পদুলিত হেপাঁহৰ ৰঙালী ৷ তিনিটি বিহুৰ অন্যতম আমাৰ চেনেহৰ ৰঙালী বিহু অসমীয়াৰ আয়ুস ৰেখাস্বৰূপ ৷ বসন্ত কালৰ আগমণত ব’হাগ বিহু বা ৰঙালী বিহু উদযাপন কৰা হয় ৷ ৰঙালী বিহুক যৌৱনৰ উৎসৱ বুলি কোৱা হয় ৷ ব’হাগ বা ৰঙালী বিহু সাতদিন ধৰি উদযাপন কৰা হয় ৷
চ’তৰ সংক্ৰান্তিৰ দিনাৰ পৰা আৰম্ভ কৰি ব’হাগৰ ৬ তাৰিখলৈ সাত দিন ধৰি বিহু উদযাপন কৰা হয় ৷ ইয়াক “সাত বিহু” বুলিও জনা যায় ৷ চ’তৰ দোমাহীৰ দিনা গৰু বিহুৰে আৰম্ভ হৈ ক্ৰমাৎ মানুহ বিহু, গোসাঁই বিহু, তাঁতৰ বিহু, নাঙলৰ বিহু, জীয়ৰী বা চেনেহী বিহু আৰু শেষৰ দিনা চেৰা বিহুৰে বহাগ বিহুৰ সামৰণি পৰে ৷ ব’হাগৰ বিহুত মাহ-হালধীৰে গা ধোৱা, গৰু গা ধুওৱাকে ধৰি অসমীয়া সমাজ জীৱনৰ কিছুমান এৰাব নোৱাৰা লোক পৰম্পৰা থাকে ৷
ব’হাগ বিহুত পালন কৰি অহা এনে বিভিন্ন লোক পৰম্পৰাৰ ভিতৰত অন্যতম হৈছে এশ এবিধ শাক খোৱা পৰম্পৰা ৷ অসমত পুৰণি কালৰ পৰা গৰু বিহুৰ দিনা ১০১ বিধ শাক-পাচলি খোৱাৰ পৰম্পৰা চলি আহিছে ৷ এই শাক-পাচলিৰ ভাজিখন খাবলৈ সোৱাদযুক্ত হোৱাৰ উপৰিও আমাৰ গোটেই বছৰটোৰ কাৰণে বিভিন্ন বেমাৰ-এজাৰৰ পৰা হাত সৰাত সহায় কৰে বুলি কয় ৷ ই স্বাস্থ্যৰ পক্ষে অতি লাভজনক ৷ গৰুৰ বিহুৰ দিনা এই 101 বিধ শাক খোৱা হয় ৷
অৱশ্যে বৰ্তমান সময়ত চহৰ অঞ্চলত আজিকালি 101 বিধ শাক-পাত পোৱা নাযায় বাবে কিছুলোকে পৰম্পৰা ধৰি ৰাখি সাতবিধ শাকেৰে ‘সাতশাকী’, আকৌ কোনোৱে বিযোৰ সংখ্যাত যিমানেই শাক সংগ্ৰহ কৰিব পাৰে সিমান প্ৰকাৰৰ শাক সংগ্ৰহ কৰি ৰাতিৰ সাঁজত খায় ৷
এই 101 বিধ শাকৰ নামৰ লগতে গুণাগুণসমূহ জানো আহক
1) সৰু মানিমুনি – স্মৰণ শক্তি বৰ্দ্ধক, গ্ৰহণী নাশক ।
2) বৰ মানিমুনি – পেটৰ ৰোগ নাশক, স্নায়ু সবল কাৰক ।
3) মচন্দৰী – গ্ৰহণী নাশক, জ্বৰ, নিউমোনিয়া ৰোগত উপকাৰী ।
4) নৰসিংহ – চকুৰ দৃষ্টিশক্তি বৰ্দ্ধক, পেটৰ বিষ নাশক ।
5) তিতা ভেঁকুৰী – ক্ৰিমি নাশক, তেজ পৰিষ্কাৰক, হাঁইফাই নাশক ।
6) পনৌনৌৱা – ৰক্তবৃদ্ধি কাৰক, শোথনাশক, ঘাঁ শুকুৱায় ।
7) ভেদাইলতা – শক্তিদায়ক, বাত, গ্ৰহণী নাশক ।
8) ঢেঁকীয়া – পেট পৰিষ্কাৰক, ৰক্তবৰ্দ্ধক, শুক্ৰবৰ্দ্ধক ।
