গোলাঘাট, 22 মে’: অসম আৰক্ষীৰ গাত লাগিল পুনৰ চেকা লগালে এজন কাৰাধ্যক্ষই । কাৰাধ্যক্ষজন গোলাঘাট জিলা কাৰাগাৰৰ বুলি জানিব পৰা গৈছে । গোলাঘাটৰ কাৰাধ্যক্ষৰ বিৰুদ্ধে উত্থাপিত হৈছে এই ভয়ংকৰ অভিযোগ । কাৰাগাৰৰ চৌহদত থকা মহিলা চিকিৎসকক যৌন নিৰ্যাতন চলোৱাৰ অভিযোগত গ্ৰেপ্তাৰ কৰা হ’ল হিতেশ চৌধুৰী নামৰ গোলাঘাট কাৰাধ্যক্ষজন ।
দুটা দিন পূৰ্বে নিশা গোলাঘাট কাৰাগাৰৰ চৌহদত থকা কাৰাধ্যক্ষগৰাকীৰ বাসগৃহত মহিলা চিকিৎসক এগৰাকীক মাতি নি যৌন নিৰ্যাতন চলোৱাৰ গুৰুতৰ অভিযোগ উত্থাপন কৰিছে এগৰাকী মহিলা চিকিৎসকে । এই সন্দৰ্ভত মহিলা চিকিৎসকগৰাকীয়ে ঢেকিয়াল আৰক্ষী চকীত কাৰাধ্যক্ষ হিতেশ চৌধুৰীৰ বিৰুদ্ধে এটা গোচৰ ৰুজু কৰে । মহিলা চিকিৎসকগৰাকীৰ গোচৰৰ ভিত্তিত ঢেকিয়াল আৰক্ষীয়ে বুধবাৰৰ দিনৰ ভাগত ঘটনাটোৰ অভিযুক্ত কাৰাধ্যক্ষ হিতেশ চৌধুৰীক গ্ৰেপ্তাৰ কৰি আদালতত হাজিৰ কৰে । এই খবৰ বিয়পি পৰাৰ পাছতে অঞ্চলজুৰি তীব্ৰ চাঞ্চল্যৰ সৃষ্টি কৰা পৰিলক্ষিত হৈছে ৷
উল্লেখ কৰা প্ৰয়োজন যে বিজেপি নেতৃত্বাধীন ৰাজ্য চৰকাৰখনে নাৰীক সুৰক্ষা প্ৰদান কৰাৰ ক্ষেত্ৰত নিজকে দায়ৱদ্ধ বুলি সময়ে সময়ে দাবী কৰি আহিছে ৷ তেনে সময়তে ৰাজ্যত ক্ৰমৱৰ্ধমান হাৰত বৃদ্ধি হোৱা পৰিলক্ষিত হৈছে নাৰীজনিত অপৰাধৰ ঘটনা ৷ একেদৰে কাৰাগাৰৰ ভিতৰতো এতিয়া যে নাৰী জাতি সুৰক্ষিত নহয় তেনে এখন ছবিও পোহৰলৈ আহিছে ৷
সমগ্ৰ ঘটনাটোৰ বিৰুদ্ধে জাঙুৰ খাই উঠিছে জিলাখনৰ একাংশ দল-সংগঠন ৷ সমগ্ৰ ঘটনাৰ উচ্চ পৰ্যায়ৰ তদন্ত কৰি অভিযুক্তক উপযুক্ত শাস্তি প্ৰদানৰ দাবী জনাইছে জিলাখনৰ বিভিন্ন দল-সংগঠনে ।
