গুৱাহাটী: ২০২৫ বৰ্ষত অনুষ্ঠিত হ'বলগীয়া হাইস্কুল শিক্ষান্ত পৰীক্ষাৰ বাবে এক বিশেষ জাননী অসম ৰাজ্যিক বিদ্যালয় শিক্ষা পৰিষদৰ । হাইস্কুল শিক্ষান্ত পৰীক্ষাৰ প্ৰ-পত্ৰ পূৰণৰ প'ৰ্টেল পুনৰ মুকলি কৰি দিছে পৰিষদে । ২০২৫ বৰ্ষত অনুষ্ঠিত হ'বলগীয়া হাইস্কুল শিক্ষান্ত পৰীক্ষাৰ প্ৰ-পত্ৰ পূৰণৰ বাবে অহা ২৫ নৱেম্বৰত পুনৰ পৰ্টেলটো মুকলি কৰিব দিয়া হ'ব বুলি জাননী জাৰি কৰিছে ৰাজ্যিক বিদ্যালয় শিক্ষা পৰিষদে ।
শুকুৰবাৰে প্ৰকাশ কৰা জাননী অনুসৰি, ২৫ নৱেম্বৰত মেট্ৰিকৰ প্ৰ-পত্ৰ পূৰণৰ প'ৰ্টেল পুনৰ মুকলি কৰা হ'ব । প্ৰ-পত্ৰ পূৰণৰ বাকী থকা সকলো কাম ২৬ নৱেম্বৰৰ ভিতৰত সম্পূৰ্ণ কৰিবলৈ পৰিষদে সংশ্লিষ্ট শিক্ষানুষ্ঠানসমূহক নির্দেশ দিছে । যদি পূৰ্বে পূৰণ কৰা প্ৰ-পত্ৰত কোনো আঁসোৱাহ ৰৈ গৈছে তেনেহ'লে সেইসমূহ আঁতৰ কৰিব পাৰিব ।
একেদৰে মাচুল আদায়ৰ অন্তিম তাৰিখ নির্ধাৰণ কৰা হৈছে ২৭ নৱেম্বৰ । নির্দেশনাত পৰিষদে স্পষ্ট কৰি দিছে যে প্ৰ-পত্ৰ পূৰণৰ দিন পৰৱৰ্তী সময়ত বৃদ্ধি কৰা নহয় । লগতে অফ লাইনত কোনোধৰণৰ প্ৰ-পত্র গ্রহণ কৰা নহ'ব বুলিও পৰিষদে নির্দেশনাত উল্লেখ কৰিছে ।
উল্লেখ্য যে, ২০২৫ বৰ্ষত অনুষ্ঠিত হ’বলগীয়া হাইস্কুল শিক্ষান্ত পৰীক্ষাত অৱতীৰ্ণ হোৱাৰ বাবে অসম ৰাজ্যিক বিদ্যালয় শিক্ষা পৰিষদে অনলাইন প’ৰ্টেলৰ জৰিয়তে প্ৰ-পত্ৰ পূৰণৰ দিন ঘোষণা কৰিছিল । সেই অনুসৰি ২৩ অক্টোবৰৰ পৰা ১৪ নৱেম্বৰলৈ বিদ্যালয়সমূহে sebaregistration.org শীর্ষক প’ৰ্টেলৰ জৰিয়তে প্ৰ-পত্ৰ পূৰণ কৰিব পাৰিব বুলি ঘোষণা কৰিছিল যদিও পুণৰ ২৫ নৱেম্বৰত প্ৰ-পত্ৰ পূৰণৰ বাবে পৰ্টেল মুকলি কৰি দিয়া হ'ব ।
