মৰাণ, ১৪ জুলাই: বানে গৰকা খেতিপথাৰলৈ চাই এতিয়া অসহায় কৃষকে হুমুনিয়াহ কাঢ়িছে । যেনি চাই তেনি কেৱল এখন ভগ্ন ছবি । ৰাজ্যৰ ভিতৰত এইবাৰ ডিব্ৰুগড়ৰ খোৱাঙত বানত অধিক ক্ষতিগ্ৰস্ত হৈছে কৃষক । কেইবা ঠাইতো বুঢ়ীদিহিঙৰ মথাউৰি আৰু ৰিংবান্ধ ভাঙি যোৱাত শতাধিক গাঁৱৰ ৰাইজৰ মাজত হাহাকাৰ পৰিবেশ সৃষ্টি হৈছিল । জিলাখনৰ খোৱাং অঞ্চলত বান পৰিস্থিতি কিছু উন্নত হৈছে যদিও বানপীড়িত ৰাইজ এতিয়া জটিল পৰিস্থিতিৰ সন্মুখীন হৈছে । খোৱাঙৰ বৰবিল খলিহামাৰী গাঁৱৰ দুই শতাধিক কৃষক পৰিয়ালে এতিয়া হাহাকাৰ কৰিবলগীয়া হৈছে ৷
কৃষিকৰ্মৰে স্বাৱলম্বী গাঁওখনৰ প্ৰায় ৬ শ বিঘা মাটিত লগোৱা শাক-পাচলিৰ খেতি বানপানীত সম্পূৰ্ণৰূপে জাহ যায় । গাঁওখনৰ কৃষক সকলে কৰা তিতাকেৰালা, ভাতকেৰালা, কুন্দুলি, জলকীয়া, বেঙেনা, জিকা, তিঁয়হ, পটল আদিৰ খেতি প্ৰায় ১১ দিন পানীত ডুব গৈ থকাত সম্পূৰ্ণৰূপে বিনষ্ট হয় ৷ তদুপৰি ধানখেতিৰ বাবে পৰা কঁঠিয়াও পানীত বুৰ গৈ নষ্ট হৈছে ৷ বানত আক্ৰান্ত হৈ কেইবাদিনো আশ্ৰয় শিবিৰত কটোৱাৰ পাছত গাঁৱলৈ ঘূৰি আহি এতিয়া মূৰে-কঁপালে হাত দিবলগীয়া হৈছে কৃষক ৰাইজে ।
ইপিনে, বানত কৃষক সকলৰ বহু পোহনীয়া গৰু-ছাগলী, হাঁহ-কুকুৰাৰ মৃত্যু হোৱাত সমস্যাই দেখা দিছে ৷ একেদৰে ভঁৰালত থকা ধান বানে নষ্ট কৰাত উপায়হীন হৈ পৰিছে কৃষকসকল ৷ জিলা প্ৰশাসন তথা কৃষি বিভাগে কৃষকসকলক সাহাৰ্য প্ৰদান কৰি কিছু সকাহ দিব বুলি আশা কৰিছে ক্ষতিগ্ৰস্ত ৰাইজে ৷ আনহাতে, গাঁওখনৰ মূল সমস্যা হ'ল খহনীয়া । এই সমস্যা সমাধান কৰিবৰ বাবে আহ্বান জনাইছে ৰাইজে ।
