লখিমপুৰ,১১ অক্টোবৰ: প্ৰাক্তন মুখ্যমন্ত্ৰী প্ৰয়াত তৰুণ গগৈৰ আজি নব্বৈ সংখ্যক জন্ম দিৱস । দীৰ্ঘ সময়ৰ বাবে অসমৰ মুখ্যমন্ত্ৰীৰ আসন শুৱনি কৰা জননেতাগৰাকীক সুঁৱৰিছে প্ৰতিজন অনুৰাগীয়ে । ৰাজ্যৰ বিভিন্ন প্ৰান্তত ভিন্ন কাৰ্যসূচীৰে প্ৰয়াত জননেতাগৰাকীৰ জন্ম দিৱসটো পালন কৰে গৌৰৱ গগৈ ফেনচ ক্লাবে ।
ব্যতিক্ৰম নহয় লখিমপুৰো । গৌৰৱ গগৈ ফেনচ ক্লাবে উত্তৰ লখিমপুৰ সাহিত্য সভা ভৱনত বিভিন্ন কাৰ্যসূচীৰে পালন কৰে প্ৰয়াত মুখ্যমন্ত্ৰীগৰাকীৰ জন্ম দিৱসটি । এই উপলক্ষে তৰুণ গগৈৰ প্ৰতিচ্ছবিত বন্তি প্ৰজ্বলন, মাল্যাৰ্পণ কৰে প্ৰাক্তন বিধায়ক ঘন বুঢ়াগোঁহায়ে । ইয়াৰ পিছতে আৰম্ভ হয় ৰক্তদান কাৰ্যসূচী ।
ইয়াৰ মাজতে সংবাদমাধ্য়মৰ আগত প্ৰাক্তন বিধায়কগৰাকীয়ে প্ৰয়াত তৰুণ গগৈৰ প্ৰতি শ্ৰদ্ধাঞ্জলি জনাই কয়,"২০০১ ৰ পৰা একেৰাহে ১৫ বছৰ ৰাজ্যৰ শাসনৰ জৰী হাতত লৈ তেওঁ ৰাজ্যখনৰ শান্তি-শৃংখলা স্থাপন কৰাৰ লগতে সমাজৰ সকলো স্তৰৰ লোকৰ সমবিকাশৰ হকে কাম কৰিছিল । বিশেষকৈ মহিলা-শিশু আদিৰ স্বাস্থ্যৰ প্ৰতি লক্ষ্য ৰাখি তেওঁ বহু আঁচনি প্ৰচলন কৰিছিল । নিকা, সৎ দক্ষ এইগৰাকী প্ৰয়াত মুখ্যমন্ত্রীৰ আদৰ্শ ধৰি ৰাখিব লাগিব । তেওঁৰ আদৰ্শৰাজি জীয়াই ৰাখিব লাগিব ।"
উল্লেখ্য শ্ৰদ্ধাঞ্জলি অনুষ্ঠানৰ পাছতে এক ৰক্তদান শিবিৰৰ আয়োজন কৰা হয় । লখিমপুৰ মেডিকেল কলেজৰ সহযোগত আয়োজন কৰা এই শিবিৰত গৌৰৱ গগৈ ফেনচ ক্লাবৰ ৭৫ গৰাকী সদস্যই ৰক্তদান কৰে । উল্লেখ্য জিলাখনত লখিমপুৰ সদৰৰ উপৰি লালুকতো গৌৰৱ গগৈ ফেনচ ক্লাবে তৰুণ গগৈৰ জন্ম দিৱস পালন কৰে ।
