গুৱাহাটী, ২৭ জুন : ৰাজ্যৰ দহখন স্বায়ত্তশাসিত পৰিষদক লৈ অসম বিধানসভাত প্ৰথমবাৰৰ বাবে অনুষ্ঠিত হ'ব সন্মিলন । অসম বিধানসভাই ২৮ আৰু ২৯ জুনত দুদিনীয়া কাৰ্যসূচীৰে আয়োজন কৰা এই সন্মিলনত ৰাজ্যৰ দহখন স্বায়ত্তশাসিত পৰিষদৰ সকলো বিষয়ববীয়া সমবেত হ'ব । পৰিষদসমূহক অধিক গতিশীল কৰি তোলাৰ লক্ষ্যৰে প্ৰথমবাৰৰ বাবে আয়োজন কৰা এই সন্মিলনখনৰ বিষয়ে বৃহস্পতিবাৰে সংবাদমেলযোগে সদৰী কৰে বিধানসভাৰ অধ্যক্ষ বিশ্বজিৎ দৈমাৰীয়ে ।
বিধানসভাৰ নিজা কাৰ্যালয়ত সংবাদমেল সম্বোধন কৰি তেওঁ কয় যে প্ৰথমবাৰৰ বাবে ৰাজ্যৰ সকলো স্বায়ত্তশাসিত পৰিষদক লৈ অসম বিধানসভাত অনুষ্ঠিত হ'ব এই সন্মিলন । গণতান্ত্রিক ব্যৱস্থাটোক অধিক শক্তিশালী কৰাৰ উদ্দেশ্যে আয়োজন কৰা সন্মিলনত পৰিষদীয় এলেকাসমূহৰ বিভিন্ন দিশ সামৰি আলোচনা কৰা হ'ব । আনহাতে, বহু অভিজ্ঞ ব্যক্তিয়ে ইয়াত অংশ গ্ৰহণ কৰিব ।
ইয়াৰ উপৰি বিভাগীয় মন্ত্রী ডাঃ ৰণোজ পেগু আৰু মন্ত্রী পীযুষ হাজৰীকাৰ লগতে আন মন্ত্রী তথা বিধায়কসকলেও এই সন্মিলনত ভাগ ল'ব । সংবিধানে স্বায়ত্তশাসিত পৰিষদসমূহক যথেষ্ট ক্ষমতা প্ৰদান কৰিছে বুলি উল্লেখ কৰি তেওঁ কয় যে পৰিষদীয় এলেকাৰ উন্নয়নত স্বায়ত্তশাসিত পৰিষদৰ যথেষ্ট ভূমিকা আছে ।
তেওঁ কয় যে পৰিষদৰ ক্ষমতা আৰু দায়িত্ব তথা কৰ্তব্য সন্দৰ্ভতো সন্মিলনত বিশদভাৱে আলোচনা কৰা হ'ব । পৰিষদ সমূহক ৩৪ টা গুৰুত্বপূৰ্ণ বিভাগ দিয়া হৈছে বুলি সদৰী কৰি তেওঁ কয় যে সন্মিলনত চৰকাৰী আঁচনি ৰূপায়ণত পৰিষদৰ ভূমিকা সন্দৰ্ভতো আলোচনা হ'ব ।
স্বায়ত্তশাসিত পৰিষদসমূহক শক্তিশালী কৰাৰ লক্ষ্যৰে আয়োজন কৰা সন্মিলনত পৰিষদৰ মুখ্য কাৰ্যবাহী সদস্য আৰু সদস্যসকল উপস্থিত থাকিব বুলি তেওঁ কয় । কেন্দ্ৰীয় আৰু ৰাজ্য চৰকাৰৰ আঁচনিসমূহ ৰূপায়ণেৰে পৰিষদীয় এলেকাৰ উন্নয়নত পৰিষদৰ বিশেষ ভূমিকা আছে । সেয়ে পৰিষদৰ এলেকাসমূহত গণতান্ত্ৰিকভাৱে বিধিসমূহ প্ৰয়োগৰ দিশত আলোচনা কৰাৰ উদ্দেশ্যে এই সন্মিলনৰ আয়োজন কৰা হৈছে বুলি তেওঁ লগতে উল্লেখ কৰে ।
লগতে পঢ়ক :আবেদনৰ ৰায় বাটে-ঘাটে দিব নোৱাৰি : বিধানসভাৰ অধ্যক্ষ বিশ্বজিৎ দৈমাৰী - CM Himanta Biswa Sarma
লগতে পঢ়ক :৩৫ হাজাৰ শিক্ষক পদ মুকলিৰ সিদ্ধান্ত কেবিনেট বৈঠকত - Cabinet meeting in Nalbari
