তিনিচুকীয়া, 9 জুলাই: ৰাজ্যত এতিয়া চৌদিশে বাঢ়নী পানীয়ে ধাৰণ কৰিছে সংহাৰী ৰূপৰ ৷ বানে এই ৰূপ ধাৰণ কৰাৰ ফলত ৰক্ষা পৰা নাই জীৱকূল ৷ বাঢ়নী পানীৰ কোবাল সোঁতে কৰবাত যদি বন্যপ্ৰাণীক উটুৱাই নিছে, কৰবাত আকৌ মৃত্যুমুখলৈ ঠেলি দিছে ৷
এই দুৰ্যোগপূৰ্ণ সময়ত তিনিচুকীয়া জিলাৰ বৃহত্তৰ বাৰেকুৰি অঞ্চলবাসীয়ে সমাজৰ আগত দাঙি ধৰিছে এক অনন্য নিদৰ্শন ৷ বন্যপ্ৰাণীৰ প্ৰতি দেখুওৱা প্ৰেমে বহুতৰে অন্তৰ জয় কৰিবলৈ সক্ষম হৈছে ৷ জানিব পৰা মতে, বাৰেকুৰি অঞ্চলৰ বৰগাঁৱত বিগত কিছুমাহৰ পৰা দুটাকৈ ছাগলী পহুৱে বিচৰণ কৰি ফুৰিছিল ৷ কিছুদিনৰ পাচত গাঁওবাসীয়ে প্ৰত্যক্ষ কৰিছিল পহু দুটা ৷ পহু দুটা গাঁওবাসীয়ে প্ৰত্যক্ষ কৰাৰ পাচতে সকলোৱে পহু দুটাক সংৰক্ষণ কৰাৰ লগতে কোনেও যাতে হত্যা কৰিব নোৱাৰে সেয়া নামঘৰত ৰাজহুৱাকৈ ঘোষণা কৰে আৰু সকলোৱে পৰ্যাপ্ত পৰিমাণে যতন লয় পহু দুটাক ৷
দুৰ্ভাগ্যজনিত বিষয় যে, সোমবাৰে এটা পহুৰ শিং এখন ফেন্সিঙত লাগি ধৰে আৰু পহুটোক কুকুৰেও কামুৰি আঘাতপ্ৰাপ্ত কৰে ৷ সেই দৃশ্য প্ৰত্যক্ষ কৰি স্থানীয় এজন লোকে কুকুৰৰ পৰা ৰক্ষা কৰি পহুটো উদ্ধাৰ কৰি ঘৰলৈ লৈ আহে ৷ প্ৰথমে লোকজনে গাঁওবাসীৰ সহযোগত ঘৰতে প্ৰাথমিক চিকিৎসা পহুটোক প্ৰদান কৰে আৰু পৰৱৰ্তী সময়ত পশু চিকিৎসকৰ জৰিয়তে চিকিৎসা প্ৰদান কৰে পহুটোক ৷
ঘৰতেই পহুটোক চিকিৎসা কৰাৰ সমান্তৰালভাৱে গাঁৱৰ ৰাইজে বন বিভাগক সমগ্ৰ ঘটনা সন্দৰ্ভত ইতিমধ্যে অৱগত কৰিছে ৷ কিন্তু গাঁওবাসীয়ে অতি মৰমেৰে ৰখা পহুটো বন বিভাগে চিকিৎসা কৰিবলৈ নিলেও কোনো বনাঞ্চলত মুকলি নকৰি পুনৰ বৰগাঁৱতে মুকলি কৰি দিবলৈ আহ্বান জনাইছে ৷
