ডিব্ৰুগড়, ২৭ জুলাই : পৰিৱৰ্তনৰ প্ৰতিশ্ৰুতি দিয়া চৰকাৰৰ দিনতো সমস্যাৰ ওৰ পৰা নাই চাহ শ্ৰমিকৰ । প্ৰতিদিনে নিজৰ প্ৰাপ্য অধিকাৰ বিচাৰি প্ৰতিবাদ সাব্যস্ত কৰিবলগা হৈছে চাহ শ্ৰমিকসকলে ।
কম মজুৰিত কাম কৰি জীৱন চলাই ৰাজ্য তথা দেশৰ অৰ্থনীতিলৈ অৱদান আগবঢ়াই অহা চাহ বাগিচাৰ শ্ৰমিকে প্ৰতিটো দিনতে জীৱনৰ নিৰাপত্তাহীনতাত ভুগিবলগীয়া হৈছে । ৰাজ্য আৰু কেন্দ্ৰীয় চৰকাৰে চাহ শ্ৰমিকৰ বাবে বহু অভিলাষী আঁচনি ৰূপায়ণ কৰিছে যদিও বাস্তৱত আজিও চৰকাৰৰ অভালাষী আঁচনিয়ে স্পৰ্শ কৰিব পৰা নাই চাহ শ্ৰমিকসকলক । চাহ শ্ৰমিকৰ সমস্যাক লৈ বিজেপি চৰকাৰক তীব্ৰ সমালোচনা কৰি প্ৰাক্তন কেন্দ্ৰীয় মন্ত্ৰী তথা অসম চাহ মজদুৰ সংঘৰ সভাপতি পৱন সিং ঘাটোৱাৰৰ সংবাদমেল ।
ডিব্ৰুগড়ৰ চাহ মজদুৰ সংঘৰ কাৰ্যালয়ত প্ৰাক্তন কেন্দ্ৰীয় মন্ত্ৰী তথা অসম চাহ মজদুৰ সংঘৰ সভাপতি পৱন সিং ঘাটোৱাৰে সংবাদমেল অনুষ্ঠিত কৰি চৰকাৰক তীব্ৰ সমালোচনা কৰে । সংবাদমেলত প্ৰাক্তন কেন্দ্ৰীয় মন্ত্ৰীগৰাকীয়ে কয়, ‘‘শেহতীয়াকৈ অসমৰ চাহ বাগিচাসমূহ অতি সংকটৰ দিশে আগবাঢ়িছে । ৰাজ্যৰ এখনৰ পিচত আন এখন বাগিচা বিক্ৰী হৈছে । চাহ বাগিচাৰ লগত কোনো সম্পৰ্ক নথকা, চাহ বাগিচাৰ জ্ঞান নথকা ব্যক্তিসকলে বাগিচা ক্ৰয় কৰিছে । যাৰ ফলত বাগিচাৰ শ্ৰমিকসকলৰ বিপৰ্যয় হৈছে । সেয়ে বাগিচা ক্ৰয় কৰাৰ আগত ক্ৰয় কৰিব বিচৰাজনৰ সৈতে চৰকাৰে চুক্তিবদ্ধ কৰিব লাগে ৷’’
আনহাতে অসম চাহ নিগমক তীব্ৰ সমালোচনা কৰি তেওঁ কয়, ‘‘ চাহ নিগমৰ অধীনত থকা চাহ বাগিচাসমূহৰ অৱস্থা দিনক দিনে বেয়া হৈছে । জীৱন বীমা, শ্ৰমিকৰ দৰমহা আদি প্ৰদানৰ ক্ষেত্ৰত ব্যৰ্থ হৈছে বাগিচাৰ মালিক । নূন্যতম ২৫০ টকা শ্ৰমিকৰ মজুৰি প্ৰদান কৰিব পৰা নাই চৰকাৰী চাহ বাগিচাসমূহত ৷ ইয়াৰ বিপৰীতে কোম্পানী বা ব্যক্তিগত ক্ষুদ্ৰ চাহ খেতিয়কসকলে ২৫০ টকা প্ৰদান কৰিছে ।’’
আনহাতে কেন্দ্ৰীয় চৰকাৰৰ তত্বাৱধানত চলা এণ্ড্ৰিউ য়ুল কোম্পানীৰ বিৰুদ্ধেও সৰৱ হৈছে অসম চাহ মজদুৰ সংঘ ৷ সংঘৰ সভাপতিগৰাকীয়ে কয়, ‘‘এই কোম্পানীৰ তত্বাৱধানত চলা বাগিচাসমূহ গভীৰ অৰ্থ সংকটত ভুগিছে । এই কোম্পানীয়ে ৰাজ্যৰ ১০ খন চাহ বাগিচা পৰিচালনা কৰিছে যদিও শ্ৰমিকক দিব পৰা নাই সময়ত মজুৰি আৰু আন সুবিধা । চৰকাৰৰ দুৰ্বলতাৰ বাবে এইদৰে চাহ কোম্পানী সমূহে চাহ শ্ৰমিকক শোষণ কৰিছে ৷’’
সংবাদমেলত কেন্দ্ৰীয় মন্ত্ৰীগৰাকীয়ে কয়, ‘‘ চাহ বাগিচাত স্থাপন কৰা আদৰ্শ বিদ্যালয়সমূহত অন্য ঠাইৰ শিক্ষক নিযুক্তি দিয়াৰ সমান্তৰালভাৱে টেট পৰীক্ষাত উত্তীৰ্ণ হোৱা চাহ বাগিচাৰ যুৱক-যুৱতীক নিযুক্তিত দিব লাগে ৷ চৰকাৰে চাহ শ্ৰমিকৰ সমস্যা সমাধান কৰিব নিবিচাৰিলে মুখ্যমন্ত্ৰী হিমন্ত বিশ্ব শৰ্মাই কৈ থকাৰ দৰে অসম কেতিয়াও ভাৰতবৰ্ষৰ ৫ নম্বৰত স্থান লাভ কৰিব নোৱাৰে ৷’’
লগতে পঢ়ক : কমি আহিছে চাহ জনগোষ্ঠীক প্ৰতিনিধিত্ব কৰা জনপ্ৰতিনিধিৰ সংখ্যা
লগতে পঢ়ক : চাহ বাগিচাৰ ৰাস্তাৰ বাবে কেবিনেটৰ ৮০০ কোটি টকাৰ অনুমোদন
লগতে পঢ়ক : চাহ বাগিচাৰ ভোটাৰক লৈ চিন্তিত সৰ্বানন্দ সোণোৱাল !
