গুৱাহাটী, 11 মে’ : ২০২৩ বৰ্ষত ইউ পি এছ চি পৰীক্ষাৰ স্থানপ্ৰাপক মেজৰ অভিনন্দন সিঙৰ সৈতে ই টি ভিৰ ভাৰতৰ সৈতে আছুতীয়া সাক্ষাৎকাৰ । ইউ পি এছ চি পৰীক্ষাৰ বাবে কিদৰে নিজকে প্ৰস্তুত কৰিব সেই বিষয়ে তেওঁ মন্তব্য কৰে ।
৯ বছৰ ভাৰতীয় সেনাত থাকি দেশ সেৱা কৰাৰ পিচত ইউ পি এছ চিৰ প্ৰতি কিয় আকৰ্ষিত হ’ল সেই বিষয়ে তেওঁ কয় যে ২০১৪ চনত ভাৰতীয় সেনাত যোগদান কৰিছিল । চাকৰি জীৱন তেওঁ অসমৰ তেজপুৰৰ পৰা আৰম্ভ কৰিছিল । ১০১৭ চনত এক প্ৰশিক্ষণ শিবিৰত ভৰিত আঘাত পোৱাৰ পিচতে তেওঁ উপলব্ধি কৰিছিল যে তেওঁ যিদৰে ভাৰতীয় সেনাত সেৱা কৰিব লাগিছিল তেনেদৰে কৰিব নোৱাৰিব ।
তাৰ পিচতে তেওঁ ২০১৯ পৰা ইউ পি এছ চিৰ বাবে প্ৰস্তুতি আৰম্ভ কৰে । ২০২১ চনত ইউ পি এছ চি পৰীক্ষাত অৱতীৰ্ণ হৈছিল যদিও সফল নোহোৱাত ২০২২ত পুনৰ চেষ্টা কৰি উত্তীৰ্ণ হয় । তথাপিও ৰেংকটো অৱনমিত হৈ থকাৰ ফলত ৰেংক উন্নীতকৰণৰ বাবে ২০২৩ত পুনৰ অৱতীৰ্ণ হয় । ২০২২ তকৈ ২০২৩ ৰ ফলাফলত উন্নত হয় তেওঁৰ ৰেংক ।
অভিনন্দন সিঙে ইউ পি এছ চিৰ বাবে প্ৰস্তুতি চলাই থকা ছাত্ৰ-ছাত্ৰীসকলক উদ্দেশ্যি কয় যে ডাঙৰ সপোন দেখিব লাগে আৰু সপোন পূৰণ কৰিবলৈ চেষ্টা কৰিব লাগে । ইউ পি এছ চিৰ প্ৰস্তুতি আৰম্ভ কৰাৰ পূৰ্বে পৰিকল্পনা কৰিব লাগে কেনেদৰে পঢ়িব, কি কিতাপ পঢ়িব ।
উত্তৰ-পূবত সঠিক শৈক্ষিক সজাগতা, পৰামৰ্শ আৰু নেতৃত্বৰ অভাৱৰ বাবে ইউ পি এছত উত্তীৰ্ণৰ হাৰ কম বুলি মন্তব্য কৰে মেজৰ অভিনন্দন সিঙে । অৱশ্যে তেওঁ কয় যে লাহে লাহে ইউ পি এছচিত উত্তীৰ্ণৰ সংখ্যা উত্তৰ-পূৰ্বাঞ্চলৰ পৰা ওলাইছে । তেওঁ লগতে কয়, ‘‘ অসম মোৰ হৃদয়ত আছে । অসমৰ মানুহ সহজ-সৰল, সহায়কাৰী । কাজিৰঙা, নামেৰীকে ধৰি পৰ্যটকৰ বাবে বিভিন্ন আকৰ্ষণীয় স্থান আছে অসমত । প্ৰায় ৯ বছৰৰ পিচত অসমলৈ আহি নষ্টালজিক হৈ পৰিছোঁ ৷’’
