গুৱাহাটী, ২৫ জুলাই : গুৱাহাটীবাসীৰ বাবে সুখবৰ । কাৰণ গুৱাহাটীত সংযোজিত হ'ব ভাৰতৰ প্ৰথমটো নদী টাৰ্মিনেল । অহা অক্টোবৰত এই নদী টাৰ্মিনেলটো মুকলি কৰা হ'ব । The Assam Inland Water Transport Development Society কাৰ্যালয়ে এই কথা সদৰী কৰিছে ।
উল্লেখ্য যে, ২০২২ চনৰ ১৩ মে’ত অসমৰ মুখ্যমন্ত্ৰী হিমন্ত বিশ্ব শৰ্মাই ভাৰতৰ প্ৰথমটো অত্যাধুনিক নদী ফেৰী টাৰ্মিনেল গুৱাহাটী গেটৱে ঘাট (জিজিজি)ৰ নিৰ্মাণকাৰ্যৰ শুভাৰম্ভ কৰিছিল । The Assam Inland Water Transport Development Society কাৰ্যালয়ৰ পৰা জনোৱা মতে, নদী টাৰ্মিনেলটোৰ ৯০ শতাংশ কাম প্ৰায় সম্পূৰ্ণ হৈছে । বিশ্ব বেংকৰ পৰা প্ৰায় ৩০৫ কোটি টকাৰ পুঁজিৰে এই নদী টাৰ্মিনেলটো নিৰ্মাণ কৰা হৈছে ।
লগতে পঢ়ক : লুইতৰ পাৰত দেশৰ প্ৰথম নদী ফেৰী টার্মিনেলৰ আধাৰশিলা
কি থাকিব নদী টাৰ্মিনেলত ? :
এই নদী টাৰ্মিনেলটোত আভ্যন্তৰীণ জল পৰিবহণ অসমৰ অধীনৰ সকলো ফেৰী, জাহাজ আদিৰ যাত্ৰা কৰা হ'ব । ক’বলৈ গ'লে একপ্ৰকাৰ উৰাজাহাজৰ বাবে যেনেদৰে গুৱাহাটী বিমানবন্দৰ আছে, তেনেদৰে জাহাজৰ বাবে অসমত প্ৰথমবাৰৰ বাবে এনেধৰণ নদী বন্দৰ অৰ্থাৎ নদী টাৰ্মিনেল নিৰ্মাণ কৰা হৈছে । এয়া ভাৰতৰ ভিতৰত প্ৰথম ।
গুৱাহাটীৰ মহেন্দ্ৰ মোহন চৌধুৰী হাস্পতালৰ পিচফালে অৰ্থাৎ ফাচীবজৰৰ ব্ৰহ্মপুত্ৰ নদীৰ ঘাটত এই নদী টাৰ্মিনেল নিৰ্মাণ কৰা হৈছে । নদী টাৰ্মিনেলত ১০০ জন যাত্ৰী বহিব পৰা অপেক্ষাগৃহ থাকিব । লগতে থাকিব বজাৰগৃহ, ৰেষ্টোৰা, টিকট ঘৰ আদি ।
নদী টাৰ্মিনেলটোত ১৮০ মিটাৰ দৈৰ্ঘৰ বিশেষ পথ নিৰ্মাণ কৰা হৈছে । এই পথেৰে যাত্ৰী আৰু বাহন জাহাজত উঠিব পাৰে । এয়া বিশেষভাৱে নিৰ্মাণ কৰা হৈছে, যাতে নদীৰ পানী কমিলে বা বাঢ়িলে কোনো অসুবিধা নহয় ।
লগতে পঢ়ক : গুৱাহাটীৰ পৰা ঢাকা, কাঠমাণ্ডুলৈ চলিব এয়াৰ ইণ্ডিয়া এক্সপ্ৰেছৰ বিমান - Guwahati Airport
ব্ৰহ্মপুত্ৰত জাহাজ দুৰ্ঘটনাত উদ্ধাৰৰ ঐতিহাসিক সংযোজন :
এই নদী টাৰ্মিনেলটোত নতুন নতুন দিশ সংযোজিত কৰা হৈছে । অসমত ব্ৰহ্মপুত্ৰ নদীত জাহাজ আৰু ফেৰী দুৰ্ঘটনা হ'লে আভ্যন্তৰীণ জল পৰিবহণৰ কোনো অনুসন্ধান আৰু উদ্ধাৰ কৰা শাখা (Search and rescue unit) নাছিল । কিন্তু এতিয়াৰে পৰা গুৱাহাটী গেটৱে ঘাট (জিজিজি)ত search and rescue unit থাকিব । এই search and rescue unit টো Integrated Command & Control Center (ICCC) ৰ অধীনত থাকিব ।
অসমৰ বিভিন্ন নদীত চলাচল কৰি থকা আভ্যন্তৰীণ জল পৰিবহণ অসমৰ অধীনৰ জাহাজ বা ফেৰীক জি পি এছ ব্যৱস্থাৰ জৰিয়তে ICCC নিৰীক্ষণ কৰি থাকিব ।
অসমত নতুনকৈ চাৰিটাকৈ নিৰ্মাণ হৈ আছে নদী টাৰ্মিনেল :
গুৱাহাটী গেটৱে ঘাট (জিজিজি) ৰ লগতে অসমত ব্ৰহ্মপুত্ৰ নদীৰ ওপৰত উত্তৰ গুৱাহাটী ঘাট, উমানন্দ ঘাট, যোৰহাটৰ নিমাতী ঘাট আৰু মাজুলী অফলামুখ ঘাটত নদী টাৰ্মিনেল নিৰ্মাণ কৰি থকা হৈছে । এই নদী টাৰ্মিনেল চাৰিটাৰ ৩০ শতাংশ কাম প্ৰায় সম্পূৰ্ণ হৈছে । অহা ডিচেম্বৰত এই নদী টাৰ্মিনেল চাৰিটা মুকলি কৰাৰ লক্ষ্য নিৰ্ধাৰণ কৰা হৈছে ।
উল্লেখ্য যে, নদী টাৰ্মিনেল এই উন্নয়নে দেশৰ পৰিবহণ আৰু লজিষ্টিক খণ্ডত এক উল্লেখযোগ্য মাইলৰ খুঁটি হিচাপে চিহ্নিত হ'ব । এই টাৰ্মিনেলটোৱে সামগ্ৰীৰ পৰিবহণৰ লগতে ফেৰী যাত্ৰীকো সুচাৰুৰূপে আৰু অধিক কাৰ্যক্ষম কৰি ৰাজ্যখনৰ অৰ্থনীতি বৃদ্ধি বুলি আশা কৰা হৈছে ৷
জিজিজিয়ে গুৱাহাটী আৰু ওচৰৰ নদী প্ৰৱেশ পইণ্ট বা ঘাটৰ যাত্ৰীসকলৰ বাবে বছৰজুৰি নদীৰ কাষেৰে নিৰাপদ আৰু উপভোগ্য পৰিবহণৰ ব্যৱস্থা কৰিব ।
লগতে পঢ়ক : গুৱাহাটী-উত্তৰ গুৱাহাটী সংযোগী ৰ'পৱে ভাৰা শিক্ষাৰ্থীৰ বাবে ৫০% হ্ৰাস - Guwahati ropeway service
