গুৱাহাটী, ১১ মে': গুৱাহাটী চিকিৎসা মহাবিদ্যালয় হাস্পতালৰ ৰাজ্যিক কৰ্কট প্ৰতিষ্ঠানত চিকিৎসাধীন হৈ থকা বিৰুৱালা ৰাভাৰ স্বাস্থ্য আগতকৈ কিছু উন্নত হৈছে ৷ চিকিৎসালয় কৰ্তৃপক্ষই আজি জানিবলৈ দিয়ে এই কথা । দীৰ্ঘদিন ধৰি দুৰাৰোগ্য জটিল ৰোগত আক্ৰান্ত সংগ্ৰামী নাৰী সত্ত্বা বিৰুৱালা ৰাভাই বিগত ২২ এপ্ৰিলৰ পৰা চিকিৎসা মহাবিদ্যালয় হাস্পতালৰ চিকিৎসাধীন হৈ আছিল ৷
৪ মে'ত তেওঁ স্বাস্থ্যৰ অধিক অৱনতি ঘটাত চিকিৎসালয়খনৰ আইচিইউত ভৰ্তি কৰা হয় । বৰ্তমানো তেওঁ ICU তেই চিকিৎসাধীন হৈ আছে যদিও স্বাস্থ্য আগতকৈ কিছু উন্নত হৈছে চিকিৎসালয় কৰ্তৃপক্ষই আজি জানিবলৈ দিয়ে । ২০২১ বৰ্ষত পদ্মশ্ৰী সন্মানেৰে বিভূষিত বিৰুবালা ৰাভা বৰ্তমান কৰ্কট ৰোগৰ ৩য় পৰ্যায়ত আছে বুলিও চিকিৎসকে জানিবলৈ দিয়ে ৷
আনহাতে আজি বিৰুবালা ৰাভাৰ স্বাস্থ্যৰ বুজ লয় মন্ত্ৰী চন্দ্ৰমোহন পাটোৱাৰীয়ে । ইপিনে ২০২১ বৰ্ষত পদ্মশ্ৰী সন্মানেৰে বিভূষিত বিৰুবালা ৰাভাৰ উন্নত চিকিৎসাৰ বাবে ৰাজ্য চৰকাৰক আহ্বান জনাইছে ইলোৰা বিজ্ঞান মঞ্চই । উল্লেখ্য যে গোৱালপাৰা জিলাৰ অসম-মেঘালয় সীমান্তৰ ঠাকুৰভিলা নামৰ এখন ভিতৰুৱা গাঁৱৰ এটি সাধাৰণ পৰিয়ালত ১৯৫৪ চনত বীৰুবালা ৰাভাৰ জন্ম হৈছিল ।
শৈশৱৰ ঘৰখনত বহু কষ্টেৰে ডাঙৰ-দীঘল হোৱা ৰাভাই মাত্ৰ পঞ্চম শ্ৰেণীলৈকে পঢ়া-শুনা কৰাৰ পাছতেই বিদ্যালয় এৰিবলগীয়া হৈছিল । ঠাকুৰভিলা গাঁৱৰ এগৰাকী কৃষকৰ সৈতে বিবাহপাশত আৱদ্ধ হৈছিল ৰাভা ৷ ২০০০ চনৰ পৰাই তেওঁ সমাজত প্ৰচলিত ডাইনী প্ৰথাৰ বিৰুদ্ধে জনজাগৰণৰ সৃষ্টি কৰি আহিছে । প্ৰথমতে গোৱালপাৰা জিলাতে ডাইনী হত্যাৰ বিৰুদ্ধে জনসচেতনতা আনিবলৈ চেষ্টা কৰি যোৱা দুটা দশক ধৰি তেওঁ এই অন্ধবিশ্বাস আঁতৰ কৰিবলৈ সংগ্ৰাম চলাই আহিছে ।
