা-কলা খুৱাইছে সৰ্বসাধাৰণ ৰাইজক ৷ বিজুলী ব্যৱহাৰ নকৰিলেও বিল অহা স্মাৰ্ট মিটাৰৰ আতিশয্যত অতিষ্ঠ হৈ পৰিছে ৰাইজ ৷ ফলত ঠায়ে ঠায়ে স্মাৰ্ট মিটাৰ, বৰ্ধিত বিদ্যুৎ মাচুল তথা শক্তি বিভাগৰ বিৰুদ্ধে ক্ষোভৰ উদগীৰণ ঘটিছে ৷ ইয়াৰ মাজতে সোমবাৰে যোৰহাটৰ টীয়কতো কৃষক মুক্তি সংগ্ৰাম সমিতি আৰু ৰাইজৰ দলৰ নেতৃত্বত শক্তি বিভাগৰ বিৰুদ্ধে ৰাজপথলৈ ওলাই আহিল ৰাইজ ৷
টীয়কৰ বৈদ্যুতিক সংমণ্ডলৰ কাৰ্যালয়ৰ সন্মুখত কৃষক মুক্তি সংগ্ৰাম সমিতি আৰু ৰাইজৰ দলৰ উদ্যোগত স্মাৰ্ট মিটাৰ আৰু বিদ্যুৎ মাচুল বৃদ্ধিৰ বিৰুদ্ধে প্ৰতিবাদী কাৰ্যসূচী গ্ৰহণ কৰে ৰাইজে ৷ প্ৰতিবাদস্থলীত হিমন্ত বিশ্ব শৰ্মাক ডকাইত আখ্যা দি চৰকাৰৰ এই সিদ্ধান্তক অনতি পলমে সলনি কৰি ৰাইজক উপকৃত কৰিবলৈ দাবী জনাই দুয়োটা সংগঠনৰ নেতৃত্বই ৷ অতি শীঘ্ৰেই এইক্ষেত্ৰত ব্যৱস্থা গ্ৰহণ নকৰিলে পুঁজিপতি আদানীৰ স্মাৰ্ট মিটাৰ ওফৰাই দিয়া হ’ব বুলি হুংকাৰ দিয়ে প্ৰতিবাদকাৰীসকলে ৷ লগতে ৰাইজৰ এই দাবী শীঘ্ৰেই মানি নল’লে পুনৰ তীব্ৰ গণতান্ত্ৰিক আন্দোলনৰ কাৰ্যসূচী ল’ব বুলিও প্ৰতিবাদকাৰীসকলে চৰকাৰক সকীয়াই দিয়ে ৷
লগতে পঢ়ক : বিদ্যুৎ মাচুল বৃদ্ধি আৰু স্মাৰ্ট মিটাৰৰ বিৰুদ্ধে তিনিচুকীয়াত সৰৱ আছু - AASU Protest
আনহাতে প্ৰতিবাদকাৰীসকলে কয় যে, অসমৰ দুখীয়া জনতাক স্মাৰ্ট মিটাৰৰ নামত চৰকাৰখনে ৰামঠগন দি ৰাজহ সংগ্ৰহ কৰিছে ৷ এইক্ষেত্ৰত মুখ্যমন্ত্ৰী হিমন্ত বিশ্ব শৰ্মাই ৰাইজক সকাহ দিবলৈ কোনো ব্যৱস্থা গ্ৰহণ কৰা নাই ৷ সেয়েহে এনেদৰে ৰাইজক ৰামটাঙোন মৰা কাৰ্যৰ বিৰোধিতা কৰি 2026ত চৰকাৰ ওফৰাই দিবলৈ বেছি পৰ নালাগে বুলি হুংকাৰ প্ৰদান কৰে প্ৰতিবাদী ৰাইজে ৷ লগতে প্ৰতিবাদস্থলীৰ পৰাই তেওঁলোকৰ সমস্যা সমাধানৰ দাবীত যোৰহাট জিলা বিদ্যুৎ বিভাগৰ কাৰ্যবাহী বিষয়াক স্মাৰকপত্ৰ প্ৰদান কৰে প্ৰতিবাদকাৰীসকলে ৷
উল্লেখ্য যে, শক্তি বিভাগে ঘৰে ঘৰে স্থাপন কৰা স্মাৰ্ট মিটাৰৰ বিৰুদ্ধে ভুক্তভোগী ৰাইজে দীৰ্ঘদিন ধৰি অভিযোগ উত্থাপন কৰি আহিছে ৷ বৰ্ধিত বিদ্যুৎ মাচুল আৰু স্মাৰ্ট মিটাৰৰ বিৰুদ্ধে বিভিন্ন দল-সংগঠন তথা ৰাইজে প্ৰতিবাদ সাব্যস্ত কৰি আহিছে যদিও ৰাজ্য চৰকাৰে এইক্ষেত্ৰত এতিয়ালৈকে কোনো ফলপ্ৰসূ ব্যৱস্থা গ্ৰহণ কৰা পৰিলক্ষিত হোৱা নাই ৷
লগতে পঢ়ক : বিদ্যুৎ বিভাগৰ বিৰুদ্ধে ৰাজ্যজুৰি আছুৰ বিক্ষোভ - AASU Protest
