গুৱাহাটী, ৮ অক্টোবৰ: আজি মহাষষ্ঠী । বিল্ববোধনৰে বেদীত স্থাপিত হৈছে দশভূজাৰ প্ৰতিমা । ইয়াৰ লগে লগে আৰম্ভ হ'ল দেৱী বন্দনা । আকাশে-বতাহে শংখ,বৰকাহৰ শব্দ । সকলোৱে দেৱীক আদৰাৰ লগতে আটকধুনীয়া মণ্ডপবোৰত পৰিছে শেষ পৰশ ।
দুৰ্গা পূজা আয়োজনৰ বাবে গুৱাহাটী মহানগৰীৰ বিভিন্ন অঞ্চলত নিৰ্মিত আটকধুনীয়া মণ্ডপবোৰত শিল্পীসকলে দিছে শেষ পৰশ । পাণ্ডু আৰু মালিগাঁৱত নতুন নতুন ব্যতিক্ৰমী বিষয়ৰে নিৰ্মিত পূজা মণ্ডপক লৈ চলি আহিছে এক অঘোষিত প্ৰতিযোগিতা । এইবাৰো হোৱা নাই ইয়াৰ ব্যতিক্ৰম ।
বিগত সময়ত ৫০ খনৰো অধিক দুৰ্গা পূজা অনুষ্ঠিত হোৱা পাণ্ডু আৰু মালিগাঁও, আদাবাৰী অঞ্চলত ব্যতিক্ৰমী দুৰ্গা পূজা মণ্ডপ তৈয়াৰ কৰি সকলোৰে দৃষ্টি আকৰ্ষণ কৰি আহিছে । আদাবাৰী তিনিআলিৰ এখন পূজা মণ্ডপে অসমীয়া সংস্কৃতিৰ বৰ্ণাঢ্য ৰূপ প্ৰতিফলিত কৰাৰ প্ৰয়াস কৰিছে ।
সম্প্ৰীতিৰ নিদৰ্শন
প্ৰতি বছৰে ব্যতিক্ৰমী দুৰ্গা পূজাৰ মণ্ডপ তৈয়াৰ কৰি সকলোৰে দৃষ্টি আকৰ্ষণ কৰা আদাবাৰী তিনিআলিৰ তৰুণ সংঘ দুৰ্গা পূজা কমিটীয়ে এইবাৰ ৪০ ফুট ওখ জাপিৰ পূজা মণ্ডপ সাজিছে । জাপিৰে নিৰ্মাণ কৰিছে এই দুৰ্গা পূজাৰ মণ্ডপটো । মন কৰিবলগীয়া যে প্ৰধানতঃ বাংলাভাষী লোকসকলে বাস কৰা এই অঞ্চলটোত এই পূজা কমিটীখনে অসমীয়া ভাষা সংস্কৃতিক প্ৰতিফলিত কৰিবলৈ পদক্ষেপ গ্ৰহণ কৰিছে । এই প্ৰয়াসৰে সম্প্ৰীতিৰ এক ইতিবাচক বাৰ্তা কঢ়িয়ায় আনিছে ।
এই সন্দৰ্ভত তৰুণ সংঘ দুৰ্গা পূজা কমিটীৰ সম্পাদক ৰাজীৱ ধৰে কয়, "এইবাৰ দুৰ্গা পূজা মণ্ডপটো এটা বৃহৎ জাপিৰ আকাৰত নিৰ্মাণ কৰা হৈছে । মণ্ডপৰ বাহিৰত এটা অসমৰ এশিঙীয়া গড় নিৰ্মাণ কৰি সকলোকে আদৰা হৈছে । মণ্ডপৰ ভিতৰত সৰু সৰু জাপি আৰু গামোচাৰে আটকধুনীয়া সজাই তোলা হৈছে। মূলতঃ অসমীয়া সংস্কৃতিক তুলি ধৰাৰ প্ৰয়াস কৰা হৈছে ।"
