কলিয়াবৰ, ৮ জুলাই: বানে জুৰুলা কৰা কলিয়াবৰত এতিয়া কেৱল কৃষকৰ হুমুনিয়াহ । যেনিয়ে চাই তেনিয়েই দেখা যায় কৃষকৰ সপোন ভগাৰ ছবি । খেতিপথাৰত মৰহি যোৱা শইচলৈ চাই কৃষকে টুকিছে চকুলো । আকৌ এবাৰ দিশহাৰা হৈ পৰিল কৃষকসকল । কলঙৰ বানত বিধ্বস্ত খেতিপথাৰৰ দৃশ্য় দেখি কৃষকে এতিয়া সকলোপ্ৰকাৰে সাহাৰ্য কৰিবলৈ চৰকাৰক আহ্বান জনাইছে ।
কলঙৰ বানে নষ্ট কৰিছে কলিয়াবৰৰ হাজাৰ হাজাৰ বিঘা কৃষিভূমি । বিশেষকৈ কলিয়াবৰৰ পশ্চিম অঞ্চলত অধিক কৃষিভূমি নষ্ট হৈছে কলঙৰ বানত । শাক-পাচলিৰ লগতে বিঘাই-বিঘাই মৰাপাটৰ খেতি ডুব গৈছে এই বানত । কলিয়াবৰৰ গঢ়গুৰি অঞ্চলত বিঘাই বিঘাই শাক-পাচলিৰ খেতি ডুব গৈছে । কলঙৰ পাহাৰীয়া উপ-নৈ মিছা আৰু দিজুৰ পানীয়ে কলিয়াবৰৰ পশ্চিম অঞ্চলত পুনৰ বৃদ্ধি কৰিছে কলঙৰ জলস্তৰ । ফলত জলমগ্ন হৈছে মিছামুখ, খালৈআটি, গঢ়গুৰি, শিৱস্থান আদি অঞ্চল ।
মৎস্য পালন কৰি স্বাৱলম্বী হোৱা যুৱকৰ পুখুৰীও প্লাৱিত হৈছে কলঙৰ বানত । গঢ়গুৰি গাঁৱৰ সৌৰভজ্যোতি বৰা নামৰ মৎস্য পালকজনৰ তিনিটাকৈ পুখুৰী বুৰালে কলঙৰ বানে । তেওঁৰ তিনিটা পুখুৰীৰ পৰা তিনি লাখ টকাৰ মাছ উটি গ'ল বাঢ়নী পানীত ।
এইবাৰ ৬ লাখ টকাৰ পটল, কুন্দুলী, জিকা, তুৰৈ, তিয়হ, বেঙেনা, কল, মৰাপাট খেতিকে ধৰি যুৱকজনৰ আঠ বিঘা কৃষিভূমি নষ্ট হৈছে বানত । এনেদৰে গঢ়গুৰি গাঁৱৰ বহুকেইজন কৃষকৰ গড়ে ৫-৬ লাখ টকা লোকচান হোৱা বুলি কয় ।
অঞ্চলটোৰ ৰাইজে কলঙৰ বানৰ পৰা ৰক্ষা পাবলৈ মথাউৰিটো ওখকৈ নিৰ্মাণ কৰিবলৈ দাবী জনাইছে । যদিহে চৰকাৰে ৰাইজৰ দাবীৰ প্ৰতি সঁহাৰি জনাই কোনো পদক্ষেপ গ্ৰহণ নকৰে তেন্তে ভৱিষ্য়তে ইয়াতকৈ আৰু অধিক লোকচানৰ সন্মুখীন হ'ব লাগিব ।