9) তিতামৰা – ক্ৰিমি, পেলু, বহুমূত্ৰ, জ্বৰ নাশক ।
10) টেঙেচি – স্মৰণ শক্তি বৃদ্ধিকাৰক, গ্ৰহণী নাশক ।
11) চজিনা – কুকুৰীকণা প্ৰতিৰোধক, বায়ুনাশক ।
12) কালমেঘ – যকৃত শক্তি দায়ক, মেলেৰীয়া, বহুমূত্ৰ নাশক, ৰক্ত পৰিষ্কাৰক।
13) জিলমিল – ভোক বৃদ্ধি কাৰক, বায়ু, পিত্ত, ক্ৰিমি নাশক ।
14) কচুঠুৰি – ৰক্তবৰ্দ্ধক, তেজ পৰিষ্কাৰক, শুক্ৰবৰ্দ্ধক ।
15) কলমৌ শাক – স্তনত গাখীৰ বৃদ্ধি কৰে, শুক্ৰবৰ্দ্ধক ।
16) কেহৰাজ – চুলি ক’লা কৰে, জণ্ডিচত উপকাৰী ।
17) খুতুৰা শাক – ভোক লগায়, পিত্ত, কফ, বিষ নাশক ।
18) কাটা খুতুৰা – গ্ৰহণী আৰু বিষ নাশক ।
19) গাজৰ – কৰ্কট ৰোগ প্ৰতিৰোধক, কুকুৰীকণা ৰোগীৰ সুপথ্য, শুক্ৰ বৰ্দ্ধক ।
20) লাইজাবৰি – কফ নাশক, চাইনাচাইটিচত উপকাৰী ।
21) শুকলতি – গ্ৰহণী, প্ৰসূতি ৰোগ নাশক, গাঁঠিৰ বিষ উপশম কৰে ।
22) দহিকচু – ফিটাপেলু নাশক, কোষ্ঠকাঠিন্য নাশক ।
23) ওলকচু – কেঁচুমূৰীয়া, সঞ্চিতগ্ৰহণী নাশক ।
24) টিকনিবৰুৱা – শক্তিদায়ক ।
25) ধনিয়া পাত– চকুৰ দৃষ্টিশক্তি বৰ্দ্ধক, প্ৰজনন শক্তি বৃদ্ধিকাৰক, যক্ষ্মা, দন্তক্ষয়, পেটৰ শব্দ নাশক ।
26) চুকাশাক – বায়ু নাশক ।
27) দোৰোণবন – বাতশ্লেষ্মা নাশক, হজমী কাৰক, অৰ্শ, শোথৰ সুপথ্য ।
28) নেফাফু – উচ্চ ৰক্তচাপ নিয়ন্ত্ৰিত ।
29) পদিনা – গাৰ দুৰ্গন্ধ নাশক, ৰক্ত বৃদ্ধি কাৰক, পেটৰ বিষ নাশক, বাধক বেদনা নাশক ।
30) পুৰৈ শাক – পুষ্টিকৰ, কুকুৰীকণা নাশক, এলাৰ্জিত উপকাৰী, স্মৃতি শক্তি বৰ্দ্ধক ।
31) পালেং শাক – ৰক্ত, পিত্ত, বিষ দোষ নাশক, শিশুৰ পয়াঁলগা ৰোগ ভাল কৰে, ছাল নিমজ কৰে ।
32) পাতেগজা – প্ৰস্ৰাৱৰ ৰোগ নাশক, বৃক্কৰ পাথৰ নাশক, জণ্ডিচ ৰোগৰ সুপথ্য ।
33) পানী টেঙেচি – ত্ৰিদোষ নাশক, অগ্নিবৰ্দ্ধক, নিদ্ৰাকাৰক, গ্ৰহণী ৰোগত উপকাৰী ।
34) ব্ৰাহ্মী শাক – স্মৰণ শক্তি বৃদ্ধিকাৰক, মৃগী ৰোগ নাশক, মাত পৰিষ্কাৰ কৰে, বায়ু সবল কৰে ।
35) বাহক তিতা – কফ বাহিৰ কৰে, যক্ষ্মাৰোগ নাশক, প্ৰমেহ, কুষ্ঠ নাশক ।
36) ভাঙৰ পাত – ভোক লগায়, কামভাৱ জাগৃত কৰে, নিদ্ৰাজনক ।
36) মহাভৃংগৰাজ – চুলিৰ টনিক, পাণ্ডুৰোগ নাশক ।
