কলিয়াবৰ, ৫ জুন: চৰকাৰী বিভিন্ন আঁচনি, উপলক্ষত গছপুলি ৰোপণ কৰি প্ৰতিপালন নকৰাৰ ছবিখন সৰ্বত্ৰে জিলিকি আছে । ফলত যি উদ্দেশ্যেৰে বৃক্ষ ৰোপণ কৰা হয় সেই উদ্দেশ্য কেতিয়াও সফল নহয় । ইয়াৰ বিপৰীতে ব্যক্তিগত প্ৰচেষ্টাৰে গছপুলি ৰোপণেৰে প্ৰকৃতি সংৰক্ষণৰ নিদৰ্শন দাঙি ধৰিছে কলিয়াবৰত এগৰাকী শিক্ষকে ।
গছপুলি ৰোপণেৰে প্ৰকৃতি সংৰক্ষণ আৰু উপাৰ্জনৰ লক্ষ্যৰে কলিয়াবৰত এগৰাকী শিক্ষকৰ কৰ্মই সকলোকে উৎসাহিত কৰিছে । বিগত বৰ্ষত কলিয়াবৰৰ এগৰাকী শিক্ষকে ৰোপণ কৰা ৬৫০ জোপা মূল্যবান মেহগণি আৰু চেগুণ গছ লহপহকৈ বাঢ়িছে । শিক্ষকতাৰ সমান্তৰালকৈ প্ৰকৃতি সংৰক্ষণ আৰু বৃক্ষৰোপণ, প্ৰতিপালনত গুৰুত্ব দি আহিছে কলিয়াবৰৰ শিক্ষক ৰঞ্জিত কুমাৰ ভট্টাচাৰ্যই । যিসময়ত একাংশই গছপুলি ৰোপণ কৰি কেৱল ছেল্ফি উঠি দায়িত্ব সামৰে, প্ৰতিপালন নকৰে তেনে সময়তে শিক্ষকগৰাকীৰ এই প্ৰকৃতিপ্ৰেমক প্ৰশংসা কৰিছে স্থানীয় ৰাইজে ।
কেইবাবিঘা মাটিত বিগত বৰ্ষৰ জুনত শিক্ষকগৰাকীয়ে শাৰী-শাৰীকৈ ৰোপণ কৰিছিল মেহগণি আৰু চেগুণ গছৰ ৬৫০টা পুলি । প্ৰতিদিনে প্ৰতিপালন কৰি এখন সুন্দৰ উদ্যানলৈ ৰূপান্তৰ কৰিছে শিক্ষক ৰঞ্জিত কুমাৰ ভট্টাচাৰ্যই । এই গছপুলি ৰোপণেৰে নিবনুৱাসকল উপাৰ্জনমুখী হোৱাৰ লগতে পৰিৱেশ সংৰক্ষণতো বিশেষ ভূমিকা পালন কৰিব পাৰে বুলি তেওঁ কয় । বিশ্ব পৰিৱেশ দিৱসত সেই আশা প্ৰকাশ প্ৰকৃতিপ্ৰেমী শিক্ষক ৰঞ্জিত কুমাৰ ভট্টাচাৰ্যৰ ।
