গুৱাহাটী : ভৰলুত গছ কটাৰ বিৰুদ্ধে চিত্ৰ অংকন কৰি আটক হ'ল চিত্ৰশিল্পী মাৰ্চেল বৰুৱা, অংকুমান বৰদলৈ আৰু কমল কুমাৰক । পুৱতি নিশা ভৰলুমুখ আৰক্ষীয়ে আটক কৰে তিনিওকে । ভৰলুমুখত শনিবাৰে নিশা ভৰলুমুখৰ গছ কটাৰ বিৰুদ্ধে অংকন কৰা পোষ্টাৰত ‘Kick Himanta, Save nature' লিখাৰ বাবে আটক কৰে তিনিওকে ।
ইপিনে আটকাধীন তিনি যুৱকক ভৰলুমুখ আৰক্ষী থানাত ৰখাৰ পিচতেই ভৰলুমুখ থানাত বন্ধ কৰা হ’ল সাধাৰণ লোকৰ প্ৰৱেশ । ভাৰপ্ৰাপ্ত আৰক্ষী বিষয়াগৰাকীৰ অনুমতি নোহোৱাকৈ থানাত প্ৰৱেশ কৰিব নোৱাৰে সাধাৰণ নাগৰিকে ।
আটকাধীন প্ৰতিবাদকাৰীৰ খবৰ ল’বলৈ অহা ৰাইজৰ দলৰ সাধাৰণ সম্পাদক ৰাছেল হুছেইনকো প্ৰৱেশ কৰিবলৈ দিয়া নহ’ল থানাত । তিনিওকে আটক কৰাক লৈ সৰ্বত্ৰতে প্ৰতিক্ৰিয়াৰ সৃষ্টি হৈছে । প্ৰকৃতি ৰক্ষাৰ স্বাৰ্থত প্ৰতিবাদ সাব্যস্ত কৰাৰ ৰোষত জাতীয় যুৱ বাহিনীৰ তথ্য আৰু প্ৰচাৰ সম্পাদক তথা মুখপাত্ৰ অংকুমান বৰদলৈক আৰক্ষীয়ে পুৱতি নিশা ৫:৩০ বজাত শোৱাপাটীৰ পৰা আটক কৰে ।
অসম আৰক্ষীৰ এই কাৰ্যক সংগঠনটোৱে কঠোৰ ভাষাৰে গৰিহণা দি অংকুমান বৰদলৈক অনতিপলমে মুক্তি দিবলৈ দাবী জনাই জাতীয় যুৱ বাহিনীয়ে । উল্লেখ্য যে দীঘলী পুখুৰীৰ পিছত ভৰলুমুখত উৰণ সেতু নিৰ্মাণৰ নামত প্ৰায় ৭০ জোপা পুৰণি গছ কটাৰ বাবে বিভাগীয় কৰ্তৃপক্ষই দাগ দিছিলে । ইয়াৰ পিছতে গছ কটাৰ বিৰুদ্ধে সচেতন নাগৰিকক সকলে তীব্ৰ প্ৰতিবাদ অব্যাহত ৰাখিছে ।
প্ৰতিবাদৰ প্ৰতি সঁহাৰি জনাই মুখ্যমন্ত্ৰীগৰাকীয়ে দীঘলীপুখুৰীৰ পাৰৰ গছ নাকাটে বুলি প্ৰতিশ্ৰুতি দিছিল । কিন্তু ইয়াৰ পিচতে ভৰলুৰ গছ কটাৰ হ'ব বুলি উল্লেখ কৰিছিল । ইয়াৰ বিৰুদ্ধে প্ৰতিবাদ সাব্যস্ত কৰি ৰঙাঘৰৰ আলহী হ'ল তিনি চিত্ৰশিল্পী ।