37) মটৰ মাহ – স্তনত গাখীৰ বৃদ্ধি কৰে ।
39) মহানিম – তেজ পৰিষ্কাৰক, মেলেৰীয়া, বহুমূত্ৰ ৰোগ নাশক, বীজাণু আৰু কীটাণু নাশ কৰিব পাৰে ।
40) মেথিশাক – বহুমূত্ৰ ৰোগ নিয়ন্ত্ৰক, মাজু আইত উপকাৰী ।
41) মাটিকাঁদুৰি – পেটৰ ৰোগৰ কাৰণে উপকাৰী ।
42) মূলা – পাথৰি ৰোগৰ কাৰণে উপকাৰী ।
43) মালভোগ শাক – পিত্তৰোগ নাশক, অগ্নিবৰ্দ্ধক, অৰ্শ নাশক ।
44) মৰিচা শাক – স্মৰণ শক্তি বৰ্দ্ধক, শৌচ স্বাভাৱিক কৰে, কৰ্কট ৰোগৰ পথ্য ।
45) মানকচু – ৰক্ত পিত্ত আৰু শোথ নাশক ।
46) সৰিয়হ শাক – বায়ু, পিত্ত, কফ নাশক, চকুৰ কাৰণে উপকাৰী ।
47) কাচকল – ক্ৰিমি, গ্ৰহণী নাশক, ৰক্তবৰ্দ্ধক ।
48) বনজালুক – ছালৰ ৰোগ, পেটৰ ৰোগ নাশক ।
49) টেঙামৰা – গ্ৰহণী নাশক ।
50) তিতাফুল – হাঁইফাই, পেলুনাশক, তেজ বৰ্দ্ধক ।
51) চেংমৰা - কেঁচুমূৰীয়া নাশক, প্ৰসূতি ৰোগ নাশক ।
52) মধুসোলেং – গ্ৰহণী আৰু পেটৰ ৰোগ নাশক ।
53) তিতা কেৰেলা – ৰক্ত পৰিষ্কাৰক, বহুমুত্ৰ ৰোগ নিয়ন্ত্ৰক, ৰক্তবৰ্দ্ধক, খজুৱতি নাশক ।
54) কপৌঢেঁকীয়া – শক্তিদায়ক ।
55) বেতগাজ – ক্ৰিমি নাশক, ৰক্তবৰ্দ্ধক ।
56) তেজপাত –সুগন্ধিদায়ক, হৃদযন্ত্ৰ শক্তি দায়ক ।
57) তিঁয়হ – পিত্ত পাথৰি ৰোগ নাশক, চকু উজ্জ্বল কৰে ।
58) চিৰতা – মেলেৰিয়া, বহুমূত্ৰ, তেজৰ ৰোগ নাশক ।
59) কেঁচা জলকীয়া – স্মৰণ শক্তি বৰ্দ্ধক, ডিঙি, মুখ, খাদ্যনলীৰ বীজাণু নাশক, চকুৰ কাৰণে উপকাৰী।
60) কালজিৰা – গৰ্ভাশয় ৰোগত উপকাৰী,
61) উৰহী – শুক্ৰকাৰক, বলকাৰক।
62) পচলা – শৌচ স্বাভাৱিক কৰে, যক্ষ্মাৰোগ নাশক।
63) কঁঠাল – বলকাৰক, গুটি – শুক্ৰবৰ্দ্ধক।
64) অমিতা – হজম কাৰক, যকৃত টনিক, কৰ্কটৰোগ, কুকুৰীকণা নাশক, পেটৰ ঘাঁ শুকুৱায়।
65) ৰঙালাউ – চকুৰ দৃষ্টি শক্তি বৰ্দ্ধক, দাঁত মজবুত কৰে, গুটিয়ে শুক্ৰ বৃদ্ধি কৰে ।
66) মৰলীয়া – পেট পৰিষ্কাৰক, পেটৰ ঘা, বদহজম, গ্ৰহণী, অনিদ্ৰা নাশক, বুদ্ধিকাৰক, মেদ নিবাৰিত কৰে।
67) বাবৰিশাক – ক্ৰিমি নাশক, ছালৰ কমনীয়তা বৰ্দ্ধক, বীৰ্যবৰ্দ্ধক, চকুৰ বাবে উপকাৰী ।
68) হেলচি শাক – স্নায়ু সবল কৰে, গনোৰিয়া, চিফিলিচ ৰোগৰ পথ্য, শুক্ৰ গাঢ় কৰে ।
