মৰাণ, 19 জুলাই: বানৰ পাছতে এতিয়া ৰাজ্যৰ বিভিন্ন প্ৰান্তত প্ৰাদুৰ্ভাৱ ঘটিছে জাপানীজ এনকেফেলাইটিছ ৰোগৰ ৷ ক্ৰমাৎ ৰাজ্যত জটিল ৰূপ ধাৰণ কৰিছে এই জাপানীজ এনকেফেলাইটিছ ৰোগে । অৱশ্যে ইমানৰ পাচতো ৰাজ্যৰ স্বাস্থ্য বিভাগটোৱে প্ৰয়োজনীয় ব্যৱস্থা গ্ৰহণ নকৰাৰ অভিযোগ তুলিছে ভুক্তভোগী লোকে ৷
ৰাজ্যৰ বিভিন্ন প্ৰান্তৰ সমান্তৰালকৈ ডিব্ৰুগড় জিলাৰ বিভিন্ন প্ৰান্তত প্ৰতিদিনে চিনাক্ত হৈছে জাপানীজ এনকেফেলাইটিছ ৰোগী । কিন্তু জাপানীজ এনকেফেলাইটিছ প্ৰতিৰোধৰ বাবে ব্যৱস্থা গ্ৰহণত ব্যৰ্থ প্ৰতিপন্ন হৈছে মুখ্যমন্ত্ৰী হিমন্ত বিশ্ব শৰ্মাৰ স্বাস্থ্য বিভাগ ।
ভুক্তভোগীয়ে জানিবলৈ দিয়া মতে, মৰাণৰ 1 নং তিলৈজান গাঁৱত গণিতা হাজৰিকা (68) নামৰ এগৰাকী মহিলা জাপানীজ এনকেফেলাইটিছত আক্ৰান্ত হৈ বৰ্তমান ডিব্ৰুগড়ৰ অসম চিকিৎসা মহাবিদ্যালয়ত চিকিৎসাধীন হৈ আছে ৷ যোৱা 12 জুলাইৰ দিনা প্ৰথমে ডায়েৰীয়াত আক্ৰান্ত হোৱা মহিলাগৰাকীক পোনপ্ৰথমে মৰাণ-তিলৈ সামূহিক স্বাস্থ্যকেন্দ্ৰত ভৰ্তি কৰোৱা হৈছিল যদিও পিছত জাপানীজ এনকেফেলাইটিছত আক্ৰান্ত হোৱাত ডিব্ৰুগড়ৰ অসম চিকিৎসা মহাবিদ্যালয়ত ভৰ্তি কৰোৱা হয় ৷
খোৱাং ব্ল'ক প্ৰাথমিক স্বাস্থ্যকেন্দ্ৰৰ অন্তৰ্গত 1 নং তিলৈজান গাঁৱৰ মহিলাগৰাকী জাপানীজ এনকেফেলাইটিছত আক্ৰান্ত হোৱাৰ পাছতো কিন্তু অঞ্চলটোত ৰোগ প্ৰতিৰোধৰ বাবে স্বাস্থ্য বিভাগে বিশেষ কোনো তৎপৰতা গ্ৰহণ নকৰাৰ অভিযোগ উত্থাপন কৰিছে ভুক্তভোগী পৰিয়াল তথা স্থানীয় লোকে । পৰিয়ালটোৰ এগৰাকী সদস্য জাপানীজ এনকেফেলাইটিছত আক্ৰান্ত হোৱাৰ পাচতো সংশ্লিষ্ট স্বাস্থ্য বিভাগে আঁঠুৱা ঔষধিকৰণৰ বাদে কোনো প্ৰতিৰোধমূলক ব্যৱস্থা গ্ৰহণ নকৰা বুলি অভিযোগ তুলিছে ৷ ইয়ে অঞ্চলটোৰ অধিক লোকৰ ৰোগটোত আক্ৰান্ত কৰিব বুলি আশংকা ব্যক্ত কৰিছে স্থানীয় সচেতন ৰাইজে ।
গাঁওখনত ৰোগ প্ৰতিৰোধৰ বাবে ফগিং কৰাৰ লগতে তেজৰ নমুনা পৰীক্ষা কৰাৰ ব্যৱস্থা কৰিবলৈ ৰাইজে স্বাস্থ্য বিভাগক আহ্বান জনাইছে ৷