69) শুহনিবন – জিভাৰ আৰু মুখৰ ভিতৰত ঘা নাশক, কফ বাহিৰ কৰে ।
70) তিতাফুল – মেলেৰিয়া, কলাজ্বৰ, ক্ৰিমি, অৰুচি নাশক, বাতবিষত উপকাৰী, জণ্ডিচত সুপথ্য ।
71) মোৱা আলু – মহিলাৰ স্তনত গাখীৰ বৃদ্ধি কৰে ।
72) বকফুল – ক্ৰিমি, ৰক্ত পিত্ত নাশক, স্মৰণ শক্তি বৰ্দ্ধক, মৃগী ৰোগীৰ সুপথ্য ।
73) ভাতকেৰেলা – পুষ্টিকাৰক ।
74) আদা – হজমিকাৰক, কাহ, বমি, বীজাণু নাশক ।
75) হালধি – কৰ্কট ৰোগ প্ৰতিৰোধক, তেজ পৰিষ্কাৰক, বিসনাশক, পিত্ত, এলাৰ্জি নাশক ।
76) ভূতমলা – পালজ্বৰ নাশক ।
77) ফুটকলা – মুখৰ ভিতৰৰ ঘাঁ শুকায়, ৰক্তবৰ্দ্ধক(ফল), গ্ৰহণী নাশক ।
78) জেতুলীপকা – ৰক্তবৰ্দ্ধক ।
79) কলডিল – ৰক্ত বৃদ্ধিকাৰক, নিম্ন ৰক্তচাপৰ সুপথ্য ।
80) বিলাহী – তেজবৰ্দ্ধক, ছাল নিমজ কাৰক ।
81) চয়াবিন– যকৃতৰ টনিক, পিত্ত, কৰ্কট ৰোগ প্ৰতিৰোধক ।
82) নহৰু– মহৌষধি, বীজাণুনাশক, স্নায়ুসবল কাৰক, হজমিকাৰক, বহুমূত্ৰ ৰোগত উপকাৰী ।
83) পিয়াঁজ– মুখৰ আৰু খাদ্যনলীৰ বীজাণুনাশক, ৰক্তবৰ্দ্ধক, যক্ষ্মাৰোগৰ বীজাণু নাশক, শুক্ৰবৰ্দ্ধক ।
84) জালুক– বীজাণু নাশক, গা বিষ নাশক ।
85) ৰঙাআলু– ৰক্তবৰ্দ্ধক, শুক্ৰবৰ্দ্ধক ।
86) আলু– পুষ্টিকাৰক, জুইয়ে পোৰা ঘাঁ শুকুৱায় ।
87) পানীলাউ– পুষ্টিকৰ, শুক্ৰবৰ্দ্ধক ।
88) ৰঙা মৰিচা– স্মৰণ শক্তি বৰ্দ্ধক, কোষ্ঠকাঠিন্য নাশক ।
89) ভোট জলকীয়া– পেটৰ ঘাঁ নাশক, বীজাণু নাশক ।
90) কাজিনেমু– ছাল নিমজ কৰে, খাদ্য হজম কৰে, উচ্চ ৰক্তচাপ নিয়ন্ত্ৰক ।
91) শেৱালি ফুল– ক্ৰিমি নাশক, জ্বৰ নাশক ।
92) বেঙেনা– ৰক্তবৰ্দ্ধক ।
93) জিকা – পুষ্টিকৰ, গুটি চাইনাচাইটিচ নাশক ।
94) ভোল – পুষ্টিকাৰক ।
95) ফেচবিন – শৰীৰ বাঢ়নত সহায় কৰে ।
96) ভেন্দি – পুষ্টিকৰ, বগাস্ৰাৱ নাশক ।
97) মানধনিয়া – হজমিকাৰক, সুগন্ধিদায়ক, ৰুচিকৰ ।
98) লেচেৰামাহ – পুষ্টিকৰ খাদ্য ।
99) হাতীভেঁকুৰি – ৰক্ত পৰিষ্কাৰক, পেটৰ ৰোগৰ সুপথ্য ।
100) ভুঁই আমলখি – জণ্ডিচ ৰোগ নাশক, যকৃত শক্তিশালী কৰে ।
101) ধঁপাত তিতা – ক্ৰিমি নাশক, মেলেৰিয়া জ্বৰ নাশক ।
উৎস (বিকাশপেডিয়া)
লগতে পঢ়ক: ঢোলৰ শব্দত কঁপিছে ছয়গাঁও
